Jósʼiaan nga ndasa kʼuínyasoán: kuisenkoaa je xi ñatje̱n tiʼmiyasoán

Ánni nga nʼio chjísínile nga kʼoasʼiaan. Je Jesús tsabe nga nʼio chjíle nga jao jao mañá nga ʼmiyasoán. Kʼoa kuinga xki̱ jao jao kisikasénsíni je chjotale xi jankan kao te nga kikakóyason (Luc. 10:1). Koaan kuisenkoaa je xíngiaa kʼiatsa ñʼai kjimale kʼoa tsa tsín be jokuitsole je chjota xi tífákao (Ecl. 4:9, 10). Kʼoati koa̱n kʼoéyanajmílee josʼin bakoyasoán kʼoa kʼoailee kjoafaʼaitsjen josʼin nga ngisa nda kuitsoyason (Prov. 27:17). Kʼoa tsakui cho̱bayañá kʼianga tiʼmiyasoán jmeni xi koasenkao kʼoati nʼio tsjoánganʼiole (Filip. 4:8).

Jókoa̱n sʼiaan:

Nda koasenñoaa josʼin títsoya je xi tje̱nkoaa (Sant. 1:19). Kʼiatsa testo kʼoexkia kʼoati kuijnyísjaijiaan ya Biblianá, ánni nga koa̱n kuisenkaosíñá kʼiatsa jñani ñʼai koa̱nle.
Nda chósonnilee tsa koa̱n nga ñá kuinókjoaa kʼianga je tíbakóya je xi tje̱nkoaa (Prov. 25:11). Tsa estudio títsjoá xi tje̱nkoaa sa̱sénjinle tsa kuinókjoa sakʼoaa kʼoa kui kʼoakuixoán jmeni xi koasenkao je xi títsoyale. Tonga tsa xki̱ niʼya tiʼmiyasoán tosajin nda nga tojé kuinchja̱ kʼianga kʼoakaole. Tsa jngo xi tosʼa títsoya títjon kʼoa tsa jngoje̱ xíngiaa xi ñʼai koa̱nle tsa tjín xi chjónangile tsjoajin koa̱nle kʼiatsa kuisenkoaa. Tsa xki̱ niʼya tiʼmiyasoán kʼoa tsa jngo chjota timangínchon ijngokʼalee kʼoa tsa kʼiaje̱ nga estudio títsjoá je xíngiaa, likui koa̱n tsa ñá kuinókjoachjoalee kʼoa tsa toñá kuinókjoaa kʼoa tsa kjaʼaí xi kuinókjoañá nga títsoya.
Koaan kʼoéyanajmílee xíngiaa josʼin bakoyasoán. Koaan kui kʼoakuixoán tsa jmeni xi koasenkao je xi ñatje̱n tiʼmiyasoán nga ngisa ndasʼin kuitsoyason, alikui toñá kʼoéjintokoán (Prov. 3:27). Kʼianga toñá kitjeen kao xi tiʼmiyasoán koaan i̱ kʼuínlee: “Jósʼin nikjaʼaitsjain josʼin nga kachjakaonajmí”, “A koaan tsjoa jngole kjoafaʼaitsjen”, tsamaije̱ koaan i̱ kʼuínlee: “Kʼianga kʼoatso je chjota sakʼoaa i̱ sʼian”. Je xi ñatje̱n tiʼmiyasoán sa̱sénjinle kʼianga jme kjoafaʼaitsjen xi kʼoai sakʼoalee, tonga tsa tokʼoakʼuín ʼndeʼndelee tochale sikinroajen kon.

I̱ tʼiain sá jebi:

Kʼianga jekafetʼano nga kaʼmiyason, koaan kʼoakʼuínlai josʼin kabasenkaoli tsa jmeni xi nda kasʼín kʼoa tsa jmeni xi katso je xi ñatje̱n kaʼmiyasuin.