Jósʼiaan nga ndasa kʼuínyasoán: si̱káyolee chjota je libro Jmé kjoanni xi bakóya je Biblia

Ánni nga nʼio chjísínile nga kʼoasʼiaan. Je libro Jmé kjoanni xi bakóya je Biblia kui xi ngisa nʼio nichjén kʼianga ʼmiyasoán. Kʼiatsa mená nga kui si̱chjén nga kʼoailee estudio je chjota, títjon kjoanla si̱káyolee libro jebi. Kuinga machjénsíni nga kʼoénelee yaoná nga katamaná josʼin si̱chjén kʼianga si̱káyolee chjota (Prov. 22:29). Nkjín koya josʼin koa̱n si̱káyoaa. Kʼoa koaan kui chjoéjiaan xi ngisa skénndiaa ya jñani ʼmiyasoán.

Jókoa̱n sʼiaan:

Jngo kjoachjonangi si̱kʼéjnalee je chjota kʼiatsa mená nga koa̱nndosinle jngo kjoaʼmiya xi ya faʼaitʼa je libro. Koaan kui si̱chjén je kjoachjonangi xi tjío ya jña fitsʼiani nga jngó jngó kjoaʼmiya. Nga jekʼoakuitso chjota josʼin síkjaʼaitsjen, jngo testo kʼoéxkialee, kʼoa tojngo jao minuto koakoyalee jngo párrafo xi faʼaitʼa ya libro xi kui nchja̱ni jme xi kachjonangilee.
Ijngo koya xi koa̱n sʼiaan nga koa̱nndosinle je chjota kuinga kui si̱chjén je pájina xi fitsʼiani je libro, kʼoa koakolee jñani tjíotʼa je testo xi tsʼe Biblia. Tobʼelañá, kʼiatsa kui si̱kʼaxki̱lee jmeni xi kitso noticia koaan kʼoakʼuínlee nga nʼio nkjín chjota xi kui kjonangile yaole jotso kjoachjonangi xi faʼaitʼa ya pájina 3. Tsa maije̱, koaan kʼoakʼuínlee nga ya tinixatʼa ngotjoá je chjota nga kui tichjakaonajmíñá nga nda kuiyoaa nichxin xi nroaján. Koakolee sén xi faʼaitʼa ya pájina 4 kao 5 kʼoa i̱ kʼuínlee: “Jñánile xi faʼaitʼa ibi xi jemeli nga kʼoakatama”. Xi ijngosani, kʼoati koa̱n kʼoakʼuínlee je chjota nga mená chja̱kaonajmí ngotjoá tʼatsʼe xi nʼio chjonangilee yaoná. Koakolee je kjoachjonangi xi faʼaitʼa ya pájina 6 kʼoa kʼoakʼuínlee jñánile xi ngisa mandosinle.
Kʼoati koa̱n kʼoakʼuín ndi̱to̱nlee chjota tsa mele skótʼaya. Koaan i̱ kʼuínlee: “Kui libro jebi tifayolaijin xíngiaa kʼianga koa̱n skótʼaya Biblia. A jesa tsaʼyai. [Tʼaiʼndelai chjota nga katanchja̱.] Tsa ali, koaan xínya ngotjole josʼin koa̱n chótʼayai Bibliali kao libro jebi”.

I̱ tʼiain sá jebi:

Je Nichxin nga chotʼayajtíon Énle Niná ya niʼyano koaan kʼoasʼianchoyao josʼin si̱káyolao chjota libro jebi.
Tʼeyanajmílai je xi ñatjen kʼuínyasuin jokʼuínlai chjota nga si̱kájnalai je libro Jmé kjoanni xi bakóya je Biblia (Prov. 27:17). Kʼiatsa tsín koayo chjota je libro koaan kjaʼaísʼin chja̱koai je chjota xi ska̱jinsai.