Si̱chjén je foyeto Énnda chjotse nga koakoyaa

1. Jósʼin kisʼenda je foyeto Énnda chjotse.

¹ Tojosʼin tsaʼyaa je kjoaʼmiya xi jaʼaitʼa je xo̱n Xá xi nʼia tʼatsʼe Niná xi tsʼe sá julio, je foyeto Énnda chjotse xi tʼatsʼe Niná tínroani kui xi nʼio nichjén kʼianga ʼmiyalee Énle Niná je chjota. Je testo xi tjíotʼa foyeto jebi kui xá tjíotʼani nga ñaki ya Biblia katabʼéxkiani je chjota xi tiʼmiyalee kʼoa kuinga tsín ya faʼaitʼani jotso. Jotjín koya xo̱n xi kjioná me ngayeje nga kʼoasʼin tjíonda nga koa̱n nga toje skótʼaya je chjota. Tonga je foyeto jebi kʼoasʼin kisʼenda nga ñá kuinyakoaa je chjota nga skótʼaya. Kʼiatsa jngo chjota kʼoailee je foyeto jebi, kʼoénelee yaoná nga kʼoakʼuínlee josʼin bʼé estudio kao xo̱n jebi kʼoa kʼoasʼin skoe̱ni jokji kjoatsjoa tjenkao nga ʼyaa je énnda chjotse xi tʼatsʼe Niná tínroani (Mat. 13:44).

2. Jósʼin koa̱n si̱chjén je foyeto Énnda chjotse kʼianga tosʼa títjon kuichochonlee je chjota.

² Nga tosʼa títjon bichochonlee. Koaan i̱ kuixoán: “Jmeni xi sʼejinná nga noʼyalee je noticia, nʼio nkjín chjota xi síkjáojin jokoa̱nchon nichxin xi nroaján. Jósingái ji, a kuichoka nichxin nga chan ndasʼin kuiyoaa. [Tʼaiʼndelai chjota nga katanchja̱.] Jmeni xi tso je Biblia tsjoáná kjoachoya. Je foyeto jebi faʼaitʼa kʼa jmeni xi bakóya je Biblia”. Kʼoai jngolee foyeto je chjota kʼoa kʼoakʼuínlee nga katakjoéjin jngo kjoachjonangi xi faʼaitʼa ya jto̱n yátsʼi̱n foyeto. Koakoyalee josʼin bʼé estudio kao xo̱n jebi kʼoa kui si̱chjén je párrafo xi títjon jñani tsoya tʼatsʼe kjoachjonangi xi kakjoejin. Ijngo koya jokoa̱n sʼiaan: koakoyalee josʼin basenkaoná je foyeto jebi nga ya Biblia masjaitʼaná xi tʼatsʼe kjoachjonangi xi ñá kachjoejiaan. Kʼiatsa tíjna jngo video ya jw.org xi mangóson kjoaʼmiya jebi koaan kui si̱chjén kʼianga chja̱koaa je chjota.

3. Kʼoasi jósʼin koa̱n kʼoee estudio kao je foyeto Énnda chjotse.

³ Jósʼin si̱chjén kʼianga kʼoee estudio. Xi títjon, kʼoéxkialee je kjoachjonangi xi número tjíotʼale xi jmasí kjoan ánsíni nga kui kuenta sʼinni je chjota jme xi tínchja̱ni. Xi majaoni, kʼoéxkialee je párrafo. Xi majanni, kʼoéxkialee je testo xi cursiva kjoan kʼoa koatiolee kjoachjonangi xi kjaʼaínile ánsíni nga tikui testo sichjénni je chjota nga kʼoakuitso xi tʼatsʼe je kjoachjonangi xi jma kjoan. Xi mañoni, kʼiatsa nkjín párrafo faʼaitʼa xi tikuini kjoachjonangi, koaan tikui si̱chjénñá jotso xi majaoni kao xi majanni. Kʼiatsa tíjna jngo video xi kui bakóya tʼatsʼe kjoachjonangi xi tichotʼayá kʼoa kje bakojinlee, koaan kʼia koakolee nga kʼoailee estudio. Kʼoa xi maʼaonni, chjónangi ijngokʼalee je chjota xi tʼatsʼe kjoachjonangi nga kʼoakatatso ijngokʼa josʼin tsoyanile, nga̱ kʼoasʼin jchañá tsa kamajinle.

4. Jméni xi koasenkaoná nga sa nda sa nda si̱chjén je foyeto Énnda chjotse.

⁴ Chótʼayajiaan je foyeto Énnda chjotse ánsíni nga nda jchasíñá kʼoa si̱chjénntsjé kʼiani nga skénndiaa. Tongini nga kjesa mangínkʼaijián estudio, si̱kjaʼaitsjeen je chjota xi tiʼmiyalee kʼoa jósʼin si̱chjén je testo xi faʼaitʼa ya kjoaʼmiya nga si̱choyalee je chjota jme xi tínchja̱ni (Prov. 15:28; Hech. 17:2, 3). Kʼianga sa nda sa nda koa̱nná josʼin si̱chjén foyeto jebi, ngisa koa̱nmená si̱chjén nga koakoyalee je Énle Niná je chjota.