Nga ʼmiyasoán jña nʼio tjín chjota nʼio tsjoa sʼe tokoán

1. Jméni xi ʼmile je jtín xi ya bʼakaole tsoyason ʼnde jñani nʼio nkjín chjota faʼa.

¹ Je jtín xi ya bʼakaole tsoyason ʼnde jñani nʼio nkjín chjota faʼa, kʼoaʼmilee nga katabinyá yámixa̱ kʼoa tsa xi ma xinyáya xo̱n xi Énle Niná faʼaitʼa. Tsa kʼia nga kui koa̱nchjén je xi ma xinyáya xo̱n, tjínnele ninga tojngo publicador xi ya koase̱njna kʼoa tsa ya kʼoéjnatʼale je xi ma xinyáya xo̱n. Kʼoa tsa yámixa̱ koa̱nchjén jao publicador sikuinda. Ngatsʼiñá nga tjínnele nga ndʼé si̱koaa chjota. Kʼianga jngo chjota sichrian, koaan jngo publicador kjoakaonajmí kʼoa i̱ kuitsole: “A sakʼoaa chjonangilai yaoli jótso je Biblia xi tʼatsʼe jebi”. Kʼoa xi tiya chrianni, koaan tsa jngo kʼoa tsa jao ndsʼee kuinya xi kjoakaonajmí Énle Niná je chjota xi ya tjíofaʼa.

2. Tʼeyanajmí jngui choa̱ xi bakó nga nʼio nda bichótsjoá nga ya ʼmiyasoán jñani nʼio tjín chjota.

² Nga kʼoasʼin tíʼmiyason je Énle Niná, nʼio nkjín chjota xi tjíokotʼaya je Biblia. Tobʼelañá, kʼianga tsakʼénda je xo̱nle jngo tsoti xi universidad tsoʼba, kui kiski xi tʼatsʼe testigole Jeobá tonga likui koansjaile Ndʼia jña chotʼayá. Tonga xi jejaʼato jngo xomana tsabe ya universidad jngo yámixa̱ xi xo̱n xi Énle Niná faʼaitʼa tjíoson. Kʼoa kisʼetsʼiakao nga tsakʼinyale Biblia. Ndʼaibi jetsoyason, jekisʼenngindá kʼoa kʼoatisʼin tsoyason jñani nʼio tjín chjota.

3. Jótso je ndsʼee xi ya jetsoyason jñani nʼio tjín chjota.

³ Jngo tichjaa xi tsoyason jñani nʼio tjín chjota i kitso: “Tjínkʼa xi kui bichókʼá je rebista xi sʼa chjotse. Kʼoa tjínkʼa xi kjesa nrʼoéjin xi tʼatsʼe testigole Jeobá. Kʼianga kʼoasʼin ʼmiyasoán nʼio nkjín chjota xi sʼejinle tʼatsʼe je Énle Niná”. Ijngo tichjaa xi i̱ kitso: “Nga kʼoasʼin ya ʼmiyaa jñani nʼio tjín chjota nʼio tsjoa sʼe tokoán, nga̱ tosa je chjota bichó jñani tiyoaa, ninga tobichókotsen tsjoakjoa”.

4. Ánni nga ngisa ndasíni nga tojngo ʼnde si̱kasénjnaa je xi ma xinyáya xo̱n, nga tikuini nichxin kʼoa nga tikuini ora.

⁴ Kʼiatsa kui si̱chjén je xi ma xinyáya xo̱n, ngisa nda nga tojngo ʼnde si̱kasénjnaa, nga tikuini nichxin kʼoa tikuini ora. Kʼianga jeskoe̱ ngantsjai je chjota, ngisa koa̱nnʼio kon nga skónangi kʼoa nga sijé je xo̱n xi Énle Niná faʼaitʼa. A jetjínndajinle je jtínli nga tsoyason jñani nʼio tjín chjota. Tʼendajin nga kʼoati tʼainganʼiui ánni nga kʼoati tsjoa katasʼesíni tokuin nga kʼoasʼin kʼuínyasuin ngakjijnda je “kjoatéxomale Niná” (Luc. 9:60).