Josasʼin koa̱n kʼuínyasoán ya jña nʼio tjín chjota
1. Jñáni kitsoyason je chjotale Cristo xi títjon tsakatio.
1 Je chjotale Cristo xi títjon tsakatio, xki̱ niʼya kitsoyason, tonga kʼoati kitsoyason ya jña nʼio tjín chjota (Hech. 20: 20, Traducción del Nuevo Mundo). Kitsoya ya jña tíjna yo̱ngo̱, nga̱ be nga nʼio nkjín chjota bichó ʼnde jebi (Hech. 5: 42). Kʼoa je pastro Pablo, nga tíjna ya Atenas, nyaon nyaon kitsoya ya jinndi̱tsi̱n (Hech. 17: 17). Nichxin xi tiyoaa ndʼaibi, ngisa ʼmiyasoán nga xki̱ niʼya. Tonga kʼoati ʼmiyasoán tojñani nga nʼio tjín chjota, jolani tsa ya jña sʼeyo karro, jña tjín negosio, parque kʼoa ya yandiaa. Ningalani jekʼoatsakʼinná nga kʼuínyasoán tojñani nga nʼio tjín chjota, tonga nkjín mani xíngiaa xi jao koya josasʼin koa̱n kuitsoyason jña nʼio tjín chjota. Kataʼyala jñánile.
2. Jósʼin kitsoyason je ndsʼee ya Nueva York kʼianga sá noviembre nó 2011.
2 Nga sa̱kóyason ya ciudadyʼai jña nʼio tjín chjota. Tojo tso je Anuario 2013 pájina 16 kao 17, kʼianga sá noviembre nó 2011, ijngo koya tsakʼétsʼiakao je ndsʼee josʼin kitsoyason ya Nueva York (Estados Unidos). Ya jñani ngisa nkjín chjota faʼa, kixinya tsa yámixa̱ kʼoa tsa xi ma xinyáya xo̱n xi cartel kjiotʼa nga kisatiobasen xo̱n xi énle Niná faʼaitʼa xi kjaʼaí kjaʼaí én tjítʼa. Jmi chjota tsabe nga nyaon nyaon, jolani tsa je chjota xi me tomatsínʼnde ya niʼyale kʼoa tsa je xi ya tjío ya jñani likui ʼya xi ma faʼasʼen. Nʼio ndasʼin kichotsjoá nga kʼoasʼin tsakʼinyason. Nga tojngo sá: 3,797 rebista tsʼabíson kʼoa 7,986 libro tsʼabíson. Nʼio nkjín chjota xi kʼoakitso nga mele nga kataʼmiyale Biblia. Kʼoa mani nga kui xá kisationi jebi nga estudio sʼe̱tsʼiakao, je direcciónle chjota xi koanndosinle je énle Niná yaa kinikasénle je jtín xi bʼakaole, ánni nga jngo ndsʼee koaisíxatʼasíni.
3. Jósʼin tísʼendajin nga kʼoatisʼin kʼuínyason jngo tjíjtsa Sonʼnde ya naxinandá jñani nʼio nkjín chjota tjín.
3 Nga kʼoasikji nda tíbichótsjoá jebi, jetísʼendajin nga kʼoatisʼin kʼuínyason jngo tjíjtsa Sonʼnde ya naxinandá jñani nʼio nkjín chjota tjín. Je sucursal xi tjío nga jngó jngó naxinandá, skósonnile jñáni nga ngisa skénndiaa nga kʼoasʼin sa̱kóyason. Jñani ngisa skénndiaa yaa ciudad jñani nʼio nkjín chjota bʼema, jolani tsa ya jña terminal tjín, jña nʼio nkjín oficina kʼoa kao ndʼiangʼa tjín. Je sucursal sikasénle xo̱n je jtín xi kʼoaile kjoanda jebi jñani kʼoakuitsole josʼin sixá. Kʼoa je xi tjoéjin nga kʼoasʼin kuitsoyason jé xi precursor regular kʼoa xi precursor especial sʼin tjíosíxá, kʼoa sakʼoa tjoéjin je precursor auxiliar.
4. Jósʼin tsoyason je xíngiaa ya jña nʼio tjín chjota.
4 Jósʼin sakóyason ya jña nʼio tjín chjota. Je precursor xi kʼoasʼin tsoyason, kʼiaa saʼnda fákao je chjota nga jebichóchrian ya jña nyabasen je xo̱n kʼoa kʼoatsole nga koa̱n skoé tojñanile xo̱n xi mele. Kʼoati bakóle jotso Biblia tʼatsʼe jme xi mele skoe̱. Kʼianga bʼa xo̱n je chjota alikui síkʼaxki̱le tsa koa̱n tsjoá choa tao̱n. Tonga tsa toxá je chjota skónangini, kʼoatsole nga koa̱n ya sikasén jotjín kjuinroajin ni̱ma̱le ya dirección xi faʼaitʼa je xo̱n. Kʼiatsa bele kon, kʼoati kjonangile jebi je chjota: “A tsí matsjoali tsa tjín xi koaikakóyali”. Kʼoa tsamaije̱ itsole: “A tsí meli tsa kʼoati kʼuínyali je Biblia, tokjoatjaoní”.
