Énnda chjotse xi tʼatsʼe Niná tínroani
Foyeto jebi kui xá kisʼendani nga kuinyakaoná kʼianga kjuinchón ijngokʼalee chjota kʼoa nga kʼoétsʼiakoaa estudio
1. Jóʼmi je foyeto xi kitjo nga kisʼejna kjoajtíntse xi “Si̱kuindaa je ni̱ma̱ná” tsakʼin, xi koasenkaoná kʼianga kjuinchón ijngokʼalee je chjota kʼoa nga koa̱n kʼoétsʼiakoaa estudio.
1 Kʼianga kisʼejna je kjoajtíntse xi jan nichxin xi “Si̱kuindaa je ni̱ma̱ná” tsakʼin, nʼio tsjoa kisatio tokoán nga kitjo je foyeto xi ʼmi Énnda chjotse xi tʼatsʼe Niná tínroani. Xo̱n jebi nʼio nda koa̱nchjénná kʼianga kjuinchón ijngokʼalee je chjota kʼoa nga koa̱n kʼoétsʼiakoaa estudio. Kui sʼe̱jnayangajaole je foyeto Jméni xi síjéná Niná kʼoa kʼoati tochoa én nya nga jngó jngó kjoaʼmiya xi faʼaitʼa. Kʼoati nʼio nda koa̱nchjénná nga kʼoétsʼiakoaa estudio ninga toya jchxo xo̱ntjoale chjota. Jméni xi tsín mangóson je foyeto Énnda chjotse kao Jméni xi síjéná Niná. Je foyeto Jméni xi síjéná Niná kui nʼio kinchja̱ni tʼatsʼe kjoatéxomale Niná, kʼoa je chjota xi tsakʼinyalee sakʼoa ñʼai koanle nga koankjainle. Kʼoa je foyeto chjotse kui nchja̱ni tʼatsʼe énnda chjotse xi nya ya Biblia (Hech. 15:35).
2. Ánni nga kitjosíni je foyeto Énnda chjotse.
2 Ánni nga kui foyeto chjotse jebi kitjosíni. Kuinga nʼio nkjín ndsʼee xi tjío jngo tjíjtsa Sonʼnde xi kʼoasʼin kisijé nga jngo xo̱n katabitjo xi tochoa ñʼai sʼin bakóya Énle Niná, xi sasa koa̱nndosinnile chjota kʼoa xi koasenkao nga koa̱nmele skótʼaya je libro Jmé kjoanni xi bakóya je Biblia, nga̱ kui je xi ngisa nichjén nga ʼmiyalee chjota. Nga̱ nʼio nkjín chjota xi likui kotʼaya kʼianga jngo libro bakolee, tonga kotʼaya tsa jngo xo̱n xi ngisa xjoe kji koakolee. Kʼoa ngisa choa ñʼai ma nga nkjín én faʼatoya.
3. Ánni nga tsín mangósonsíni foyeto jebi kao xo̱n xi ngikʼa.
3 Je xi faʼaitʼa foyeto jebi. Me ngayeje xo̱n xi nichjén nga ʼmiyalee chjota xi kʼoasʼin kisʼenda nga koa̱n ninga toje skótʼaya je chjota nga koa̱njinle jotjínni énle Niná. Tonga foyeto chjotse jebi alikui mangóson kao xo̱n xi ngikʼa, machjénní nga ñá kuinyakoaa je chjota nga skótʼaya. Kʼianga kjoáyolee chjota tongisa nda tsa kʼuínyalee tsa jngo kʼoa tsa jao párrafo. Kʼoa nga tochoa én faʼaitʼa nga jngó jngó párrafo koaan ninga ya jchxo xo̱ntjoale kʼuínyalee kʼoa tsa ya jñani síxá. Ninga koa̱n kui si̱chjén je kjoaʼmiya xi títjon nga kʼoétsʼiakao jngoaa estudio, kʼoati koa̱n si̱chjén tojñanile kjoaʼmiya xi ngikʼa.
