**Jósʼiaan nga ndasa kʼuínyasoán: koakochoyaa kao je libro Jmé kjoanni xi bakóya je Biblia josʼin bakoyaa Énle Niná**

Ánni nga nʼio chjísínile nga kʼoasʼiaan. Tochale nʼio nkjín chjota xi tsín majinle kʼianga tokʼoaʼmilee nga koa̱n koakoyalee Énle Niná ya niʼyale. Tsakui nichxin tjíokʼa xi kʼoasʼin síkjaʼaitsjen nga nʼio tse nichxin kʼoayale nga skótʼaya kʼoa tsa maije̱ nga tjínnele nga testigole Jeobá koa̱n. Kuinga ngisa ndasíni nga ñaki koakochoyalee josʼin ʼmiyaa Énle Niná ʼndele nga tokʼoakʼuínlee tsa mele nga koakoyalee. Koaan tojngo jao minuto si̱chjén nga koakolee je chjota nga nʼio choa ñʼai tíjna kʼoa nga nʼio tse xi koa̱nle kʼiatsa skótʼaya Biblia, kʼoa koaan kʼuínyalee ninga toya jchxo xo̱ntjoale.

Jókoa̱n sʼiaan:

Xi jesi̱tiʼndaa je chjota, chjónangilee tsa makjaojinle jme xi koa̱n nichxin xi nroaján.
Kʼoakʼuínlee nga nʼio nkjín chjota xi kʼoati kui makjaojinle, kʼoa koakolee jotjín koya kjoaʼmiya faʼaitʼa je libro Jmé kjoanni xi bakóya je Biblia. Kʼoakʼuínlee nga nʼio choa ñʼai tjío je kjoaʼmiya xi faʼaitʼa libro jebi, kʼoa nga kui bakóya jmeni xi tso je Biblia tʼatsʼe nichxin xi nroaján kʼoa xi kjaʼaísanile. Kʼoa chjónangilee jñánile je kjoaʼmiya xi mele skoe̱ jotso.
Kʼoai jngolee je libro kʼoa ya koakolee je kjoaʼmiya xi kakjoejin. Kʼoakʼuínlee nga ya párrafole kjoaʼmiya jebi tsoya tʼatsʼe je kjoachjonangi xi tjíotítjon.
Chjónangilee tsa mele kʼoexkia je párrafo xi títjon. Kʼoéxkialee jme xi kjonangi je párrafo kʼoa cho̱bayañá xi tʼatsʼe jebi. Kuijnyísjee je testo xi faʼaijin ya párrafo xi kui tínchja̱ni jme xi tibixoán. Koakolee ya libroná josʼin kjindiaanginá jme xi kjonangi je párrafo.
Kʼianga kʼoéxkialee jme xi kjonangi je párrafo xi fisani, kʼoakʼuínlee nga kui kʼoakatatso josʼin majinle ʼndele nga tokʼoexkia jmeni xi kuitso.
Kʼoakʼuínlee je chjota nga nda kasʼín nga kakotʼaya, kʼoa chjónangilee kʼiáni koa̱n kuichochon ijngokʼalee nga si̱kjetʼaa je kjoaʼmiya xi kachotʼayá.
Kʼiatsa skénndiaa, koakolee je video xi Jósʼin ʼmiyalaijin Biblia je chjota ʼmi xi faʼaitʼa ya jw.org.

I̱ tʼiain sá jebi:

Tijélai je Jeobá nga katabasenkaoli nga so̱koli jngo chjota xi kʼoailai estudio (Filip. 2:13).
Kʼianga ʼmiyasuin, takochoyalai ninga tojngo chjota josʼin bakoyaa je Biblia kao je libro Jmé kjoanni xi bakóya je Biblia, kʼoa tsa maije̱ kui takolai je video xi Jósʼin ʼmiyalaijin Biblia je chjota ʼmi.