JONʼIA XI CHJOTALE CRISTO MAA
Xi koasenkaoná nga satíoná kjoajtín nga bitjokʼinyasoán
Tojo ma nga satíoná kjoajtín, kʼoati jngo kjoatjao xi tsjoáná je Jeobá kʼianga satíoná kjoajtín nga bitjokʼinyasoán nga̱ bakolee kjoatsjoacha xíngiaa kʼoa kui xá xi ndatjín kʼoanʼia (Heb 10:24, 25). Nga sʼejna kjoajtín nga bitjokʼinyasoán tjínnele tsa 5 kʼoa tsa 7 minuto sʼe̱jna, kʼoa je minuto xotjín jekasʼendajin ʼya kao kuitjokʼinyasoán, jñani kʼuínyasoán kʼoa jekasʼejna kjoabʼetsʼoa. Tsa kʼia kuitjokʼinyasoán nga jefetʼa kjoajtín xi satíoná ngisaa choa tse sʼe̱jna. Je xi bándiaale kjoajtín jebi tjínnele kui kuitsoya jmeni xi kuinyakao je xi kuitjotsoyason nga kui nichxin. Tobʼelañá, kʼianga xoto, kʼiaa nga ngisa nkjín ndsʼee bitjotsoyason, kʼoa tjínkʼa xi tokʼia tsoyason nga kui nichxin, koaan nga kui sa̱kóya jméni xi koa̱n kuixoán nga kuitjokʼinyasoán. Jmésani xi koasenkaoná.
Jókoa̱n kuixoán nga chja̱kaonajmiá chjota xi faʼaitʼa Xo̱n xi tjítʼa jme xi chotʼayá ya kjoajtín: Tʼatsʼe chjotale Cristo kao Xále Niná.
Jmé xi koa̱n kuixoán nga kui chja̱kaonajmíñá chjota jmeni xi ma kʼoa tsa jmeni xi tso noticia.
Jmé xi koa̱n kʼuínlee je chjota kʼianga bʼéchjoaʼaná.
Jmé xi koa̱n kʼuínlee jngo chjota xi tsín makjainle tʼatsʼe Niná, xi evolución makjainle, xi kjaʼaí én nchja̱ kʼoa tsa jngo chjota xi kui religión tíjnajin xi tsín nanda ʼyale ya jñani ʼmiyasoán.
Jósʼin si̱chjén jw.org, je aplicación JW Library® kʼoa tsakuije̱ Biblia.
Jósʼin si̱chjén je xo̱n kao video xi nichjén nga ʼmiyaa.
Jósasʼin koa̱n kʼuínyasoán, tobʼelañá tsa kao teléfono, tsa carta chjiá, tsa ya kʼuínyasoán jña nʼio tjín chjota, nga kjuinchón ijngokʼalee chjota kʼoa tsa Biblia kʼuínyalee.
Jósʼin si̱kuindaa yaoná nga kʼuínyasoán, nga kui chja̱kaonajmíñá chjota jme xi koa̱nndosinle, nga nda tso én kuinókjoaa kʼoa nga nda sʼiaan, nga kui chja̱kaonajmíñá chjota xi kuinyakao, kʼoa tsa xi kjaʼaísanile.
Koaan ya chʼa̱ngiñá jngo kjoaʼmiya kʼoa tsa jngo video xi faʼaitʼa folleto Tosi tonda nda tʼexkiai kʼoa nda takoyai.
Jósʼin kʼoainganʼiolee kʼoa jósʼin kuisenkoaa je xi ñatjen ʼmiyasoán.
Koaan jngo texto koakoyaa xi kui nchja̱ni nga ʼmiyasoán kʼoa tsa jngo kjoafaʼaitsjen xi koasenkaoná.