Jósʼin tjínnele sa̱tío je kjoajtín nga bitjokʼinyasoán

1. Jmé xá satíoni je kjoajtín nga bitjokʼinyasoán.

¹ Je Jesús títjon kjoanla kisikatíojtín je chjotatjenngile xi jankan kao te mani kʼianga kjesa síkasénjin nga kuitsoyason (Luc. 10:1-11). Kitsjoanganʼiole nga kʼoakitsole nga tsín toje tjío, nga je Jeobá koandiaale nga kuitsoyason. Xi ijngosani, kitsjoale kjoafaʼaitsjen josʼin kuitsoyason kʼoa “jaojao” kisikasén. Kʼoatisʼinni ndʼaibi, je kjoajtín xi satío nga bitjokʼinyasoán tsjoánganʼioná, tsjoáná kjoafaʼaitsjen kʼoa sʼendajin josʼin kʼuínyasoán.

2. Fitsʼiakjoanni sá abril, jókjitse sa̱tío je kjoajtín nga bitjokʼinyasoán.

² Je kjoajtín xi satío kʼianga bitjokʼinyasoán te kʼoa tsa xjaʼaon minuto satío. Nga sʼejna kjoajtín jebi kʼiaa sʼendajin josʼin sa̱kóyason, jñani koanngián kʼoa kʼoati kʼia sʼejna kjoabʼetsʼoa. Tonga fitsʼiakjoanni sá abril, to aon kʼoa tsa ñato minuto sa̱tío. Kʼoa tsa kʼia satío nga jekafetʼa jngo kjoajtín ngisajin choatse sa̱tío, nga̱ jejin tse jmeni xi kakotʼaya je xi kuitjotsoyason nga kʼia. Nga kʼoasʼin ngisa choatse sʼe̱jna je kjoajtín jebi ngisajin tse nichxin sʼe̱le je xi kuitjotsoyason nga kuitsoya je Énle Niná. Xi ijngosani, je precursor kao je publicador xi tongini kuitsoyason tochoatsejin koajñáʼnyole.

3. Jósʼin tjínnele sʼe̱ndajin je kjoajtín xi satío nga bitjokʼinyasoán.

³ Je kjoajtín xi satío nga bitjokʼinyasoán kʼoasʼin tjínnele sʼe̱ndajin josʼin nga ngisa skénndiaale xi jetsoyason. Nkjín jtín xi kʼoasʼin bʼéndajin nga xinxin ʼnde bitjoni nga jngó jngó grupo, kʼoa ndasʼin bichómani nga kʼoasʼin bʼéndajin, nga̱ ngisa chrian male ngatsʼi jñani satío kjoajtín jebi kao jñani kuitsoyason. Kʼoa ngisa choa ñʼai ma josʼin sʼendajin kʼoa kʼoati choa ñʼai male je xi bándiaale nga jngó jngó grupo. Josʼin kʼoendajin je xi chjotajchínga sʼin tjío kui sikjaʼaitsjen jmeni xi ngisa koasenkao je jtín kʼoa nga kuenta sʼin jmeni xi machjénle. Tjínnele nga tojebe ngatsʼi jñani koai kʼoa ʼya kao koaitsoyason kʼianga kjesa sʼejnajin kjoabʼetsʼoa.

4. Ánni nga kʼoati nʼio chjínile je kjoajtín xi satío nga bitjokʼinyasoán joni je kjoajtín xi ngikʼa.

⁴ Kʼoati nʼio chjíle joni tsa je kjoajtín xi ngikʼa. Je kjoajtín jebi tojé bichó je xi bitjotsoyason, ali tsa ngatsʼijin xi bichó ya jtín. Tonga ali tsakuijin xi tsonile tsa tokjoaská jchatokoán kʼoa tsa ngisa choa chjíle tikʼoajinni je kjoajtín xi ngikʼa. Jngo kjoatjao xi je Jeobá títsjoáná joni je kjoajtín xi ngikʼa nga basenkaoná nga tsjoacha maa je xíngiaa kʼoa nga kui xá xi ndatjín kʼoanʼia (Heb. 10:24, 25). Kuinga tjínnenile ñaki nda jetjíonda je xi kʼoakaole koandiaa ánni nga kuitjongʼani je Jeobá kʼoa koasenkaoni je xi kuicho. Kʼiatsa kʼoakoa̱nle je xi kuitjotsoyason tjínnele kʼoenele yaole nga kuicho je kjoajtín jebi.