5. Jókitso jngo ndsʼee kʼoa kao chjoónle nga kʼoasʼin tjíotsoyason ya jña nʼio tjín chjota.
5 Nʼio basenkaoná nga ʼmiyasoán ya jña nʼio tjín chjota. I kitso jngo ndsʼee kʼoa kao chjoónle: “Kʼianga tinyaijin kʼoa tichotsenlaijin ngatsʼi chjota xi tjíofaʼa ya chrian jña séjna je xi ma xinyáya xo̱n, kʼiaa machoyanajin jokji kjoama̱ tísʼengi nga tjíosakóyale énle Niná je chjota jngo tjíjtsa Sonʼnde. Kʼianga nikjaʼaitsjainjin jokji mandosinle Jeobá nga jngó jngó chjota, ngisa tísʼejngo tokuinjin nga tosi tonda kui títjon si̱kʼéjnaijin je xále Niná. Kʼianga faʼa chjota nga tiyoʼndaijin je xi ma xinyáya xo̱n, kui fiya jkuijin jotísʼín Jeobá nga tíkotʼajin je ni̱ma̱le chjota nga tíbásjai ʼyani xi bakinle nga skoe̱ énle. Ñaki tiʼyaníjin ndʼai josʼin tjíobinyakaonajin je ánkje nga tiʼmiyasuinjin”.
6. 1) Jósʼin tjíobʼéndajin kʼa jtín nga tjíotsoyason ya jña nʼio tjín chjota, kʼoa ánni nga tsín mangósonsíni jebi kao xi títjon kabixoán. 2) Jósʼin tjínnele tsjoánganʼio nga jngó jngó jtín kʼianga kuitsoyason ya jña nʼio tjín chjota.
6 Xi je jtín kʼoendajin nga sa̱kóyason ya jña nʼio tjín chjota. Nʼio nkjín jtín jñani jetjíobʼéndajin je xi chjotajchínga sʼin tjío nga kataʼmiyason ya jña nʼio tjín chjota. Je xíngiaa xi tsoyason binyábasen yámixa̱ kʼoa tsa xi ma xinyáya xo̱n ya jñani nʼio nkjín chjota bʼema, tonga toyaa tje̱n jñani bʼakaole tsoyason je jtínle. Kʼoa jebi likui mangóson kao je xi títjon kabixoán, nga̱ je xi títjon nkjín jtín tjoéjinni je precursor xi tsoyason ya ʼnde xi je sucursal kjoejin (chótsenlai je rekuadro xi tso: “Kʼoainganʼioá josʼin sʼe̱ndajin”).
7. Jósʼin kʼoendajin je xi chjotajchínga sʼin tjío tsa skénndiaa nga sa̱kóyason ya jña nʼio tjín chjota.
7 Je xi chjotajchínga sʼin tjío kuenta sʼin tsa tjín ʼnde jñani nʼio nkjín chjota bʼema ya jña bʼakaole tsoyason je jtínle, kʼoa skósonnile tsa skénndiaa nga sa̱kóyason ya jña nʼio tjín chjota. Tsakui nichxin koa̱n xi̱nyá tsa yámixa̱ kʼoa tsa xi ma xinyáya xo̱n ya jña tjín terminal xi tsʼe karro kao avión, ya jinndi̱tsi̱n, ya parque, ya kaye jña nʼio nkjín chjota bʼema, ya jña nkjín tiendayʼai tjíokjao, ya jña universidad tjín kʼoa ya jñani nga tjínxá maxkóni chjota nga xki̱ nó. Kʼoa ngisa nda tsa tikuini ora kao nichxin xi̱nyá kʼoa nga tsín kʼoantjaiya jñani xi̱nyá. Kʼoa ngisa nda nga ya xinyá je yámixa̱ jebi ya jñani nkjín tiendayʼai tjíokjao tikʼoajinni ya jñani tojngo tiendayʼai tíjna, nga̱ ya tienda jebi tokuikjoan xá bichóni chjota nga tjín xi bichókatse kʼoa sasa bitjoni. Tjío ʼnde jñani ngisa skénndiaa nga kui koa̱nchjén je xi ma xi nyáya xo̱n ʼndele nga yámixa̱ sa̱sén, jolani tsa ya banqueta jña nʼio nkjín chjota bʼema. Tjío archivo ya Internet xi koa̱n sʼin descargar je xi chjotajchínga sʼin tjío nga koa̱n koa̱nnda je cartel xi koa̱nchjén nga kʼoasʼin kʼuínyason. Archivo jebi kui faʼaitʼa je Xo̱n xi Bájinkonná, ¡Despertad! kʼoa kao libro Jmé kjoanni xi bakóya je Biblia. Je xíngiaa xi kʼoasʼin kuitsoyason, kui koaitjenngi je kjoafaʼaitsjen xi tsjoále je xi superintendente xi tsʼe servicio sʼin tíjna ya jinjtínle, kʼoa kʼoatisʼin kuitsoyason josʼín je xíngiaa xi je sucursal kjoejin. Kʼiatsa jngo chjota jtsaojin xi mandosinle énle Niná xi likui ya tíjna ya ʼnde jña bʼakaole nga tsoyason je jtín, jngo xo̱n xi Sírvase visitar (S-43-S) ʼmi kʼoenda kʼoa jé tsjoále je xi secretario sʼin tíjna ya jinjtínle.
