ʼYáni xi kʼoatjíosʼín ndʼaibi josʼin mele Jeobá
Foyeto jebi kui xá kisʼendani nga kuinyakao je chjota xi tiʼmiyalee Biblia nga kjoaʼasʼenjin naxinandále Niná
1. Jmé xá kisʼendani je foyeto xi ʼmi Josʼin mele Jeobá.
1 A jetinichjén je foyeto ʼYáni xi kʼoatjíosʼín ndʼaibi josʼin mele Jeobá xi chriansʼaná kitjo. Xo̱n jebi kui xá kisʼendani nga kuinyakao je chjota xi tiʼmiyalee Biblia: 1) nga ngisa nda katabená xi testigole Jeobá maa; 2) nga ngisa nda katabe jme xá xi tinʼia; kʼoa 3) nga ngisa nda katabe josʼin tinixájtián ngatsʼiaa. Je foyeto xi ʼmi Josʼin mele Jeobá tojngo pájina faʼaitʼa nga jngó jngó kjoaʼmiya. Kʼianga jekoa̱n chótʼayá nga ñandia ñandia kao je chjota xi bʼailee estudio koaan tsa aon kʼoa tsa te minuto kʼuínyalee nga jngo kjoaʼmiya.
2. Kʼoalasi jméni xi faʼaitʼa je foyeto xi ʼmi Josʼin mele Jeobá.
2 Je xi faʼaitʼa foyeto jebi. Je foyeto jebi kui bakóya nga jan koya jebi: jñá kitje̱nni je testigole Jeobá, jmé xá xi nʼia kʼoa jósʼin tiyojtián. Nga kanjin kjoaʼmiya xi faʼaitʼa tjín xi kjonangi kʼoa tiyaa tsoyani jñani ngisa jma kjoan letrale. Nʼio nkjín foto faʼaitʼa xi tsʼato ñachante naxinandá bakó kʼoa tiyaa kʼoatsoni jñani kitjosje. Jebi kui bakó nga tiyoñá jngo tjíjtsa Sonʼnde. Kʼoati nkjín rekuadro faʼaitʼa xi ʼmi “Tsa mesali jchai”, kʼoa kui kʼoatsole je chjota xi tiʼmiyalee jmeni xi koa̱n sʼin.
3. Jósʼin si̱chjén foyeto jebi kʼianga kʼuínyalee je chjota xi bʼailee estudio.
3 Jósʼin si̱chjén foyeto jebi. Títjon kjoanla kui kʼoakʼuínlee je chjota xi tiʼmiyalee je jaʼaínle kjoaʼmiya xi chótʼayá. Kʼianga koa̱nxkia je párrafo nda si̱choyalee jotso je letra xi ngisa jma kjoan. Kʼoa xijekoa̱n chótʼayá, kʼia si̱katíolee je kjoachjonangi xi tjío ngitsʼin ánni nga jchasíñá tsa kamajinle. Koaan tsa títjon kjoanla sʼe̱xkia ngakjijngo kjoaʼmiya kʼoa kʼia cho̱bayañá kao je chjota, kʼoa kʼoati koa̱n tsa choa choa sʼe̱xkia. Ndakjoan chjoéjiaan je testo xi kʼoéxkiaa. Kʼoa kʼuínyakaonilee je sén xi faʼaitʼa kʼoa kao rekuadro xi ʼmi “Tsa mesali jchai”. Ngisa nda nga kʼuínya chʼin chʼinlee je kjoaʼmiya xi faʼaitʼa. Tonga sakʼoa machjén nga kui kʼuínyalee tsa jngo kjoaʼmiya xi skan faʼaitʼa. Tobʼelañá, kʼiatsa jngo kjoajtíntse jemachrianle koaan ya kʼuínyalee ya kjoaʼmiya 11.
4. Ánni nga nʼio tsjoa maniná nga kitjo je foyeto Josʼin mele Jeobá.
4 Kʼianga bʼailee estudio je chjota binyakaoñá nga katabe je Nʼainá xi tíjna ngʼajmi. Tonga kʼoati machjén nga kʼuínyalee xi tʼatsʼe naxinandále Niná (Prov. 6:20). A tsí nʼio tsjoa maná nga kitjo je foyeto Josʼin mele Jeobá xi koa̱n si̱chjén nga kuinyakoaa je chjota xi tiʼmiyalee nga katabe je naxinandále Niná.