Nda si̱chjén nichxinná kʼianga ʼmiyasoán
Tjen septiembre nó 2013 saʼnda agosto nó 2014, je testigole Jeobá 1,945,487,604 ora kitsoyason jngo tjíjtsa Sonʼnde. Jebi kui xi bakó nga ñaki kʼoatjío tokoán nga tosi tonda nʼio si̱xálee je Jeobá (Sal. 110:3; 1 Cor. 15:58). Nga jetochoasa mani je nichxin xi tiyoaa ndʼaibi, kʼoénelee yaoná nga ngisasa nkjín chjota chja̱kaonajmiá kʼianga ʼmiyasoán (1 Cor. 7:29).
Kʼianga nda si̱chjén je nichxinná kʼianga ʼmiyasoán machjén nga si̱nkjínlee tokoán josʼiaan. Tobʼelañá, kʼiatsa jngo ora kʼoa tsa nkjínsa ora ʼmiyasoán tonga tsa nijngojin chjota kajiaan, jméni xi koa̱n sʼiaan kʼianga ngisasa nkjín chjota chja̱kaonajmiá kʼianga ʼmiyasoán je Énle Niná. Kjoaixi nga bʼantjaiya jochon nga jngó jngó ʼnde, tonga tsa kjuintjenngiaa je kjoafaʼaitsjen xi fisani tochale koasenkaoná nga nda si̱chjén je nichxinná kʼianga ʼmiyasoán kʼoa nga tsín to nichxinná si̱chaa (1 Cor. 9:26).
Nga xki̱ niʼya ʼmiyasoán. Jenkjín nó nga je xi jetsoyason kʼoasʼin ngale nga xki̱ niʼya bʼétsʼiakaoni nga tsoyason. Tonga, nga nʼio nkjín chjota xi síxá kʼianga nichxin, tongisajin nda tsa kʼia nga koa̱nxon kʼoa tsa kʼia nga jekjimaʼña̱ kʼuínyasoán nga xki̱ niʼya, nga̱ je chjota jetjío ya niʼyale kʼoa jengisa ale nga kʼoachon. Kʼianga tanjio koaan tsa ya yandiaa kʼoa tsa ya jña negosio tjín kʼuínyasoán ánni nga jtsao̱jinsíñá je chjota.
Jña nʼio tjín chjota. Koaan xi̱nyá yámixa̱ kʼoa kao je xi ma xinyáya xo̱n xi Énle Niná faʼaitʼa ya jñani nʼio nkjín chjota faʼa, tonga toyaní ya territorio jñani bʼakaole tsoyason je jtín (chótʼai je xo̱n Xá xi nʼia tʼatsʼe Niná xi tsʼe sá julio nó 2013 pájina 5). Tonga tsa ya ʼnde jebi tsín tinkjín chjota kjoaʼani, je Comité de Servicio xi tsʼe Jtín koaan kʼoendajin nga ya kataxinyá je yámixa̱ kʼoa kao je xi ma xinyáya xo̱n xi Énle Niná faʼaitʼa ya jñani ngisa nʼio nkjín chjota faʼa.
Nga mangínchon ijngokʼalee je chjota kʼoa nga estudio bʼailee. Tjín nichxin nga sakʼoa tsín tsaojiaan chjota nga ʼmiyasoán. Nga kʼoama koaan nga je kjuinchón ijngokʼalee je chjota xi sa kinokjoakaoñá je Énle Niná kʼoa kao je xi bʼailee estudio. Tobʼelañá, kʼiatsa kʼianga xoto nga tanjio tsaojiaan je chjota nga ʼmiyasoán nga xki̱ niʼya, koaan kʼia nga jekoa̱nxon kʼoa tsa kʼia nga jekjimaʼña̱ kjuinkʼailee estudio je chjota xi ʼmiyalee. Kʼoa tsa karro mangínkoaa nga mangínchon ijngokʼalee je chjota ngisa nda tochoa koa̱nñá nga kjuinyaa nga jngó jngó karro ánni nga ngisa nda kʼuínyasonsíñá.
Kjoaixiní nga koa̱n kʼoéxki̱ntsjé jotjín ora ʼmiyasoán, tonga ngisa tsjoa sʼe̱ tokoán kʼiatsa jtsaojiaan je chjota xi chja̱kaonajmíñá je Énle Niná. Kʼiatsa tsín tsaojiaan chjota josʼin ʼmiyasoán kʼoa jme orani nga ʼmiyasoán, koaan kjoásjaisalee josʼin kʼuínyasoán. Kʼoétsʼoalee je Jeobá “je Nai[le] xi tsʼe je xi kjimajchábe” nga katabasenkaoná nga ngisa nda si̱chjén nichxinná nga ʼmiyasoán (Mat. 9:38).