Jñánile xo̱n xi koa̱n sa̱kóyale je chjota xi tsín makjainle tʼatsʼe Niná kʼoa tʼatsʼe Biblia
1. Ánni nga tjíokʼasíni chjota xi likui sa̱sénle tsakui kʼuínyalee je libro Jmé kjoanni xi bakóya je Biblia.
1 Kʼianga choʼndale Niná koa̱n je chjota tjínnele kui skótʼaya je Biblia. Tonga tjín chjota xi kui relijión tjíojin xi tsín makjainle tʼatsʼe Cristo kʼoa likui kʼoasʼin bekon je Biblia tsa Énle Niná. Kʼoa tjínkʼa xi saʼnda tsín bexkón je Biblia kʼoa kao Niná. Kʼoa tsakui nichxin koa̱nkaile nga kui kʼuínyalee je libro Jmé kjoanni xi bakóya je Biblia. Jmé xo̱n xi síchjén kʼa ndsʼee nga bakóyale chjota jebi. Je kjoafaʼaitsjen xi chótʼaya xi fisani yaa chʼa̱ngiñá jokitso kʼa ndsʼee xi kan naxinandá tjío.
2. Jméni xi machjén nga kataʼyaa tʼatsʼe je chjota xi tsín makjainle tʼatsʼe Niná, kʼoa ánni.
2 Chjota xi tsín makjainle tʼatsʼe Niná. Kʼiatsa je sa̱téjiaan chjota xi tsín makjainle tʼatsʼe Niná, títjon kjoanla kui kataʼyaa ánni nga tsín makjainsínile. A kuinga kui makjainle tʼatsʼe evolución. A kuinga kʼoasikji kjoañʼai tjín ngakjijnda, axo kuinga tsín nda tjíosʼín je relijión xi tjín. A me kʼoasʼin sakóyale chjota ya naxinandále nga tsín Niná. Axo tsínkʼia jme kjoa tífaʼatojin kʼoa totjínjngo kon josʼin tíjna. Tjínkʼa ndsʼee xi nda fákaonajmí chjota kʼianga i̱ tsole: “A toxá tsín makjainnili tʼatsʼe Niná saʼnda nga sʼa ʼndí tisui”. Kʼianga jchaa jósʼin kʼuínyalee, títjon kjoanla kataʼyaa ánni nga tsín makjainsínile xi tʼatsʼe Niná. Kʼoa nga tínchja̱ chjota alikui koa̱n nga ñá kuinókjoachjoalee. Kʼiatsa kʼoasʼin koanngíntjenngiaa kjoafaʼaitsjen jebi jchañá jokʼuínlee kʼoa jme xo̱n xi koa̱n si̱kájnalee (Prov. 18:13).
3. Jósʼin koakoá nga ʼyaxkoán josʼin síkjaʼaitsjen chjota kʼoa kao jme xi makjainle.
3 Kʼianga chja̱kaonajmiá chjota jebi, koakoá nga ʼyaxkoán josʼin síkjaʼaitsjen. Itso kjoafaʼaitsjen xi kisikasén je sucursal xi tíjna ya Estados Unidos: “Nʼio chjíle nga kuenta nʼia nga ngatsʼi chjota tjínle ʼnde nga koa̱n skoéjin jme xi koa̱nkjainle. ʼNdele nga kui koakolee je chjota xi tichjakoaa nga tsín kʼoatjín jmeni xi tso, tosa nda nga kjoachjonangi koatiolee xi koasenkao nga tije katasíkjaʼaitsjenjinni”. Kʼoasʼín jngo ndsʼee xi superintendente viajante sʼin tísíxá, kʼianga jekʼoatso chjota josʼin síkjaʼaitsjen itso xi kjonangile: “Kʼoa a jekinikjaʼaitsjain xi tʼatsʼe jebi”. Kʼoa kʼoasʼin bʼétsʼiakaoni nga fákaonajmísa.