Je kjoajtín xi satío nga bitjokʼinyasoán alikui tokjoaská jchatokoán kʼoa alikui ngisa choa chjí jchaa tikʼoajinni kjoajtín xi ngikʼa

5. 1) Jmé xá xi kjinele je superintendente xi tsʼe servicio kʼianga bʼéndajin je kjoajtín xi satío nga bitjokʼinyasoán. 2) Jméni xi tjínnele sʼin je tichjaa kʼiatsa je kʼoakaole koandiaa je kjoajtín nga kuitjokʼinyasoán.

⁵ Jósʼin kʼoéjnanda je xi koandiaa. Kʼianga nda bʼendaa jmeni xi bʼakaoná, tongini kʼoaʼminá. Kʼoakjoánti tjínni je kjoajtín xi satío nga bitjokʼinyasoán. Kʼianga xinxin ʼnde koa̱nxkó je grupo nga kuitjotsoyason, jé kʼoakaole koandiaa je kjoajtín je superintendente xi tsʼe grupo kao xi basenkao. Tonga kʼianga tojngo ʼnde koa̱nxkóni ngatsʼi, jé superintendente xi tsʼe servicio kʼoendajin ʼyani xi koandiaa. Tjínkʼa superintendente xi tsʼe servicio xi tsjoále je programa nga jngó jngó ndsʼee xi bʼakaole nga bʼasje je grupo kʼoa kʼoati bátʼa ya tablero. Xi kuitsoni nga ndasʼin kuitjo je kjoajtín jebi kui josʼin kuitsoya kʼoa josʼin kʼoendajin ndsʼee xi koandiaa, kuinga je superintendente xi tsʼe servicio nda skósonnile nga skoéjin ʼyani xi koandiaa. Tsa tsín sakʼoa jngo xi chjotajchínga sʼin tíjna, siervo ministerial kʼoa tsa jngo ndsʼee xi jekisʼenngindá xi koa̱nle koandiaa, je superintendente xi tsʼe servicio jé kʼoakuitsole jngo tichjaa xi jetjínle kjoafaʼaitsjen nga katabándiaa. (Chótsenlai jñani tso: “Kʼiatsa jngo tichjaa koandiaa”.)

6. Ánni nga tjínnesínile nda kʼoéjnanda je xi kʼoakaole koandiaa nga kuitjokʼinyasoán.

⁶ Kʼianga ya bitjaa je Skuela xi síchjine choʼndale Niná kʼoa tsa ya Kjoajtín xi tsoyaná josʼin si̱xálee Niná, bʼailee kjoandosin kʼoa nda biyondaa. Nʼiojin tokʼa xi tokʼia sikjaʼaitsjen jokuitso kʼianga jetjenyandiaa. Tsa ñá kʼoakʼuínná nga kjoándiaa je kjoajtín nga bitjokʼinyasoán kʼoatisʼin kʼoailee kjoandosin. Kʼoa nga jengisa choatse sʼe̱jna je kjoajtín jebi, nʼio chjíle nga nda kuiyondaa ánni nga koasenkaosíni je xi kuicho kʼoa nga choa̱le katafetʼa. Nga nda kuiyondaa kʼoati kui xi tsonile nga tongini kuijnyísjee je territorio nga kjesa sʼejnajin je kjoajtín.

7. Jméni xi koa̱n kuinókjoañá nga satío je kjoajtín nga bitjokʼinyasoán.

⁷ Jmé xi kuinókjoañá. Kjaʼaí kjaʼaí chon nga jngó jngó ʼnde, kuinga je choʼnda xi nʼiotʼakon Niná alikui tsa jngo xo̱n tjíobʼasje jñani faʼaitʼa jokuixoán nga sʼejna je kjoajtín nga bitjokʼinyasoán. Je rekuadro xi tso “Jméni xi koa̱n kuinókjoañá nga satío je kjoajtín nga bitjokʼinyasoán” nkjín koya faʼaitʼa jmeni xi koa̱n kuinókjoañá. Nga sa̱tío kjoajtín jebi tsjoá énle je xi kuicho. Kʼoati koa̱n nga jngo choa̱ sa̱kóchoya sakʼoa kʼoa tsa jngoje̱ video xi ya faʼaitʼa jw.org xi koa̱nchjénná nga kʼuínyasoán. Kʼianga kʼoéjnanda je xi koandiaa, kui sikjaʼaitsjen jmeni xi tsjoánganʼiole kʼoa xi koasenkao je xi kuitjotsoyason nga kui nichxin.

