Sa nda sa nda katamaná josʼin ʼmiyasoán
1. Tojo kisʼin je chjota tjenngile Cristo xi títjon tsakatio, ánni nga machjénsíni nga sa nda sa nda katamaná josʼin ʼmiyasoán.
1 Ñá xi chjota tjenngile Cristo maa, machjénní nga tosi tonda koa̱nná josʼin kʼuínyasoán. Je Jesús tsakakóyale je chjotale kʼoa tsakasenkao nga ngisa nda kitjosonle je xá xi tsakánele (Luc. 9:1-5; 10:1-11). Kʼoa kʼoati kisʼin je Áquila kao Priscila nga tsakasenkao je Apolos. “Ngisa nda kitsoyatsenle je ndiaale Niná.” (Hech. 18:24-26.) Kʼoa je Pablo kʼoakitsole je Timoteo, ninga jekjoatsele nga tsoyason nga kʼia, nga tosi tonda katabʼénele yaole nga nda kuitsoya “jméni nga skoe̱síni ngatsʼi” nga jekjimasale (1 Tim. 4:13-15). Ninga jekjoatse kʼoa ninga tosʼa choatse nga jo choʼnda sʼin tinixálee Niná nga tiʼmiyasoán je Énnda chjotse, machjénní nga sa nda sa nda katamaná josʼin koakoyasoán.
2. Jméni xi sʼiaan nga koa̱nná kʼoasʼin koakoyaa josʼin bakóya xi ngikʼa.
2 Chjénngilee xi kjaʼaí. Kʼianga ngisa nda koa̱nná nga kʼuínyasoán kʼianí nga chjénngilee je xi ngikʼa josʼin bakóyason (Prov. 27:17). Kʼianga kuitjokʼinyasoán, machjénní nga nʼio nda kuinyañoaa josʼin títsoya je xi ñatjen kitjeen. Xi ijngosani, si̱jélee kjoafaʼaitsjen je xi jenʼio nda male tsoyason kʼoa nda kuinóʼyalee jokuitsoná (Prov. 1:5). A ñʼai maná nga mangínchon ijngokʼalee je chjota, nga estudio bʼetsʼiakoaa kʼoa tsa josasʼin ʼmiyasoán. Si̱jélee kjoafaʼaitsjen je superintendente xi tsʼe grupo kʼoa tsa jngo xi jenʼio nda male tsoyason nga katabasenkaoná. Kʼoa je nganʼiotsjele Niná kʼoati koasenkaoná nga ngisasa nda koa̱nná josʼin kʼuínyasoán. Kuinga machjénni nga kjitʼa si̱jélee je Niná kʼianga bʼetsʼoalee (Luc. 11:13).
3. Jósʼiaan kʼiatsa ʼya xi kjoafaʼaitsjen tsjoáná ninga tsín toxá kanijéñá.
3 Alikui ndatjín nga koa̱njtiná tsa ʼya xi kjoafaʼaitsjen tsjoáná ninga tsín toxá kanijéñá (Ecl. 7:9). Tojo kisʼin je Apolos, nangitokon katamaa, kʼoee kjoanda kʼoa kʼoasʼin kjuintjenngiaa jokʼuínná. Tongisa nda tsa kʼoasʼiaan (Prov. 12:15).
4. Ánni nga nʼio chjínile nga sa nda sa nda koa̱nná josʼin ʼmiyasoán.
4 Kʼianga nda bakoyasoán jé Niná bitjongʼa. Je Jesús jngo choa̱ tsakʼéjnale je chjota tjenngile ánni nga sa nda sa nda koa̱nsínile josʼin kuitsoyason. Kʼoakitsole nga je Jesús yaa mangóson jngo yá xka̱totsee kʼoa nga je chjota tjenngile yaa mangóson je xka̱ntsja xi bale to, xi je Niná sísinle ánni nga “ngisa tonkjín to koa̱sínile” (Juan 15:2). Joni tsa jngo chjota xi xka̱totsee kjintjele nga kui xi mele nga ngisa katabale totsee, je Jeobá kui xi mele nga sa nda sa nda katabitjo “énle ndsoʼbaa” nga ʼmiyasoán (Heb. 13:15). Jósʼin kuichomani tsa sa nda sa nda koa̱nná kʼuínyasoán. Je Jesús i kitso: “Kuibi xi kʼoasʼin bʼasjejeya Nʼaina, nga kʼoasʼin tonkjín to koa̱no” (Juan 15:8).