4. Jméni xi kuenta sʼiaan kʼiatsa je chja̱koaa je chjota xi ya tjíojin relijión xi Budismo ʼmi.
4 Me ngatsʼi chjota xi ya tjíojin relijión xi Budismo ʼmi xi tsín be tsa tíjna jngo Niná xi kisindaná. Kʼianga tsaojin chjota jebi, je ndsʼee xi tjío ya Gran Bretaña kui síchjén je foyeto xi Cómo hallar paz y felicidad duraderas ʼmi, kʼoa nʼio nda bichótsjoá. Je ndsʼee jebi títjon kjoanla kui tsoya choale xi faʼaitʼa ya pájina xi tjíotítjon kʼoa kʼiaa bakóyale ya jñani i̱ tso: “¿Existe un Creador todopoderoso?”. Kʼoa skan bakóyale ya jñani i̱ tso: “Una guía para toda la humanidad”. Kʼoa tsa bele kon nga koa̱njyole chjota, kʼiaa síkájnale je libro Jmé kjoanni xi bakóya je Biblia, kʼoa itsole: “Ningalani tsín makjainli tʼatsʼe Niná, tonga tsa chótʼayai je Biblia nʼio koasenkaoli je kjoafaʼaitsjen xi faʼaitʼa”. Kʼoa jngo precursor xi je bakóyasonle je chjota xi én chino nchja̱ xi tjío ya Estados Unidos itso: “Je chjota jebi nʼio tsjoake nga bʼéxkia xo̱n. Kʼianga bichochon ngindialaijin toje tsakʼéxkiayeje je xo̱n xi nikáyolaijin. Tonga nkjín chjota xi tsín be jósʼin koa̱n koasenkao tsa estudio kʼoailee. Kuinga tosa kui sikáyosínile je foyeto Énnda chjotse nga tosʼa fakaotítjoan, nga̱ je foyeto jebi kʼoasʼin kisʼenda nga koa̱n cho̱banajmíkoaa chjota”. Kʼoa jngo superintendente xi tsʼe circuito xi kʼoati je chjota jebi bakóyasonle ya Estados Unidos kʼoatso nga kʼoati ma nikáyolee je libro Jmé kjoanni xi bakóya je Biblia nga tosʼa kajintítjoán je chjota. Tonga kuenta sʼiaan jebi: Ngisa nda tsa ya kjoaʼmiya jao kʼoétsʼiakaoñá nga kʼuínyalee, nga̱ kui nchja̱ni xi tʼatsʼe Biblia, ʼndele nga ya kʼoétsʼiakaoñá kjoaʼmiya jngo, jña nchja̱ni xi tʼatsʼe Niná.
5. Jméni xi tjínnele nga kuenta sʼiaan.
5 Machjén nga kuenta sʼiaan nga nichxin machjénle je chjota nga koa̱nkjainle xi tʼatsʼe Niná. Tsakui nichxin likui tojngokʼa chja̱koaa kʼianga koa̱nkjainle. Tonga tsa nkjín kʼa chja̱koaa tsakuini nichxin tokʼoa koa̱nkjainle nga tíjna Niná kʼoa tsamaije̱ tokʼoa koa̱nchoyale ánni nga tjíokʼasíni je chjota xi makjainle xi tʼatsʼe Niná.
6. Ánni nga tjíokʼasíni je chjota xi tsín mandosinle xi tʼatsʼe Biblia.
6 Je chjota xi tsín makjainle kʼoa xi tsín mandosinle xi tʼatsʼe Biblia. Kʼianga ʼmiyasoán tsaojinñá je chjota xi makjainle tʼatsʼe Niná tonga xi kʼoatso nga tsín makjainle tsa tʼatsʼe Niná jaʼaini je Biblia kʼoa kuinga tsín mandosinsínile jotso je Énle Niná. Jñani nga kʼoachon yaa naxinandá jñani tsín makjainle tʼatsʼe Jesucristo, kʼoa kʼoatso nga je Biblia tsʼení je relijión xi tʼatsʼe Cristo makjainle. Kʼoa kʼoati kjima ninga ya naxinandá jñani kʼoatso nga makjainle tʼatsʼe Jesucristo. Je chjota kʼoatso nga likui josʼin basenkaoná je Énle Niná. Jósʼiaan nga katamandosinle je chjota jotso je Biblia kʼoa nga tsjoá katasíjyo nga kʼuínyalee je libro Jmé kjoanni xi bakóya je Biblia.