Kʼianga kʼoéjnanda je xi koandiaa, kui sikjaʼaitsjen jmeni xi tsjoánganʼiole kʼoa xi koasenkao je xi kuitjotsoyason nichxin nga kʼoakaole

8. Jméni xi ndatjín xi koa̱n chótʼayajiaan kʼianga satío je kjoajtín nga bitjokʼinyasoán kʼianga xoto kao nga taingo.

⁸ Kʼianga xoto, me ngatsʼi xi jetsoyason Énle Niná nga kui síkáyole chjota je Xo̱n xi Bájinkonná (koaan sʼe̱yole chjota rebista kʼianga én kastía tsa kʼia nga tjín chjota xi kastía nchja̱ jñani bakóyason je jtín kʼoa tsa tsín jngo jtín xi én kastía nchja̱. Tongisa nda nga kui kjoáyoaa je xo̱n xi kjio kʼianga énná). Nʼio nkjín xi kʼia bitjo nga xoto xi tsín kʼoamale nga toxkia nichxin, kʼoa tsakui nichxin likui tinanda kjoaʼaítsjennile jmeni xi kiskotʼaya Nichxin nga kotʼayajtín Énle Niná ya niʼyale. Kuinga ndatjínsíni nga je xi kʼoakaole koandiaa je kjoajtín nga kui kʼoakuitso josʼin kʼuínyalee chjota tojosʼin faʼaitʼa ya jto̱n yátsʼi̱n je xo̱n Xá xi nʼia tʼatsʼe Niná. Xi ijngosa koya, kʼoati koa̱n kui skótʼayajin jokuitso nga sikáyo je rebista kʼoa nga kui sikʼasʼenjin tʼatsʼe jngo noticia, tsa jme xi kjima kʼoa tsa tʼatsʼe jngo sʼuí xi sʼejna ya ʼnde jñani bʼakaoná ʼmiyasoán. Kʼoati koa̱n kui kʼoakuitso jókoa̱n kʼuínlee jngo chjota xi skoé je rebista nga koa̱n kjuinchón ijngokʼalee. Xi ijngosani, tsa kuicho jngo publicador xi tokʼoa jekisikatío je rebista xi kjimaxákao nga kui sá, koaan chjónangile tsa jme kjoafaʼaitsjen tjínle josʼin koa̱n sʼe̱yo je rebista kʼoa tsakui jme kjoanda xi kisokole nga tsakáyo je rebista. Kʼoa nga taingo kʼoati koa̱n kui chótʼayajin je xo̱n xi kjimaxákao nga kui sá. Nga satío je kjoajtín nga bitjokʼinyasoán kʼoati koa̱n kui kuinókjoañá jósʼin kjoáyoaa je xo̱n xi nichjén tojme nichxinni nga bʼailee estudio je chjota, jolani je foyeto Énnda chjotse kao Tinóʼyalai je Niná kʼoa tsakuije̱ libro Jmé kjoanni xi bakóya je Biblia.

9. Kʼiatsa jngo xo̱n kʼoa tsa tratado chjotse tinikʼabísoan, jméni xi koa̱n chótʼayajiaan kʼianga xoto kao nga taingo.

⁹ Nichxin nga jngo xo̱n kʼoa tsa tratado chjotse nikʼabísoán, kʼianga xoto kao nga taingo koaan kui chótʼayajiaan jósʼin koa̱n sʼe̱yo je rebista kao je xo̱n kʼoa tsa je tratado xi tíbʼabíson, kʼoa tsakuije̱ jméni xi koa̱n sʼiaan kʼiatsa jngo chjota koa̱nndosinle je Énle Niná. Kʼoati koa̱n kui kʼoéyanajmiá tʼatsʼe nga nʼio chjíle nga nikʼabísoán je xo̱n.

10, 11. Ánni nga nʼio chjínile nga tongini koationda je xi jetsoyason nga koai je kjoajtín xi satío nga bitjokʼinyasoán.

¹⁰ Jósʼin koa̱n koationda xi jetsoyason. Nga nda kuitjo je kjoajtín xi satío nga bitjokʼinyasoán kʼoati kui xi kuitsoni jósʼin xi kuicho. Tsa kʼia nga tongini chótʼayá jokuixoán nga kuitjokʼinyasoán, tsakui nichxin kʼianga chotʼayajtían ya niʼyaná, kuijin kʼoakuixoán jmeni xi koasenkao xi ngikʼa. Kʼianga nda kuiyondaa, tojejin kichʼá je xo̱n xi koa̱nchjénná tongini nga kjesa sʼejnajin je kjoajtín nga kuitjokʼinyasoán. Tsa kʼoasʼiaan ngisajin xátí kuichoaa jñani kʼuínyasoán.