4. Jósʼin koasenkaoná foyeto jebi nga ñaki ya Biblia kʼuínyanilee chjota.
4 Nkjín xo̱n xi nichjén nga ʼmiyalee chjota xi tiya bakóyani je kjoachjonangi xi faʼaitʼa nga jngó jngó párrafo. Tonga je kjoachjonangi xi faʼaitʼa foyeto jebi yaa bakóya je testo xi faʼaitʼa, kʼoa me tokʼa testo xi ya tjítʼa jotso. Ánni. Kuinga je chjota ngisa sasénle nga ñaki ya Biblia sʼexkianile tikʼoajinni nga tokui ʼmiyalee je xo̱n xi kjioná. Tongisa nda tsa ñaki ya Biblia katasʼexkiani je testo xi tjíotʼa. Kʼoasʼin skoe̱ni chjota nga ñaki énle Ninání xi tíʼmiyale (Juan 6:45).
5. Ánni nga nʼio machjénsíni nga tongini kuiyondaa nga ñandia ñandia kjuinkʼinyalee jngo chjota.
5 Foyeto jebi kʼoati likui bakóya josʼin tsoyanile ngayeje testo xi faʼaitʼa. Ánni. Kuinga tosa je katakjonangi chjota jñani xi tsín majinle kʼoa nga je xíngiaa xi jetsoyason katasíkjaʼaitsjen josʼin kuitsoyale. Nʼio machjén nga tongini kuiyondaa nga ñandia ñandia kjuinkʼinyalee jngo chjota. Alikui koa̱n nga toñá kuinókjoaa ningalani nʼio tsjoachaa nga bakoyaa josʼin tsoyanile je testo. Tongisa nda nga je xi tiʼmiyalee kʼoakatatso josʼin kjimajinle. Kʼiatsa nda si̱kjaʼaitsjeen jotso xi chjónangilee je chjota, bijbi koa̱njinnile jotjínni énle Niná (Hech. 17:2, TNM).
6. Jósʼin si̱chjén foyeto jebi 1) kʼiatsa je jtsaojiaan chjota xi tsín makjainle tʼatsʼe Niná kʼoa tʼatsʼe Biblia, 2) kʼiatsa xki̱ niʼya kʼuínyasoán, 3) kʼiatsa kʼoakʼuín ndi̱to̱nlee chjota tsa mele skótʼaya, 4) kʼiatsa jngo chjota timangínchon ijngokʼalee.
6 Foyeto jebi kʼoati koa̱n kjoáyolee chjota ninga tsínkui kjimaxákao nga kui sá, tojo nikoaa je xo̱n xi ngikʼa xi fayolee chjota. Tsakui nichxin, tjío xíngiaa xi jetsoyason xi tosa skónangi ndi̱to̱nle chjota kʼianga kuicho ya jchxo xo̱ntjoale tsa mele skótʼaya. Kʼoa tojo tsakʼinná ya kjoajtíntse xi kisʼejnaná, “je foyeto jebi nʼio basenkaoná nga chjakaonajmiá je chjota xi mangínchon ijngokʼalee” (chótʼai rekuadrole pájina 7-9).
7. Jósʼin si̱chjén je foyeto chjotse nga kʼoee estudio.
7 Jósʼin si̱chjén foyeto jebi nga kʼoee estudio. Kʼoéxkialee je kjoachjonangi xi número tíjnatʼale kʼoa kao párrafole. Xijekoa̱n, kʼia kjoásjee je testo xi cursiva kjoan letrale kʼoa kʼia chjónangilee xi tʼatsʼe testo jebi ánni nga nda koa̱njinsínile jme xi tínchja̱ni. Kʼoa nga kjesa bitjakaojián je kjoachjonangi xi fisani, koaan chjónangi ijngokʼalee tʼatsʼe xi jekaʼmiyalee ánni nga jchasíñá tsa kamajinle. Kʼiatsa tosʼa jngo jao kʼa tiʼmiyalee je chjota koaan tsa to jngo kʼoa tsa to jao kjoachjonangi kʼuínyalee. Kʼoa xijekoa̱n, koaan sa tse sa tse kʼuínyalee josaʼnda nga toñandia kʼuínyalee ngakjijngo kjoaʼmiya.