7. Jméni xi sʼiaan nga katamandosinle je chjota jotso je Biblia.
7 Je sucursal xi tíjna ya Grecia jngo xo̱n kisikasén xi i̱ tso: “Kʼianga koa̱n kuinyakoaa je chjota xi tsín mandosinle jotso Biblia, tongisa nda nga yakjoan bakolee jotso. Kʼoa nkjín ndsʼee xi kʼoatso nga je Énle Niná ngisa bichótsaojin ni̱ma̱le chjota tikʼoajinni tsa kjaʼaísa kuitsole (Heb. 4:12). Tjínkʼa chjota xi mandosinle jotso je Biblia ninga tokui jaʼaínle Niná bakolee jñani faʼaitʼa”. Kʼoa je sucursal xi tíjna ya India itso xo̱n xi kisikasén: “Je chjota xi ya tjíojin relijión xi Hinduismo ʼmi nʼio mandosinle jotso Biblia xi tʼatsʼe kjoabijnachon kao kjoabiya. Kʼoati nʼio sasénle nga kui ʼmiyale nga kjoaʼaxin je Niná je kjoa xi tjín, jolani nga xkoa̱ya tjío chjota xi kjaʼaí kjaʼaísʼin tsen yaole”. Kʼianga kui fákaoni je xíngiaa xi jetsoyason tʼatsʼe kjoa xi makjaojinle yaa nroani nga síjyo nga sʼexkiale Biblia kʼoa nga ʼmiyale josʼin kjoaʼaxin je Chjotaxále Niná kjoa jebi.
8. Jókʼuínlee je chjota xi chʼaosʼin síkjaʼaitsjen tʼatsʼe Biblia xi totʼatsʼe jme xi tjíosʼín je relijión xi chjotale Cristo tsole yaole.
8 Kʼiatsa je sa̱téjiaan xi chʼaosʼin síkjaʼaitsjen tʼatsʼe Biblia xi totʼatsʼe jme xi tjíosʼín je relijión xi chjotale Cristo tsole yaole, kuikjoanla si̱choyalee nga jmeni xi bakóya relijión jebi kʼoa jmeni xi sʼín kontra tíjnale jotso Biblia. Je sucursal xi tíjna ya India itso: “Sakʼoa machjén nga bakoyalee je chjota nga je Biblia ali tsa tsʼejin je relijión xi chjotale Cristo tsole yaole”. Je sucursal jebi kʼoati tso nga je chjota xi ya tjíojin relijión xi Hinduismo ʼmi, ñaki tokʼoamale nga kui sakóyale jmeni xi faʼaitʼa ya kjoaʼmiya 4 xi tsʼe foyeto ¿Qué propósito tiene la vida? ¿Cómo descubrirlo?, jñani bakóya jokisʼin kʼa relijión nga koanmele kisikitsónjin kʼoa kisicha je Énle Niná. Jngo precursor xi ya Brasil tsʼe isʼin fákao chjota: “Tjín chjota xi matsjoale kotʼaya Biblia ninga tsín jme relijión tjíojin, tokui nga mele skoe̱ jokjoan tso. Kʼoa ji kʼoati koa̱n tokʼoasʼin chótʼayai. Tochale nʼio koa̱ntsjoachai jmeni xi tso”.
9. Ánni nga tsín koa̱n tokʼoéjngosíñá tokoán ninga sakʼoa kʼoatso chjota nga tsín mandosinle jotso Biblia.
9 Je Jeobá kui kotsenle jotjío je ni̱ma̱le chjota (1 Sam. 16:7; Prov. 21:2). Kʼoa je xi ndatjío ni̱ma̱le i síkatíojin relijión xi kixi (Juan 6:44). Nʼio nkjín chjota xi saʼnda kje ʼmiyajinle tsakai xi tʼatsʼe Niná kʼoa xi tʼatsʼe Biblia. Kʼianga kʼoasʼin ʼmiyasoán joxi tichjoxʼáʼndelee nga koa̱n “kuitjontjai, kʼoa nga kuichonrʼoe xi kjoakixi” (1 Tim. 2:4). Kuinga tsín koa̱n tokʼoéjngosíñá tokoán ninga sakʼoa kʼoatso chjota nga tsín mandosinle jotso Biblia. Jotjín mani xo̱n xi kjioná kjoásje jngoaa xi koa̱nndosinle chjota. Tsakui nichxin channi bijbi koa̱njyole nga kui kʼuínyalee je libro Jmé kjoanni xi bakóya je Biblia, nga̱ kui xi ngisa nichjén nga ʼmiyalee chjota.
