Nga chótʼaya je foyeto ʼYáni xi kʼoatjíosʼín ndʼaibi josʼin mele Jeobá
1. Kʼiáni chótʼayá je foyeto chjotse xi Josʼin mele Jeobá ʼmi, kʼoa jósʼin koasenkaoná nga kʼoasʼin chótʼayá.
1 Fitsʼiakjoanni xomana 28 sá octubre, kʼianga sʼe̱jna je kjoajtín Nga chotʼaya Biblia kui chótʼayá je foyeto chjotse xi ʼmi ʼYáni xi kʼoatjíosʼín ndʼaibi josʼin mele Jeobá, xi kʼia kitjo nga kisʼejna je kjoajtíntse xi jan nichxin xi “Si̱kuindaa je ni̱ma̱ná” tsakʼin. Xo̱n jebi kui xá kisʼendani nga kuinyakoaa je chjota xi tiʼmiyalee nga katabe je naxinandále Niná. Nga chótʼayajiaan koasenkaoná nga ngisa chjí jchatokoán je kjoanda xi tjínná nga i̱ tiyojiaan naxinandále Jeobá. Kʼoati ngisa nda jchaa josʼin ni̱chjén je foyeto jebi kʼianga ʼmiyasoán (Sal. 48:13).
2. Jósʼin chótʼayá je foyeto chjotse ya jinjtín.
2 Jósʼin chótʼayá. Je foyeto jebi kanjin kjoaʼmiya tjínle. Je ndsʼee xi koandiaa, tjínnele nda skósonnile jokji tse chótʼaya nga jngó jngó kjoaʼmiya. Kʼianga kʼoetsʼiakaoni nga jngó jngó kjoaʼmiya kui títjon kʼoakuitso je jaʼaínle kjoaʼmiya. Kʼianga jekoa̱nxkia je párrafo xi fitsʼiani, jngo kjoachjonangi sikʼéjna xi toje kʼoejnanda. Xijekoa̱n, tsen tsen chótʼaya je párrafo xi ngisa jma kjoan letra xi fitsʼiani, kʼoa je ndsʼee xi koandiaa kui skónangi jósʼin bakóya je párrafo xi kamaxkia jmeni xi kjonangi je jaʼaínle kjoaʼmiya. Koaan tjoéjin kʼa testo xi koa̱nxkia. Je foyeto jebi nʼio nkjín sén faʼaitʼa xi koa̱n sikʼaxki̱ je xi tjíobasen kʼianga tsjoá énle. Nga kjesa faʼakaojin je kjoaʼmiya xi fini, je ndsʼee xi tíbándiaa ijngokʼa skónangile jmeni xi kamajinle je xi tjíobasen kʼoa kui sichjén je kjoachjonangi xi tjío ngitsʼin pájina. Kʼoa tsakui faʼaitʼa je rekuadro xi “Tsa mesali jchai” ʼmi, kʼoakuitsole je xi tíbʼéxkia nga kʼoati katabʼéxkia rekuadro jebi. Kʼoa skónangile je xi tjíobasen jósʼin koasenkao jngo chjota xi tosʼa tíkotʼaya tsa kʼoasʼin jmeni xi tso je rekuadro. Kʼoa nga jekoa̱n chótʼaya jotjín kjoaʼmiya kabʼakaole, je ndsʼee xi tíbándiaa koaan ijngokʼa skónangi kʼiatsa tsjoása nichxin jotso je jaʼaínle nga jngó jngó kjoaʼmiya xi kachotʼaya. Kuenta sʼiaan nga tsín tjínnele kʼoatisʼin kʼuínyalee je chjota xi ʼmiyalee Biblia.
3. Jméni xi sʼiaan kʼianga ñaki nda koa̱njinná nga chótʼayá je foyeto chjotse.
3 Nga ñaki nda koa̱njinná kʼianga chótʼayá foyeto jebi ya jinjtín, tjínnele tongini nda kuiyondaa kʼoa kʼoee énná. Kʼoa si̱kjaʼaitsjeen jósʼin koasenkao je xi ʼmiyalee Biblia. Kʼianga kʼoasʼin chótʼayá foyeto jebi koasenkaoná josʼin kuinyakoaa je chjota xi ʼmiyalee Biblia nga kʼoakatasʼín josʼin mele Niná kʼoa nga koa̱n koatio ngantsjai nichxin (1 Juan 2:17).