8. Jméni xi nʼio kuenta sʼiaan kʼianga jngo testo xi tsʼe Biblia kʼoéxkiaa.
8 Je testo xi i̱ tso én tjíotʼale tʼexkiai kui bakóya je kjoachjonangi xi ngisasí jma kjoan letrale. Kʼianga kʼoéxkiaa je testo xi tsʼe Biblia tongisa nda nga tsín i̱ kuixoán “kʼoéxkiala jokitso pastro Pablo”, “itso je én xi kiski Jeremías”. Kʼiatsa kʼoakuixoán kʼoajinsʼin koa̱njinle je xi tiʼmiyalee nga to énle chjota tibakoyalee. Tongisa nda nga i̱ kuixoán “kuitsoni je Énle Niná”, “kuitsoni je én xi tongini kisʼetʼa ya Biblia”.
9. A tjínnele sʼe̱xkiaa ngayeje testo xi nroatʼa párrafo.
9 A tjínnele sʼe̱xkiaa ngayeje testo xi nroatʼa párrafo, axo tokui jña “tʼexkiai” tso. Nga jngó jngó testo xi faʼaitʼa nʼio chjíle jmeni xi bakóya, ali tsa tokuijin nga ya faʼaitʼani nga kui tsoya jme xi tínchja̱ni je párrafo. Tonga tsa tsín nanda maʼale je chjota xi tiʼmiyalee kʼoa tsa tsín nʼio mandosinle kʼoa tsa tsín nanda male bʼéxkia koaan nga tokui kʼoéxkialee je testo xi faʼaitʼa ya jñani “tʼexkiai” tso.
10. Kʼiáni nga jekoa̱n kʼuínyalee je libro Jmé kjoanni xi bakóya je Biblia je chjota xi tiʼmiyalee.
10 Kʼiáni nga jekoa̱n kʼuínyalee je libro Jmé kjoanni xi bakóya je Biblia. Kʼianí tsa jentsjaintsjai tíkotʼaya je chjota, kʼoa tsamaije̱ tosa kʼuínyalee saʼnda nga si̱kjetʼaa je foyeto Énnda chjotse. Tonga ñá xi kuixónñá kʼiáni si̱kʼantjaiyaa je xo̱n xi kʼuínyalee. A tjínnele nga ya kjoaʼmiya jngo kʼoétsʼiakaoñá tsa jekui libro kʼuínyalee. Je xi kuenta sʼiaan jéní je chjota xi tiʼmiyalee. Tochale tsa ngisa skénndiaale tsa kuikjoanla kʼuínyalee je kjoaʼmiya xi ngisa machjén nga katamajinle.
11. Ánni nga kʼoénesínilee yaoná nga nda si̱chjén je foyeto chjotse.
11 Nichxin xi tiyoaa ndʼaibi nʼio tse kjoa tísʼe kʼoa ñaki tokui nʼio tíbʼaxki̱ ngakjijnda. Tonga ñá jngo kjoanda tjínná nga kui fajinkoaan chjota je én xi nʼio nda tso, nga̱ jetíbatéxoma je Gobiernole Niná kʼoa nga jeme sindachon sonʼnde (Mat. 24:14; 2 Ped. 3:13). Je chjota xi kjuinrʼoé énnda chjotse jebi kʼoati sijngo jta̱le nga i̱ kuitso: “Ali tokʼoa naskásʼin matsen ndso̱ko̱ ya sonnindo je chjota xi énnda chjotse yʼa, xi tʼatsʼe kjoanyʼán títsoyason, xi kui títsoyason tʼatsʼe xi nʼio ndatjín, xi kjoabitjontjai títsoyason, xi i̱ tsole je Sión: “Jé Nináli xi rey kama” (Is. 52:7). Kʼoénelee yaoná nga nda si̱chjén foyeto chjotse jebi nga kjoájinkoaan énnda chjotse xi tʼatsʼe Niná tínroani je chjota xi bao xi fatile énle Niná.