[Rekuadrole pájina 4]
Jósʼin kuinyakoaa je chjota xi tsín makjainle tʼatsʼe Niná
• Kʼianga jchaa ánni nga kʼoasʼin síkjaʼaitsjensíni koaan i̱ kʼuínlee: “A toxá kʼoasʼin nikjaʼaitsjenni saʼnda nga sʼa ʼndí tisui”.
• Tsa ya tíjnajin relijión xi Budismo ʼmi, koakolee je foyeto Cómo hallar paz y felicidad duraderas, pájina 9-12.
• Kʼoa tsa xi tʼatsʼe evolución makjainle, koaan kui si̱chjén jebi:
Je xi “¿Casualidad o diseño?” ʼmi xi faʼaitʼa ya ¡Despertad!
Je video Las maravillas de la creación revelan la gloria de Dios
Ya kjoaʼmiya 4 xi tsʼe foyeto Cómo lograr una vida llena de satisfacción kʼoa ¿Es la vida obra de un Creador? kʼoa kao El origen de la vida. Cinco cuestiones dignas de análisis
• Kʼiatsa kui nga tsín timakjainnile xi tʼatsʼe Niná nga kʼoasikji kjoañʼai tjín ngakjijnda, koaan kui si̱chjén jebi:
Ya kjoaʼmiya 10 xi tsʼe libro ¿Existe un Creador que se interese por nosotros?
Ya kjoaʼmiya 6 xi tsʼe foyeto ¿De veras se interesa Dios por nosotros? Kʼoa kao kjoaʼmiya 6 xi tsʼe foyeto ¿Qué propósito tiene la vida? ¿Cómo descubrirlo?
• Kʼiatsa jekjimakjain choale nga tíjna Niná koaan si̱kájnalee je libro Jmé kjoanni xi bakóya je Biblia kʼoa koaan ya kʼoétsʼiakaoñá nga kʼuínyalee ya kjoaʼmiya 2 kʼoa tsa kjaʼaísanile xi je skoéjin.
[Rekuadrole pájina 5]
Jósʼin kuinyakoaa je chjota xi tsín makjainle tʼatsʼe Biblia
• Koaan ya koakolee ya kjoaʼmiya 17 kao 18 xi tsʼe libro La vida... ¿cómo se presentó aquí? ¿Por evolución, o por creación?
• Tsa ya tíjnajin relijión xi Hinduismo ʼmi, koaan kui si̱chjén je foyeto ¿Por qué debemos adorar a Dios con amor y verdad?
• Tsa ya tíjnajin relijión xi Judaísmo ʼmi, koaan kui si̱chjén ya pájina 3-11 xi tsʼe foyeto ¿Habrá algún día un mundo sin guerra? (foyeto jebi likui tibitjoni nga én kastía).
• Kʼuínyalee josʼin basenkaoná je kjoafaʼaitsjen xi faʼaitʼa Biblia. Kʼoa koaan kui si̱chjén jebi:
Je xi “Ayuda para las familias” ʼmi xi faʼaitʼa ya ¡Despertad!
Je video La Biblia: el poder que ejerce en su vida
Ya kjoaʼmiya 9 kao 11 xi tsʼe foyeto Énnda chjotse xi tʼatsʼe Niná tínroani kʼoa kao pájina 22-26 xi tsʼe foyeto Un libro para todo el mundo (foyeto jebi likui tibitjoni nga én kastía) kʼoa ya kjoaʼmiya 2 xi tsʼe foyeto Cómo lograr una vida llena de satisfacción
Tsa ya tíjnajin relijión xi Budismo ʼmi, koaan kui si̱chjén je foyeto El camino de la paz y la felicidad, pájina 3-7
Tsa ya tíjnajin relijión xi Islam ʼmi, koaan ya koakolee ya kjoaʼmiya 3 xi tsʼe foyeto La fe verdadera, la puerta a una vida feliz
Kʼiatsa ya tiʼmiyasoán ya jñani likui ʼya xi bexkón je Biblia, tongisa nda nga tsín ndi̱to̱n kʼoéjnatsenlee nga ya Biblia chjoenilee jme xi bakoyalee
• Kʼuínya kʼalee jósʼin kitjoson je én xi tongini kinokjoa kʼoa koaan kui si̱chjén jebi:
Je video La Biblia: historia exacta, profecía confiable
Ya pájina 27-29 xi tsʼe foyeto Un libro para todo el mundo (foyeto jebi likui tibitjoni nga én kastía)
• Kʼiatsa jekjimandosin choale jotso je Biblia koaan si̱kájnalee je libro Jmé kjoanni xi bakóya je Biblia.
