Kʼuínyalee je chjota josʼin kjuinrʼoéle Niná

1. Jóʼmi nga jao foyeto xi kitjo nga kisationá kjoajtíntse xi “Katjinroa kjoatéxomali” tsakʼin, kʼoa ánni nga nʼio ndasʼin koa̱nchjénsíni.

¹ Je Kjoajtíntse xi jan nichxin kisationá, xi “Katjinroa kjoatéxomali” tsakʼin, jao foyeto chjotse kitjo xi ʼmi: Tinóʼyalai je Niná kʼoa kuijnaní ngantsjai nichxin kʼoa kao Tinóʼyalai je Niná, xi tojngo jao én faʼaitʼa. Mani nga choa én tjítʼa nga jao xo̱n jebi, ngisa ngotjo faʼatoyani xi kjaʼaí én. Saʼnda nga tsakʼainá je foyeto Tinóʼyalai je Niná kʼoa kuijnaní ngantsjai nichxin ya kjoajtíntse xi kisʼejnaná, tokʼoa jekitjoʼnde nga ño siento kao kantejngo én kuitjo.

2. ʼYáni xi koa̱nchjénle foyeto jebi.

² ʼYáni xi koa̱nchjénle foyeto jebi, kataʼyala kʼaa:

• Jngo ndsʼee xi tosʼa tífákao títjon jngo chjota énle Niná kʼoa tsamaije̱ tosʼa ya jao kʼanile nga tífákao. Je ndsʼee jebi kʼiaa be nga likui nanda male bʼéxkia kʼoa tsamaije̱ ñaki tsín male xo̱n chjota jebi.

• Jngo ndsʼee xi ya tsoyason ya jña kjaʼaí én nchja̱ je chjota kʼoa kje tsínjin xo̱n xi kui énle faʼaitʼa kʼoa tsamaije̱ tosʼa tojngo jao tjín. Kʼoa tsamaije̱ je chjota xi ya tjín, likui male bʼéxkia je xo̱n xi énle faʼaitʼa.

• Jngo ndsʼee xi je tsoyasonle je chjota xi jtaya kʼoa to seña síchjén nga tsoyale.

• Jngo ndsʼee xi mele kuitsoyale Énle Niná je tiʼndíle xi kje majinle bʼéxkia.

3. Jmé xi faʼaitʼa je foyeto xi Tinóʼyalai je Niná ʼmi.

³ Jmé xi faʼaitʼa je foyeto chjotse. Je foyeto xi Tinóʼyalai je Niná ʼmi nʼio tojngo jao én tjínle kʼoa toya faʼaitʼa ya ngitsʼin pájina, kʼoati faʼaitʼa testole Biblia xi kui tsoyaná jme xi tínchja̱ni kjoaʼmiya xi nroatʼa pájina jebi. Ánni nga tochoa én faʼaitʼasíni foyeto jebi. Si̱kjaʼaitsjenla tsa jngo foyeto xi kjaʼaí én tjítʼa kʼoainá kʼoa toxkia nyandojon letra xi saʼnda tsín ʼyaa, a koa̱njinná jotso ninga nʼio naskákjoan je sén xi tjíotʼa. Maijin. Kʼoati ma je xíngiaa xi tsín male xo̱n, ali jonisʼin machjénle je xo̱n xi nʼio tse én tjítʼa. Kuinga tosa nʼio nkjín sén faʼaitʼasíni foyeto jebi, kʼoa nʼio nda kichosonnile jokjoan sén xi faʼaitʼa. Kʼoa nga tsín ñʼai koa̱nná josʼin kʼuínyalee chjota, jo flecha kjoan xi tjíotʼa xi bakóná je sén xi fisani.

4. Kʼoasi kʼai jme xi faʼaitʼa je foyeto xi ʼmi Tinóʼyalai je Niná kʼoa kuijnaní ngantsjai nichxin.

⁴ Je foyeto xi ʼmi Tinóʼyalai je Niná kʼoa kuijnaní ngantsjai nichxin tikuini sén faʼaitʼa xi faʼaitʼa xi ijngo. Je foyeto jebi kui xá kisʼendani kʼianga kui si̱chjén nga kʼuínyalee je chjota xi tsín nanda male xo̱n kʼoa tsa jeje̱ xi tosʼa kjimale tjíobʼéxkia. Kʼiatsa kui tinichjén je foyeto xi ijngo nga tibʼailee estudio jngo chjota koaan ñá si̱chjén je foyeto jebi ánni nga jchasíñá josʼin koakoyalee. Kʼianga jngó jngó kjoaʼmiya jao pájina faʼaitʼa. Ya jko̱ nga jngó jngó kjoaʼmiya jngo kjoachjonangi faʼaitʼa xi ya tsoya nga jao pájina. Je sén xi faʼaitʼa tjíole testo xi tsʼe Biblia kʼoa tjítʼa choa jme xi tínchja̱ni. Kʼoa nkjín rekuadro faʼaitʼa xi koa̱n si̱chjén kʼianga tjín xi tiʼmiyalee, tonga kui kjuinñá jokji machoyale chjota jebi. Jotjín rekuadro faʼaitʼa kui bakóyasa jotso Énle Niná kʼoa faʼaitʼa testo.