8. Jñáni koa̱n kuitsoyason jngo xíngia kʼiatsa tsín ʼnde jñani nʼio nkjín chjota bʼema ya jña bʼakaole tsoyason je jtín.
8 Jósʼin koa̱n kʼuínyasoán ya jña nʼio tjín chjota. Kʼoa jósʼin jngo xíngiaa tsa mele kuitsoyason ya jña nʼio tjín chjota kʼiatsa tsín ʼnde jñani nʼio nkjín chjota bʼema ya jña bʼakaole tsoyason je jtín kʼoa likui koa̱n nga yámixa̱ kʼoa kao xi ma xinyáya xo̱n xi̱nyábasen. Koaan ya kuitsoyason ya jña nkjín negosio tjín, ya jñani tjíojngo jao tiendayʼai kʼoa tsa ya tienda jña nʼio nkjín chjota bichó. Kʼoati koa̱n ya parque, ya jinndi̱tsi̱n kʼoa tsa jñasani nga maxkó chjota. Kʼoati tjío ʼnde jñani sakʼoa nʼio nkjín chjota maña, kʼoa koaan ya kuitsoyason.
9. Ánni nga kʼoénesínilee yaoná nga kʼuínyasoán tojñani nga tjín chjota.
9 Je Jeobá “mele nga ngatsʼi chjota kuitjontjai, kʼoa nga kuichonrʼoe xi kjoakixi” (1 Tim. 2:4). Kʼoa kuinga nʼio tibʼenesínilee yaoná nga tifajinkoaan ngatsʼi chjota je énnda xi tʼatsʼe Chjotaxále Niná nga kjesa fetʼajin jme xi chon sonʼnde (Mat. 24: 14). Nga kʼoasʼin ʼmiyasoán ya jñani nkjín chjota bʼetsoma sakʼoa ya tsaojiaan je chjota xi tsín tsaojiaan ya niʼyale. Kʼoa tokʼoasʼin nga ma nrʼoé je énnda chjotse. Kuinga kʼoénesínilee yaoná nga kʼuínyasoán tojñani nga tjín chjota kʼoa si̱jngoaa je xá jebi (2 Tim. 4:5).
[Rekuadrole pájina 5]
Kʼoainganʼioá josʼin sʼe̱ndajin
Tjíokʼa xíngiaa xi kjaʼaí kjaʼaí jtín tjío xi kʼoasʼin tsoyason ya jña nʼio tjín chjota. Tonga sakʼoaxó tikuini kaye tsoyason, kʼoa tsamaije̱ tiyani negosio, terminal jña bitjo karro kʼoa kao jñani sʼeyo karro. Kʼoaxóti tjínkʼa xíngiaa xi kjaʼaí kjaʼaí jtín tjío xi sakʼoa tiya síkáyoni rebista jña síkáyo xi ngikʼa, kʼoa tsamaije̱ tije tima chjota fákaonajmíni énle Niná. Kʼoa tsandalani kjaʼaí kjaʼaí ora tsoyason xíngiaa jebi, tonga tjínkʼa chjota xi chan masile. Kʼianga ʼmiyasoán ya jña nʼio tjín chjota, tongisa nda nga toyatje̱n kʼuínyasoán ya jñani tje̱n bʼakaole tsoyason je jtínná.
Kʼiatsa tjíokʼa xíngiaa xi mele ya kuitsoyason ya jña nʼio tjín chjota tonga xi kjaʼaí jtín bʼakaole, títjon kjoanla je katafákao je xi superintendente xi tsʼe servicio sʼin tíjna ya jinjtínle. Kʼoa ndsʼee jebi jé sijéʼndele je xi superintendente xi tsʼe servicio sʼin tíjna ya jtín xi ijngo. Kʼianga nkjín mani jtín xi kjaʼaí kjaʼaí én nchja̱ tikuini ʼnde tsoyason, je xi superintendente xi tsʼe servicio sʼin tjío nga jngó jngó jtín tjínnele nda kjaoyani josʼin sa̱kóyason ánni nga tsín chjota ni̱jtisínilee. Kʼiatsa kʼoainganʼioá josʼin sʼe̱ndajin, ndasʼin koa̱nxá kʼoa “ndiaandiaa [koanngínkoaa] ngayije kjoa” (1 Cor. 14: 40).
[Sén xi faʼaitʼa ya pájina 6]
[Sén xi faʼaitʼa ya pájina 6]