Jósʼin kuisenkoaa je xi ñatje̱n mangínkʼinyasoán

1. Jósʼin chjénngilee je pastro Pablo kʼianga kuisenkoaa je xi ñatje̱n mangínkʼinyasoán.

¹ Je pastro Pablo kui xi koanmele kʼianga tsjoánganʼiongañále xínkjín kao je chjotale Cristo xi ngikʼa, kʼoa tsakʼénele yaole nga kʼoakisʼin ngantsjai (Rom. 1:12). Kʼoa ñá, a kʼoati binyakoaa kʼoa bʼainganʼiolee je xi ñatje̱n mangínkʼinyasoán. ʼNdele nga tojyó kuiyoaa koaan kui cho̱banajmíñá tʼatsʼe jmeni xi tíbasenkaoná nga ngisa kjimaná josʼin ʼmiyasoán.

2. Jósʼin kʼoainganʼiolee je xi ñatje̱n ʼmiyasoán kʼoa ánni nga machjénsíni nga kʼoasʼiaan.

² Kʼoainganʼiolee xíngiaa. Tjínkʼa ndsʼee xi jetsoyason xi tsokjón kʼianga fákao chjota kʼoa yaa bakóni jofáyo nkjaín kʼoa tsakʼiaje̱ nga nchja̱. Jósʼin kuinyakoaa je xíngiaa jebi kʼianga ngisa katamanʼio kon. Kʼianí nga kʼoakʼuínlee jmeni xi nda sʼín nga tsoyason. Jmésani xi koa̱n sʼiaan nga ndasa koa̱nnʼio kon. Jngo ndsʼee xi superintendente viajante sʼin tísíxá bʼéyanajmíle je xi ñatje̱n tsoyason nga kʼoati tsokjón tsanda je nga fákao chjota kʼoa nga je Jeobá síjéle nganʼio nga katabasenkao. Kʼoa ijngo ndsʼee xi itso: “Je xi basenkaona nga tsín nʼio tsokjoan kuinga bijnokoa je chjota kʼianga fakoa. Kʼoa sakʼoa saʼnda bʼetsʼoale je Jeobá ánsíni nga koa̱n kʼoasʼinña”. Kʼiatsa jmeni xi kisinʼiojinná nga ʼmiyasoán koaan kʼoéyanajmílee je xi ñatje̱n bʼakaoná nga ʼmiyasoán.

3. Kʼianga mangínkʼinyasoán, jméni xi koa̱n cho̱bayañá kao je xi ñatje̱n bʼakaoná.

³ Cho̱bayañá josʼin ʼmiyasoán nga jngó jngoá. A tíjna jngoná kjoachjonangi xi nichjénntsjé nga chjakoaa chjota kʼoa tsa josasʼin ʼmilee xi nʼio nda bichótsjoá. A saje kinichjén jngo choa̱ xi faʼaitʼa je xo̱n xi kjioná kʼoa tsa nʼio ndasʼin kichotsjoá josasʼin tsakasjailee nga kichjakoaa chjota. Alikui toñá kʼoéjintokoán jebi, kʼoéyanajmílee je xi ñatje̱n ʼmiyasoán (Prov. 27:17). Kʼianga tosʼa tje̱nyandiaa nga timangínchon ijngokʼalee jngo chjota, koaan kʼoakʼuínlee je xi ñatje̱n kabʼakaoná josʼin mená chja̱koaa je chjota kʼoa ánni. Kʼiatsa jngo chjota xi estudio kamangínkʼailee koaan kʼoakʼuínlee je ndsʼee kʼoa tsa tichjaa xi kamangínkoaa ánni nga kʼoasʼin kaʼmiyasínilee je chjota kʼoa ánni nga ngisa nʼio kaʼmiyasínilee tsa jngo bersíkulo xi tsʼe Biblia.

4. Ánni nga kuinyakaosíñá je xi ñatje̱n ʼmiyasoán.

⁴ Je chjotale Cristo xi tsakatio nga siglo I, ali tsa tojejin tsakinyakao je chjota xi kitsoyale je énle Niná, kʼoati nʼio tsakʼénele yaole nga kitsjoanganʼiole xínkjín (Hech. 11:23; 15:32). Je pastro Pablo kʼoasʼin kisichjine je Timoteo kʼoa kʼoakitsole nga katatsoyale xi ngikʼa jmeni xi tsakʼinyale (2 Tim. 2:2). Kʼiatsa kʼoati sʼiaan tsanda ñá nga kʼuínyalee xíngiaa jmeni xi jeʼyaa, ngisa koa̱nle josʼin kuitsoyale chjota kʼoa ngisa tsjoa sa̱tío kon nga kʼoasʼin. Kʼoa je xi ngisa chjíle, kuinga tsjoa kjoáyaa kon je Nʼainá xi tíjna ngʼajmi (Heb. 13:15, 16).