[Rekuadrole pájina 7]
Kʼiatsa je jtsaojiaan chjota xi tsín makjainle tʼatsʼe Niná kʼoa tʼatsʼe Biblia
● Tjínkʼa ʼnde jñani likui makjainle je chjota xi tʼatsʼe Niná kʼoa xi tʼatsʼe Biblia. Jméni xi sʼiaan kʼianga kʼoasʼin bʼasjengi chjota je Énle Niná. Koaan tsakui títjon chja̱kaoñá jme kjoa xi tjín ya ʼndele, jolani kʼianga tsín nda batéxoma je chjotaxá, jñani so̱koná kjoafaʼaitsjen nga nda kuiyoaa ya yaniʼya kʼoa jmeni xi koa̱n nichxin xi nroaján. Koaan kʼia si̱kájnalee chjota je foyeto Énnda chjotse kʼiatsa jenkjín kʼa kachjakaonajmiá kʼoa tsa jekabakolee nga tíjna je Niná kʼoa nga koa̱n koa̱nkjainná jotso Énle.
[Rekuadrole pájina 8]
Kʼiatsa xki̱ niʼya kʼuínyasoán
● “Nʼio nkjín chjota xi kjonangile yaole jméni xi sikao Niná je chjotasonʼnde nichxin xi nroaján kʼoa matsjoana nga xínyale jósʼin jchani xi tʼatsʼe jebi. Tobʼelañá, a chan kjoaʼaxin Niná je kjoañʼai xi tjín i̱ Sonʼnde. [Tʼaiʼndelai chjota nga katanchja̱.] Xo̱n jebi koasenkaoli nga kjoásjaijin ya Bibliali xi tʼatsʼe jebi. [Tʼailai je foyeto, tʼexkialai párrafo xi fitsʼiani kjoaʼmiya 1 kao 1 Timoteo 6:19.] Tojosí tso je én xi jekabʼexkiaa, a tsí kjoaixi nga Niná mele nga ndasʼin kuiyoaa nichxin xi nroaján. [Tʼaiʼndelai chjota nga katanchja̱.] Koaan sikájnale xo̱n jebi kʼoa kʼianga kjoeʼe̱ngáña kʼiala chótʼayangáñá jotso párrafo xi majaoni jña kui tínchja̱ni jósʼin kjoaʼaxin je Niná jmeni xi kjoañʼai síkjaʼáná ndʼaibi.” Kʼiatsa mesale skótʼaya je chjota koaan kʼuínyasalai je párrafo xi majaoni kao nga jan testo xi faʼaitʼa. Kʼoatʼinlai kʼiani kʼuínchonngánilai nga chótʼayao je kjoachjonangi xi fisani kao párrafole.
● “A tsí kjoaixi nga tjín xíngiaa xi nʼio bʼétsʼoale je Niná, kʼoa ngisa kʼianga kjoa tjínle. [Tʼaiʼndelai chjota nga katanchja̱.] Tonga a nrʼoéle Niná je kjoabʼetsʼoa xi batío ngatsʼi chjota. [Tʼaiʼndelai chjota nga katanchja̱.] Jngo xo̱n yʼa xi kui bakóya jñani kʼoatso je Biblia xi tʼatsʼe jebi. [Tʼailai je foyeto kʼoa tʼinyalai je párrafo xi fitsʼiani kjoaʼmiya 12 kao testo jñasíni “tʼexkiai” tso.] Nʼio tsjoa maná kʼianga kʼoatsoná je Niná nga koa̱n kʼoétsʼoalee. Tonga tsa mená nga ñaki kʼoakjoansʼin kʼoétsʼoalee Niná josʼin mele, tjínnele jchaa ʼyákjoanni je Niná. [Takolai kjoachjonangi xi número tjíotʼale ya kjoaʼmiya 2.] Koaan sikájnale xo̱n jebi kʼoa skan kjoaʼaikonngánile nga chótʼayá xi tʼatsʼe kjoachjonangi jebi.”
