Jósʼiaan nga ndasa kʼuínyasoán: katamaná josʼin chja̱koaa chjota kao interfono

Ánni nga nʼio chjísínile nga kʼoasʼiaan. Tsakui nichxin tsín tso tokoán nga ya chjakaonajmíñá Énle Niná je chjota ya niʼya jñani interfono (intercomunicador) tjínle. Jméni xi sʼiaan nga tsín kui sikʼajen tokoán nga tosi tonda kao kjoatsjoa kʼoasʼiaan xá xi ndatjín. Xi kuenta sʼiaan kuinga tjínkʼa je chjota xi tokʼoasʼin koa̱n kjuinrʼoéni je énnda chjotse (Rom. 10:14). ʼYañá nga nʼio ndasʼin bichómani nga kʼoasʼin ʼmiyalee je chjota. (Chótʼai je Anuario 2011, p. 65 párr. 2, kao p. 66 párr. 1, kao Anuario 2000, p. 54 párr. 3.) Kataʼyala kʼaa jmeni xi koa̱n sʼiaan.

Jókoa̱n sʼiaan:

Tongini si̱kjaʼaitsjeen jokuixoán xi tochoa én kʼoa kʼoétʼaxoaan ánni nga kui kʼoéxkianilee je chjota nga kuinókjoakoaa ya interfono. Tsa kʼoasʼiaan ngisajin sʼe̱ná kjoanʼiojin nga chja̱koaa je chjota. Nga tosʼa kuinókjoakoaa kʼoakʼuínlee jme xá kabichoñá. Kʼoa kuinókjoajaʼaínlee je chjota tsa tjítʼa ya interfono joʼmi. Nga kjesa nixatʼajián kʼoakʼuínlee nga jngo xo̱n kʼoailee, kʼoa tsa maije̱ nga ya jchxo xo̱ntjoale si̱kájnalee.
Kʼoakʼoé tokoán nga ndasʼin kuichomani. Koakoá nga tsjoa tjínná kʼoa joxi ñaki tiʼyaa je chjota sʼiaan.
Likui kuinókjoaan kʼoa kʼoasʼin kuinókjoaa josʼin chobanajmiá. Kʼoakji nʼio kuinókjoaa josʼin nga nda kjuinrʼoéná chjota. Alikui tobijbi kuinókjoaa, tonga kʼoati tsín ngotjo kuinókjoañá.
Nda chósonnilee josʼiaan. Tjín ndʼiayʼai jñani nkjín timbre tjínle je interfono. Tongisa nda nga to jao kʼoa tsa jan chjoéjiaan nga kuinókjoakoaa je chjota, kʼoa kʼoétʼaxoaan jñánile xi jekachjakoaa kʼoa koanngián. Tsa tse ya kuinyaa tsakui nichxin je chjota kjaʼaísʼin sikjaʼaitsjen xi tʼatsaan kʼoa totso̱kjon.

I̱ tʼiain sá jebi:

Kʼianga chótʼayajtíon Énle Niná ya niʼyano, kʼoatʼianchoyao josʼin chja̱kaonajmío je chjota nga tsín ñaki xkon tiʼyaño.