Jósʼiaan nga ndasa kʼuínyasoán: Teléfono tichjain nga tʼinyasuin

ÁNNI NGA NʼIO CHJÍSÍNILE: Kʼianga ʼmiyasoán je Énle Niná koaan teléfono si̱chjén (Hch 20:24).a Kʼiatsa tsín kʼoakoa̱nná nga ndʼiale kjuinchónlee je chjota koaan teléfono kuinókjoalee.

JÓKOA̱N SʼIAAN:

• 

  Tongini tijnandai. Jngo tema chjoéjin xi bele tokuin. Xijekoa̱n, tʼetʼaxuin jmeni xi sí. Kʼiatsa to mensaje si̱kʼéjnai ya teléfono, kʼoatʼinlai jmé xá kanokjoani. Kʼianga kuinókjoalai teléfono je chjota, tjayobasain jñani tjítʼali jmeni xi sí, kʼoa tsa jmesani xi koa̱nchjénli, jolani tsa tableta kʼoa tsa celular xi tjínle JW Library^® kao jw.org^®.

• 

  Ali nokjonjin. Kʼoasʼin tinókjoai josʼin nokjoai ngantsjai. Kʼoatʼiain joni tsa ñaki tiʼyai je chjota. Ali toxki̱ énjin nokjoai. Kʼoatʼinlai xi kjaʼaí nga katabasenkaoli nga kʼuínyasuin. Kʼiatsa jme xi skónangi je chjota, tikʼaxki̱ ijngokʼai jme xi katso ánni nga koasenkaonili je xi ñatjen tiʼmiyason.

• 

  Kʼoatʼinlai nga kuinókjoa ijngokʼalai. Kʼiatsa mandosinle je chjota, jngo kjoachjonangi tikʼéjnai, xi kʼia kʼuínyalai nga kuinókjoa ijngokʼalai teléfono. Kʼoatʼinlai nga jngo xo̱n xi Énle Niná faʼaitʼa kʼoailai, koaan correo kʼoa tsa Internet si̱chjáin nga si̱kasénlai, kʼoa tsa maije̱, jisoa tʼinkaolai. Kʼoati koa̱n tsa correo electrónico si̱chjáin nga si̱kasénlai jngo video. Tsa koa̱n, kʼoatʼinlai nga kafaʼasʼen kʼoa katakotsenle jmeni xi faʼaitʼa ya página xi tíjnaná ya Internet.