[Rekuadrole pájina 6]
Kʼiatsa ʼya xi kuitso: “Likui makjainna xi tʼatsʼe Niná”
• Koaan chjónangilee: “A ʼyaní jmeni xi tsakʼéjngo tokoan nga tíjna Niná kʼoa nga je kisindaná”. Koaan kui kʼuínya choalee je xi faʼaitʼa ya pájina 87-89 xi tsʼe libro Razonamiento. Kʼoati koa̱n kʼoakuínlee nga skan chʼa̱ jngolee libro xi kʼoati tsakasenkaoná.
• Koaan chjónangilee: “Kʼoa tsa tíjna Niná, jméni xi meli nga katabakó”. Kʼianga kui chjonangilee jebi je chjota nʼio nkjín xi kʼoatso nga katabakó nga tjínle kjoatsjoacha, nga tsín chjota faʼájin, nga tjínle kjoanda kʼoa kao kjoamatokon. Kʼianga jekuinóʼyalee jokuitso chjota koakolee kao Biblia jósʼin tíbakó Niná ngayeje jebi. (Tsa bele tokoán koaan koakolee kjoaʼmiya 1 xi tsʼe libro Jmé kjoanni xi bakóya je Biblia kʼoa ya tje̱n chótʼayañá ya párrafo 6.)
Kʼiatsa ʼya xi kuitso: “Likui makjainna xi tʼatsʼe Biblia”
• Koaan i̱ kʼuínlee: “Nʼio nkjín chjota xi kʼoatisʼin síkjaʼaitsjen. Tjínkʼa xi kʼoatso nga tsín mangóson jotso Biblia kʼoa jmeni xi kjimasjaile je chjota científico kʼoa tjínkʼa xi kʼoatso nga likui josʼin machjénná ndʼai. Tonga a jesa tsakʼexkiai. [Xi jekuinchja̱ chjota, koakolee jotso ya pájina 3 párrafo 1 kao 2 xi tsʼe foyeto Cómo lograr una vida llena de satisfacción.] Nga kʼoasʼin tsín nda tjíosʼín je relijión yaa nroani nga bʼasjengini Biblia je chjota. Matsjoana tsa kjaʼaí nichxin kjoaʼaikonle nga xínyale jotso foyeto jebi ya pájina 4 kao 5”.
• Kʼoa tsamaije̱ koaan i̱ kuixoán: “Nʼio nkjín chjota xi kʼoati tso. Tonga jngo testo xi tsʼe Biblia mena koakole xi nʼio tsakasenkaona an [kʼoéxkialee Job 26:7 kʼoa tsa Isaías 40:22, jñani bakó nga je Biblia ñaki mangóson kao jmeni xi tso chjota científico]. Ya Biblia kʼoati nʼio nkjín kjoafaʼaitsjen faʼaitʼa xi basenkaoná josʼin biyoaa ya yaniʼya. Matsjoana tsa kjaʼaí nichxin kjoaʼaikonle nga xínyale xi tʼatsʼe jebi”.
• Ijngosa koya jokuixoán: “Matsjoana nga kʼoasi josʼin nikjaʼaitsjain. Tonga tikjaʼaitsjenlai xi tʼatsʼe jebi: kʼiatsa jngolani libro kisikájnaná Niná, jméni xi faʼaitʼa jósi ngái ji”. Xi jekuinchja̱ je chjota, koakolee ya Biblia jmeni xi katso.