5. Kʼiáni nga koa̱n kjoáyolee chjota je foyeto chjotse kʼoa jókʼuínlee kʼianga kjoáyolee.

⁵ Jósʼin si̱chjén foyeto chjotse. Kʼiatsa xki̱ niʼya tiʼmiyasoán kʼoa tsa tsínkui xo̱n jebi kjimaxákao nga kui sá, tonga bele tokoán nga ngisa skénndiaa nga kui kjoáyolee jngo chjota, koaan kjoáyolee (chótʼai rekuadro xi tso: “Jókʼuínlee chjota kʼianga kjoáyolee xo̱n jebi”). Kʼianga koanngínchon ijngokʼalee je chjota koaan kʼoakʼuínlee nga tjín xi kichʼalee kʼoa kʼoailee xo̱n jebi.

6. Jósʼin si̱chjén je foyeto chjotse kʼiatsa jngo chjota tiʼmiyalee.

⁶ Mani nga tsínle kjoachjonangi je foyeto xi Tinóʼyalai je Niná ʼmi, alikui kʼoasʼin kʼuínyalee chjota jonikoaa je libro Jmé kjoanni xi bakóya je Biblia kʼianga to chjonangilee. Me ngatsʼi chjota, tojñani tsʼe, nga nʼio nda binyáño nga tjín xi sʼeyanajmíle. Kuinga tichjénsíni je sén xi faʼaitʼa xo̱n jebi kʼianga kʼoéyanajmílai jme xi bakóya je Énle Niná. Tʼinyalai jme xi tínchja̱ni je sén xi tjíotʼa. Ñaki katamatsen nga tsjoa tjínli nga tibakoyalai. Chjónangilai jósʼin síkjaʼaitsjen. Tʼexkialai je testo xi faʼaitʼa ngitsʼin pájina kʼoa tichoyalai jme xi bakóya. Tatiolai kjoachjonangi ánni nga kuinchja̱síni. Tʼinyandalai jña tsín kjimajinle. Kʼoa tsakui tibakoyalai chjota je foyeto Tinóʼyalai je Niná kʼoa kuijnaní ngantsjai nichxin, tʼexkiao je én kʼoa kao testo xi faʼaitʼa nga jngó jngó sén.

7. Jósʼin kuinyakoaa je xi ʼmiyalee Biblia nga katamajinsale Énle Niná.

⁷ Kuinyakoaa je xi tiʼmiyalee Biblia nga katamajinsale Énle Niná. Kʼianga jekʼoasʼin tiʼmiyalee chjota tsakui nichxin chan koa̱nmele skótʼaya josʼin sʼexkia ánni nga ngisa nda koa̱nsínile xi tʼatsʼe Jeobá (Mat. 5:3, NM; Juan 17:3). Kʼiatsa kui tiʼmiyalai chjota je foyeto xi Tinóʼyalai je Niná ʼmi kʼoati koa̱n chan koakoyalai josʼin sʼexkia kʼoa kui si̱chjain je foyeto xi ijngo. Tonga ninga jekjoetʼale xo̱n jebi kjesa koa̱njin koaisʼenngindá. Kʼianga koa̱n koaisʼenngindá, tjínnele skótʼaya je libro Jmé kjoanni xi bakóya je Biblia kʼoa tsa kjaʼaí libro xi ngisasa nda sichoyale jotso Énle Niná.

8. Ánni nga nʼio tsjoa masíniná nga kitjo je foyeto chjotse.

⁸ Kʼiatsa ʼyani xi mele kʼoéjna ngantsjai nichxin tjínnele nga kjuinrʼoéle je Niná (Isa. 55:3). Je Jeobá kui xi mele “nga ngatsʼi chjota” katanrʼoéle, ninga xi tsín male xo̱n (1 Tim. 2:3, 4). Nʼio tsjoa maná nga kitjo foyeto chjotse jebi xi koa̱nchjénná kʼianga kʼuínyalee chjota nga katanrʼoéle Niná.

[Rekuadrole pájina 3]

Jókʼuínlee chjota kʼianga kjoáyolee xo̱n jebi

Takolai ya pájina 2 kao 3 kʼoa i̱ tʼinlai: “A tsí matsjoali tsa i̱ chon jña kuijnai. [Tʼaiʼndelai chjota nga katanchja̱.] Je Énle Niná kʼoatso nga jeme sindachon Niná i̱ Sonʼnde kʼoa nga naskánasichon. Alikui tisʼe̱ni chʼin kʼoa aliʼya xi tima̱ koationi. Tinóʼyalai jmeni xi tjínnele sʼiaan kʼiatsa mená nga ya kuiyoaa. [Tʼexkialai én xi tjítʼa ya jko̱ pájina 3, jña tjítʼa Isaías 55:3.] Tojosí tso ibi, tjínnele nga kuinóʼyalee Niná. Tonga, a ʼyaní josʼin kuinóʼyalee je Niná”. Tjasjaijin ya pájina 4 kao 5 kʼoa tʼinyalai xi tʼatsʼe jebi. Kʼiatsa tsín ale chjota, tikájnalai je foyeto kʼoa kʼoatʼinlai jme nichxin kuichonrʼoéngáni ánni nga kʼia kʼuínyasínilai.