Chjota xi kjimakjainle

◼ Australia. Je John, xi nʼio tse kjoachjine tjínle, fi tsakai nga sʼa ʼndí kji ya yo̱ngo̱. Tonga chan i̱ kitso: “Ñaki kʼoatjín tokoan nga tsín Niná”. Tonga jngo precursor kiskajin xi kui kisikájnale je foyeto ¿Es la vida obra de un Creador? kʼoa xi koanskanni kui kisikájnale je foyeto El origen de la vida. Kʼianga sa nda sa nda katamandosinle John jotjínni xi tʼatsʼe Niná, je precursor jebi xki̱ sá kikaole je rebista kʼoa kui tsakʼéyanajmí choale xi kui nchja̱ni tʼatsʼe xi kisinda Niná kʼoa kao je én xi tongini kisʼetʼa ya Biblia. Kʼianga jetsabele kon nga koa̱njyole je John, chan kui kitsjoale je libro La Biblia... ¿la Palabra de Dios, o palabra del hombre? Kʼianga jetsakʼéxkia libro jebi, je John kʼoatso nga koanʼindajin choa kjoafaʼaitsjenle, nga likui tikʼoakitsoni tsa tsín Niná. Nga koanskanni, je precursor jebi kui tsakakóle jotso je libro Jmé kjoanni xi bakóya je Biblia ya pájina 20 párrafo 8, kʼoa xijekoanni, kʼoati kitsoyale jotso ya pájina 23 kao 24 párrafo 13 saʼnda 16. Je John ñaki tokʼoakoanle jotso je testo xi ya nroatʼa kʼoa kitso: “Koaanla toskotʼayala je Biblia”.

◼ México. Jngo chjota kiskajin jngo ndsʼee xi kʼoakitsole nga tsín makjainle nga tʼatsʼe Niná jaʼaini je Biblia. Je ndsʼee kʼoakitsole tsa mele nga koako kʼale choa̱ xi tjín nga ñaki Énle Niná je Biblia. Kʼianga jenkjín kʼa tsakjáonajmí, chan kichokajin ni̱ma̱le chjota jebi jmeni xi tsakʼéxkia ya Biblia. Je xi ngisa nʼio kichokajin ni̱ma̱le kʼiaa nga tsabe jotso Biblia tʼatsʼe josʼin tjínnele koanngínkoaa yaoná. I kitsole je ndsʼee xi tsoyale: “Nga tosʼa títjon tsakʼexkianái je Biblia alikui nʼio koanndosinna, nga̱ tokʼoasʼin sikjaʼaitsjen nga toya mangóson kao jotso libro xi kjaʼaí. Tonga ndʼaibi kʼianga ʼmiyanái jotso, tsen mana jñani tsín nda tisʼian kʼoa ngisa kʼianga kui bʼexkiaa nga tjínnele tsje koanngínkoaa yaoná”.

◼ Estados Unidos. Kʼianga tjíoʼnda jngo ndsʼee kʼoa kao chjoónle ya jña ma xinyáya xo̱n, tojosʼin sa̱kóyason ya ciudadyʼai jña nʼio tjín chjota, jngo chjoón kicho xi Taiwán tsʼe, xi kʼoakitso nga makjainle xi tʼatsʼe Niná, tonga kʼoasʼin síkjaʼaitsjen nga je Biblia tsʼení je chjota xi América kao xi Europa tsʼe. Kuixó nga ya kichoni tsa koasenkaoni Biblia nga skoe̱ jme xi tsjoa kʼoee kon. Ningalaxóni lijme xi chale, tonga mexó tsa toba tjínntsjaile. Je ndsʼee kʼoa kao chjoónle, kjitʼanangi tsakʼéndajin nga kitsoyale chjoón jebi kʼoa kui kisichjén je libro Jmé kjoanni xi bakóya je Biblia kao je foyeto Cómo hallar paz y felicidad duraderas. Kʼoa ʼndele nga ya kjoaʼmiya jao xi tsʼe libro jebi kitsoyale, tosa ya kitsoyale je foyeto ya jñani i̱ tso: “Una guía para toda la humanidad”. Kʼianga jetsakʼéxkia párrafo 1 saʼnda 6, je chjoón jebi kʼoakitso nga tsín mangóson je Biblia kao je xo̱n xi bexkón relijión xi ngikʼa. Kʼoa nga tsakʼinyale je én xi jejitjoson xi tongini kisʼetʼa ya Biblia, ñaki i kitso: “Tsínjinsa libro xi kjaʼaí xi ñaki kʼoatjín jmeni xi tso”.

◼ Japón. Jngo ndsʼee xi je tsakjákao jngo chjota xi kʼoakitsole nga tsín makjainle tʼatsʼe Niná. Tonga je ndsʼee jebi tosi tonda kikonle. Kʼianga bichókonle kui bakó ngotjole je xi faʼaitʼa rebista ¡Despertad! ya jñani tso “¿Casualidad o diseño?”. Je chjota jebi bijbi koanʼindajin kjoafaʼaitsjenle kʼoa chan kʼoakitso nga tsakui nichxin tíjnani je Niná xi kisindaná. Kʼoa ndʼaibi jemakjainle nga tíjna Niná, kʼoa je ndsʼee kui tíbakóyale je foyeto Énnda chjotse xi tʼatsʼe Niná tínroani.

◼ Canadá. Jngo chjoón kiskajin jngo tichjaa xi tojekjoan tími karrole tsakai kʼoa kui kitsjoale je rebista xi chriansʼa kitjo. Kʼianga kikon ngindiale je tichjaa, je chjoón jebi kʼoakitsokixile nga tsín mele nga ya kuicho nga̱ likui makjainle tʼatsʼe Niná. Je tichjaa alikui totsakʼéjngo kon kʼoa kikon ijngokʼale. Kui tsakʼale je foyeto Cómo lograr una vida llena de satisfacción. Kʼianga kiskajin i kitsole: “Jeʼbe nga tsín makjainli tʼatsʼe Niná, tonga jaʼaitsjenna nga toji tinijchái ʼndíli kʼoa mena xínyale jmeni xi koa̱n sʼiain”. Títjon ya pájina 4 párrafo 6 tsakakóle, jña nchja̱ni nga tsín jña masjaile chjota je kjoafaʼaitsjen xi binyakao. Kʼoa xijekoan, kʼoakitsole nga katabʼéxkia je kjoafaʼaitsjen xi faʼaitʼa ya kjoaʼmiya 2, xi kui tínchja̱ni josʼin si̱jchá je ʼndíxti. Je chjoón jebi ñaki kao kjoatsjoa kiskoé foyeto jebi.