Jósʼiaan nga ndasa kʼuínyasoán: kʼiatsa tokoa̱njtile je chjota

Ánni nga nʼio chjísínile nga kʼoasʼiaan. Kʼianga ʼmiyasoán satéjinñá chjota xi nda fákaonajmíná. Tonga je Jesús kʼoakitso nga sʼe̱ je chjota xi koa̱njtikená (Juan 17:14). Kuinga tsín tokʼoamasíniná kʼianga jngo chjota satéjiaan xi tomajtile nga Énle Niná chjakaonajmíñá. Jósʼiaan kʼianga kajiaan chjota jebi. Tjínnele nga kʼoasʼin chja̱koaa josʼin nga sasénle je Jeobá, nga̱ tʼatsʼe nokjoañá (Rom. 12:17-21; 1 Ped. 3:15). Kʼiatsa nda tso én chja̱koaa je chjota, alikuijin tse kjoa kuichomani. Kʼoa xi ijngosani, sa̱sénjinle je chjota xi tichjakoaa kʼoa kao xi skoe̱ná. Kʼoa ngisajin kjuinrʼoéle nga kuichokonle xi kjaʼaí testigole Jeobá (2 Cor. 6:3).

Jókoa̱n sʼiaan:

Likui si̱jtilee yaoná kʼoa ndʼé si̱koaa chjota ánni nga kjoaʼajensíni kon. Alikui koa̱n nga ñá si̱jtilee yaoná jmeni xi kuitsoná chjota (Ecl. 7:9). Tsakui nichxin kuinga jtinile tsa nʼio tse kjoa tífaʼatojin kʼoa tsa kʼia kabichoaaje̱ nga tsín ndatjín kon. Kʼoa tsakui xi tsín sasénle jme xi ʼmiyasoán, tsakui nichxin kuinga to énndiso kinrʼoé xi tʼatsaan (2 Cor. 4:4).
Ngasin nganda chja̱koaa je chjota (Prov. 15:1). A sʼaa tísíkjáya nga kabichoaa. A tsín ale nga kabichoaa. Kjoaixi nga likui tjínnele nga kjoanichatʼa si̱jé nga kʼoasʼin ʼmiyasoán. Tonga tsa kʼia kabichoaa nga tsín ndatjín kon je chjota, koaan kʼoakʼuínlee nga katasíchatʼaná. Kʼoa tsakui nga jtinile je chjota nga énndiso kinrʼoé xi tʼatsaan, jósʼiaan. Koaan i̱ kʼuínlee: “Majinna ánni nga jtinili, tonga ali tsa kjoaixi ngayeje jmeni xi tsakʼinli xi tʼatsainjin. A koaan kʼoaxínle xi tʼatsʼe jebi”. Kʼoa tsakui xi tsín sasénle jonʼia xi tʼatsʼe je xi bichonsjejin naxinandále Niná kʼoa tsa xi tʼatsʼe je njín, koaan i̱ kʼuínlee: “Kʼoati kui xi saje kʼoatsakʼinna xi tʼatsʼe jebi, tonga a koaan xínyale jotso je Biblia anni nga kʼoanʼianijin”.
Kʼoa tsa nʼio jtile je chjota, tongisa nda nga tokoanngián nga tsín jokʼuínlee. Kʼoa tsa kʼoakuitsoná nga tsín timenile nga je testigole Jeobá kuichokonle, koaan kʼoakʼuínlee nga kuenta sʼiaan jebi.

I̱ tʼiain sá jebi:

Kʼianga chotʼayajtíon je Énle Niná ya niʼyano, kʼoatʼianchoyao jósʼin chja̱kaonajmío chjota xi tomajtile.
Kʼiatsa jngo chjota kasatéjion xi tokamajtile, chjónangilai je xi ñatjen tiʼmiyasuin tsa kama nga ngisa ndasʼin kachjakaonajmío je chjota.