Koaan nda kuiyoaa: xo̱n xi si̱chjén nga kʼuínyaa je Énle Niná

Nʼio tsjoa tjío tokoán nga sʼa kitjo jngo libro kao jngo folleto xi koa̱n si̱chjén nga kʼuínyalee Biblia chjota. Si̱jélee nganʼio je Jeobá nga katabasenkaoná nga ngisasa nkjín chjota kuisenkoaa nga chjotale Cristo katama (Mt 28:18-20; 1Co 3:6-9). Jósʼin si̱chjén xo̱n jebi.

Ndʼaibi kʼoasʼin kʼuínyaa joni tsa to tichobanajmiá, kuinga machjénni nga si̱kʼantjaiyaa josʼin ʼmiyaa. Tʼintjenngi kjoafaʼaitsjen jebi nga kuijnandai kʼoa nga kʼuínyalai Biblia chjota.a

• Tʼexkiai kʼoa chótʼayajin je kjoachjonangi xi faʼaitʼa.

• Tʼexkiai je texto kʼoa tisenkoai xi tiʼmiyalai nga katamajinle jme xi tínchja̱ni je texto.

• Takui je video kʼoa tikatiui kjoachjonangi xi faʼaitʼa je libro kʼoa tsa folleto.

• Koaan tsa jngó jngó kjoaʼmiya si̱kjetʼai nga ñandia ñandia.

Kʼianga kʼuínyasuin, tsa mandosinle je chjota xi ska̱jin kui títjon folleto takolai (chótsenlai je recuadro “Jósʼin si̱chjén je folleto Koaan nda kuiyoaa nga tosʼa títjon chja̱kaonajmiá chjota” xi faʼaitʼa ya página 16). Kʼianga jekjoetʼale chjota je folleto kʼoa tsa mele tosi tonda skótʼaya, kui libro tichjain nga tʼinyalai tonga ya kjoaʼmiya ño tʼetsʼiakaoni. Tsa jetiʼmiyalai chjota kao xo̱n xi nichjén nga ʼmiyaa je Énle Niná, koaan kui tichjain je libro Koaan nda kuiyoaa nga tosi tonda tʼinyalai. Ji xi síni jñá kjoaʼmiya kʼoétsʼiakaoni.

KʼIANGA JECHÓTSENLAI JE VIDEO JOSʼIN CHÓTʼAYAI JE BIBLIA, CHÓTʼAYAJIN KJOACHJONANGI JEBI:

• Jméni xi koa̱njinle je xi Biblia tíkotʼaya kʼianga kui libro chjotse skótʼaya.

• Ánni machjénni nga kui video jebi sa̱kóle je chjota xi tosʼa tjíokotʼaya Biblia.

• Jmé xi koa̱n kʼuínlai je xi Biblia tiʼmiyalai (chótsenlai je recuadro xi faʼaitʼa ya página 16 jñani “Xi tínchja̱ni kʼoa jokoa̱n sʼin” tso).