Jósʼin si̱chjén je foyeto Tinóʼyalai je Niná

Je foyeto Tinóʼyalai je Niná kui xá kisʼendani nga koakoyalee chjota xi tsín nanda male bʼéxkia. Kʼoa je sén xi faʼaitʼa binyakao je chjota nga majinle jmeni xi tsoya je Biblia. Nga jngó jngó kjoaʼmiya jao pájina mani kʼoa nʼio nda kichosonnile jokjoan sén xi tjíotʼa, kʼoa jo flecha kjoan xi faʼaitʼa josʼin fi chʼin chʼin je sén xi nroatʼa.

Je foyeto Tinóʼyalai je Niná kʼoa kuijnaní ngantsjai nichxin tikui sén faʼaitʼani sén xi faʼaitʼa je foyeto Tinóʼyalai je Niná, tonga ngisaa tse én faʼaitʼa. Koaan kui si̱chjén foyeto jebi nga koakoyalee je chjota xi ngisa male bʼéxkia. Kʼoati ma kui nichjén nga bʼé estudio ninga kui je foyeto Tinóʼyalai je Niná síchjén je chjota xi ʼmiyalee. Tjínkʼa pájina jñani jngo rekuadro faʼaitʼa xi koa̱n si̱chjén kʼianga tjín xi tiʼmiyalee, tonga kui kjuinñá jokji machoyale chjota.

Koaan kjoáyolee chjota tojñanile nga jao foyeto jebi ninga tsínkui kjimaxákao nga kui sá. Kʼianga kʼoee estudio si̱chjén je sén xi faʼaitʼa nga koakoyaa jmeni xi tso je Biblia. Chjónangilee je chjota xi tibʼailee estudio ánni nga kuinchja̱síni kʼoa jchasíñá tsa kjimajinle. Kʼoéxkiaa kʼoa kʼuínyalee josʼin tsoyanile je testo xi tjío jña fetʼani je pájina. Kʼianga jekjoetʼale chjota nga skótʼaya ngakjijngo je foyeto koaan kui koakoyalee je libro Jmé kjoanni xi bakóya je Biblia nga kuisenkoaa nga katamataja je kjoamakjainle, ánni nga koaisʼenngindásíni.