● “I tinixatʼa ngotjolaijin, nga̱ ʼyaníjin nga nʼio nkjín xíngiaa xi kui síkjaojin jmeni xi koa̱n nichxin xi nroaján. Jósi ngái ji, a chan ndasʼin kuiyoñá tsokʼoa. [Tʼaiʼndelai chjota nga katanchja̱.] A ʼyaní kʼianga nʼio nda tso je énnda chjotse xi faʼaitʼa ya Biblia xi ñaki nda bʼé tokoán kʼoa xi tsjoáná kjoachoya. Kui kʼa jebi xi bakóya ya Biblia.” Tʼailai je foyeto kʼoa kʼoatʼinlai nga katafaʼájin jngo kjoachjonangi xi faʼaitʼa jto̱n yátsʼi̱n. Kʼoa xijekoa̱n, takolai je kjoaʼmiya xi kui tínchja̱ni je kjoachjonangi xi kakjoejin kʼoa tʼinyalai jósʼin chotʼaya. Kʼoatʼinlai kʼiani kʼuínchonngánilai nga chótʼayao je kjoachjonangi xi fisani.
[Rekuadrole pájina 9]
Kʼiatsa kʼoakʼuín ndi̱to̱nlee chjota tsa mele skótʼaya
● “I tinixatʼa ngotjuijin xíngiaa nga tiʼmiyalaijin jósʼin koa̱n skótʼaya Biblia kao xo̱n jebi. Xjaʼaon kjoaʼmiya faʼaitʼa xi kui bakóya jñáni koa̱nsjaitʼaná ya Biblia tʼatsʼe kjoachjonangi xi nroatʼa ibi. [Takolai je portadale foyeto kʼoa kao jto̱n yátsʼi̱n.] A sakʼoa bʼexkiai Biblia kʼoa tsín majinli jmeni xi tso. [Tʼaiʼndelai chjota nga katanchja̱.] Koakolale nga nʼio choa ñʼai josʼin chotʼayá nga jngó jngó kjoaʼmiya xi nroatʼa xo̱n jebi. [Tjasjai ya kjoaʼmiya 3 kʼoa tʼinyalai párrafo xi fitsʼiani je kjoachjonangi xi majanni, kʼoa tʼexkialai Apocalipsis 21:4, 5. Kʼoati koa̱n kʼoéxkialai párrafo xi ijngo kʼoa kao testo xi faʼaitʼa.] Koaan sikájnale xo̱n jebi. Jngola kjoaʼmiya chótʼayá xi ngindia kʼoa ya kʼoétsʼiakaoñá je kjoaʼmiya xi fitsʼiani. Kʼiatsa sa̱sénli josʼin chótʼayá koaan tosi tonda kjoeʼe̱xinyale.”
[Rekuadrole pájina 9]
Kʼiatsa jngo chjota timangínchon ijngokʼalee
● “Matsjoana nga kajin ijngokʼá. Jngo xo̱n yʼale xi kui bakóya tʼatsʼe xi nʼio chjonangilee yaoná, kʼoa yaa Biblia bʼangini. [Tʼailai je foyeto kʼoa kʼoatʼinlai nga ya katakotsenle jme xi faʼaitʼa jto̱n yátsʼi̱n.] Jñánile kjoaʼmiya xi faʼaitʼa ibi xi ngisa meli jchai. [Ya takolai je kjoaʼmiya xi skoéjin.] Koakolale josʼin chotʼayá xo̱n jebi kʼianga jchaa jotso Biblia xi tʼatsʼe kjoachjonangi jebi.” Jngo kʼoa tsa jao párrafo tʼinyalai xi tsʼe kjoaʼmiya xi kakjoejin kʼoa kao testo xi faʼaitʼa ánni nga skoe̱síni josʼin chotʼaya. Tsa kʼoasʼiain, jejngo estudio tibʼetsʼiakoai. Kʼianga jekʼoailai foyeto jebi, kʼoatʼinlai kʼiani kʼuínchonngánilai. Kʼianga jekʼuínyalai ngakjijngo kjoaʼmiya xi kakjoejin, koaan ya kʼuínyalai tsa ijngo kjoaʼmiya skoéjin kʼoa tsamaije̱ koaan ya tje̱n kʼoétsʼiakaoni ya kjoaʼmiya 1.