A koaan kʼianga koa̱nxon koanngínkʼinyasoán
1. Jótso jngo libro, jólachon kitsoyasonntsjai je pastro Pablo.
1 Jngo libro kijna xi kʼoatso nga je pastro Pablo tje̱n las cuatroxó tsakʼétsʼiakaontsjaini nga kitsoyason kʼoa jexó manjio síkjetʼa (Daily Life in Bible Times). Ninga tsínkjoan ʼyaa tsa ñaki kʼoachon kitsoyasonntsjai, je xi ʼyaa kuinga tíjnanda nga kʼoakisʼin tojmeni “xi [to]tʼatsʼe énnda” chjotse (1 Cor. 9:19-23). Je Pablo tochale tongini tsakʼéndajin jme orani kikakóyason ánni nga ngisa nkjín chjota kitsaojinsíni.
2. Ánni nga kjenndiaasíni nga kʼia mangínkʼinyasoán nga jemaxon.
2 Nkjín ʼnde tjín jñani nga jekʼoasʼin ngale je ndsʼee nga tanjio tsoyason. Tonga si̱kjaʼaitsjenla ya ʼnde jñani ʼmiyasoán: A satéjintsʼiñá chjota nga kʼoachon mangínchonlee. I kitso jngo ndsʼee xi precursor sʼin tísíxá: “Me tsín ʼya xi tsaojiaan kʼianga tanjio, tosa kʼianga manjio nga tjío chjota”. Kʼianga kʼoachon mangínchonlee chjota, ngisa ale kʼoa ngisa nda binyáñoná. Kʼoati ngisa nkjín chjotaxʼin tsaojiaan. Kʼiatsa kjenndiaa, je xi chjotajchínga sʼin tjío koaan kʼoendajin jñani koa̱n kuitjoni je xíngiaa nga koaitsoyason nga koa̱nxon.
3. Kʼiatsa nda chósonnilee, jósʼiaan tsa kʼianga manjio ʼmiyasoán.
3 Chósonnilee josʼiaan. Tjínnele nda chósonnilee josʼiaan tsa kʼianga manjio ʼmiyasoán. Tobʼelañá, tsa kʼiakjoán kuichoaa nga tjíokjen chjota koaan kʼoakʼuínlee nga kʼia kuichoaa nga jekoa̱kjen. Kʼoa tsa jenjio chon, ya kuinyaa jñani isen chon ánni nga skoe̱síniná xi tsʼe ndʼia, kʼoakuínlee joʼminá kʼoa jme xá titsomañá. Kʼoati ngisa nda nga jao jao kuitsomaa kʼoa tsa yaje̱ jñani tjíotsoma ndsʼee xi ngikʼa. Alikui koa̱n ya kuitsomaa jñani njio chon kʼoa jñani tokjitia chon. Alikui koa̱n nga jenʼio njio kuicho nikjanetʼaa xo̱ntjoale chjota, nga̱ tsakui nichxin jekjoáyofe (2 Cor. 6:3). Kʼoa jñani xkón machon, ngisa nda tsa kʼia si̱kjetʼaa nga kje manjiojin (Prov. 22:3).
4. Jmé kjoanda xi tje̱nkao nga kʼia mangínkʼinyasoán nga maxon.
4 Kjoanda xi tje̱nkao. Ngisa tse kjoatsjoa tje̱nkao kʼianga nkjín chjota tsaojiaan nga ʼmiyasoán. Kʼiatsa nkjínsa chjota chja̱koaa énle Niná, ngisa nkjínsa chjota xi skoe̱ jokjoantjínni énle Niná kʼoa tsakui nichxin kuitjontjaile yaole (1 Tim. 2:3, 4). Kuinga si̱kjaʼaitsjensíñá tsa koa̱n kʼianga koa̱nxon koanngínkʼinyasoán.