Jósʼiaan nga ngisa nda kʼuínyalee je chjota xi ʼmiyalee Biblia

1. Jmé xi kjinená nga sʼiaan kʼianga ʼmiyalee Biblia chjota.

¹ Likui ʼya xi koa̱n sixále Niná Jeobá tsa tsín je xi “kjoaʼaíkao” (Juan 6:44). Ninga kʼoalani, tojo ñá kjinená nga kuinyakoaa je chjota xi ʼmiyalee Biblia nga katasíchriantʼale je Nʼainá xi tíjna ngʼajmi (Sant. 4:8). Kuinga machjénsíni nga kuiyondaa. Kʼianga koa̱njinle kʼoa nga kʼoasʼin jotso je Énle Niná ali tsa tokuijin xi machjén nga kʼoakʼuínlee nga katabʼéxkia je párrafo kʼoa nga kʼoakatso jme xi kjonangi nga jngó jngó párrafo.

2. Jósʼiaan nga ñaki nda kʼuínyalee je chjota xi ʼmiyalee Biblia.

² Kʼianga nda kʼuínyalee je chjota xi ʼmiyalee Biblia, machjén nga kuinyakoaa: 1) nga katamajinle jmeni xi bakóya je Biblia; 2) nga katamakjainle, kʼoa 3) nga kʼoakatasʼín jmeni xi jekjimajinle (Juan 3:16; 17:3; Sant. 2:26). Sakʼoaa nkjín sá bichómani jebi. Tonga nga koa̱n sichriantʼale je Jeobá kʼoa nga koa̱n tsjoátʼale yaole tjínnele kʼoasʼin nga jngó jngó koya jebi.

3. Ánni nga chósonsínilee jme xi chjónangilee je chjota xi tiʼmiyalee.

³ Jósʼin síkjaʼaitsjen je chjota xi tiʼmiyalee. Kʼianga jchaa tsa kjimajinle kʼoa tsa jekjimakjainle jmeni xi tiʼmiyalee, koaan kʼoakʼuínlee nga kʼoakatso josʼin síkjaʼaitsjen ʼndele nga toñá kuinókjoaa (Sant. 1:19). A kjimajinle jmeni xi tso je Biblia tʼatsʼe jmeni xi tibakoyalee. A koaanle kuitsoya josʼin majinle ʼndele nga toya xo̱n kʼoexkia jmeni xi kuitso. Jósʼin síkjaʼaitsjen tʼatsʼe jmeni xi jekjimajinle. A majinle nga tjen ndiaale jmeni xi bakóya je Biblia (1 Tes. 2:13). A machoyale nga tjínnele sikʼantjaiya yaole (Col. 3:10). Kʼianga jchaa josʼin síkjaʼaitsjen xi tʼatsʼe jebi je chjota xi tiʼmiyalee, machjén nga chósonnilee jme xi chjónangilee kʼoa nda kuinóʼyalee jokuitso (Mat. 16:13-16).

4. Jméni xi machjén nga sʼiaan tsa likui kjimajinle je chjota xi tiʼmiyalee kʼoa tsa ñʼai kjimale nga kʼoatísʼín jotso je Biblia.

⁴ Tjínkʼa chjota xi jenʼio koanngale josʼín kʼoa josʼin síkjaʼaitsjen, kʼoa tsakui nichxin tse kuichomani nga sikʼantjaiya yaole (2 Cor. 10:5). Jósʼiaan tsa je chjota xi tiʼmiyalee kje makjainjinle kʼoa tsa kje kʼoasʼínjin jmeni xi jekjimajinle. Machjén nga tsejta koaan kʼoa nga chóyakao jokjitseñá nga katasíxájin ya ni̱ma̱le je Énle Niná kao nganʼiotsjele (1 Cor. 3:6, 7; Heb. 4:12). Likui koa̱n tsa kjoanʼio kʼoénelee. Ngisa nda tsa kjaʼaí kjoaʼmiya kʼuínyalee kʼiatsa likui kjimajinle kʼoa tsa ñʼai kjimale nga kʼoatísʼín jotso xi tiʼmiyalee. Tsa tsejta koaan kʼoa kao kjoatsjoa kʼuínyalee jmeni xi tso je Biblia, tsakui nichxin channi sikʼantjaiya yaole.