¹¹ Kʼoati nʼio chjíle nga kʼoénelee yaoná nga tongini kuichoaa nga kjesa fitsʼiajin je kjoajtín nga kuitjokʼinyasoán, tojo nʼia nga satíoná je kjoajtín xi ngikʼa. Tsa jetojochon kuichoaa, kuitsónjinjin ijngokʼa josʼin jekasʼendajin. Ánni. Kuinga je ndsʼee xi bándiaa nkjín koya jmeni xi kuenta sʼin nga bʼéndajin jósʼin sa̱kóyason. Tobʼelañá, tsa tochoa mani xi kuicho, tsakui nichxin ya sikasén ngatsʼi jñani sʼa chasale nga sa̱kóyason. Kʼoa tsa kjin tíjna je territorio, tsakui nichxin kʼoasʼin kʼoendajin nga je sikasénkao jngo publicador xi tjínle karro kao jngo xi tsínle. Kʼoa tsa ya kuitsoyason ya ʼnde jñani xkón chon, tsakui nichxin tiya chrian kuitsoyason kʼani je ndsʼee kʼoa tsa ñatjen kuitsoyasonje̱ kao tichjaa. Kʼoa tsa chʼin tjínle jngo ndsʼee, tsakui nichxin ya sikasén jñani likui nʼio kuijtale kʼoa tsa yaje̱ jñani tochoa eskalón koaimi kʼoa tsa je kʼoakuitsoleje̱ jngo publicador xi jetjínle kjoafaʼaitsjen nga ñatjen koaitsoyason kao jngo publicador chjotse. Tonga tsa jetojochon kuichoaa, ijngokʼajin tikʼoendajinngáni je ndsʼee ʼya kao koanngián. Sakʼoajin kʼoakoa̱n nga tsín xátí kuichoaa tsa jmesani xi kʼoati nʼio tjínle kjoandosin kʼoasʼiaan. Tonga tsa toje nganá nga tojochon bichoaa, machjénjin nga si̱kjaʼaitsjenjiaan ánni kʼoanʼiañá, a kuinga tsín chjí ʼyaa je kjoajtín jebi axo kui machjénná nga ngisasa nda kʼoéndajiaan nga xátí kuichoaa.

12. Tsa toje bitjokoaa ngantsjai tsa jngo ndsʼee kʼoa tsa jngo tichjaa, jméni xi koa̱n sʼiaan.

¹² Kʼianga kuitjokʼinyasoán, koa̱njin tsa tongini kʼoéndajiaan ʼya kao kuitjoaa kʼoa tsa maije̱ je kʼoakuitsoná je ndsʼee xi koandiaa. Tonga tsa toje bitjokoaa ngantsjai jngo ndsʼee kʼoa tsa jngo tichjaa, a koaan kjaʼaísa xi kuitjokoaa nga kʼuínyasoán (2 Cor. 6:11-13). A koaan tsa sakʼoa je kuitjokoaa xi tosʼa choatsele nga títsoyason kʼoa kuisenkoaa josasʼin nga ngisasa nda kuitsoyason (1 Cor. 10:24; 1 Tim. 4:13, 15). Nda kuinóʼyá jokʼuínná nga tíjna je kjoajtín, jolani jñani kʼoakaoná kʼuínyasoán. Kʼoa kʼianga jekjoetʼa, alikui ni̱kʼantjaiyaa josʼin jekasʼendajin kʼoa kjoan kjuian ya territorio jñani kaʼminá.

13. Tsa kʼoainganʼioá ngatsʼiaa nga satío kjoajtín nga bitjokʼinyasoán, jósʼin koasenkaoná.

¹³ Kʼianga kisikasén Jesús nga kitsoyason je chjotatjenngile xi jankan kao te “kao kjoatsjoa” jaʼaini (Luc. 10:17). Likui jao tjínná nga kui xi tsakasenkao nga títjon kjoanla kisikatíoxkó je Jesús nga kjesa fitsoyasonjin. Je kjoajtín xi satíoná kʼoasʼin basenkaoná. Tsa kʼoainganʼioá ngatsʼiaa, jmeni xi kʼuínná ya kjoajtín jebi tsjoánganʼioná, sichjinená kʼoa nda sʼe̱ndajin nga kuitjosonná nga kjoájinkoaan “ngatsʼi naxinandá” tʼatsʼe Énle Niná (Mat. 24:14).

Kʼiatsa jngo tichjaa koandiaa

Je tichjaa tjínnele kʼoejtsa jko̱ kʼoa kʼoéjnaa nga koandiaa je kjoajtín jebi. Tojo kui kuitsoya tojo sʼín kʼianga jngo ndsʼee bʼakaole bándiaa. Tsandalani alikui ñaki kuitsoya, koaan skoéjin jmeni xi kuinchja̱ni nga kʼoati tsjoá énle je xi kuicho. Kʼiatsa jngo tichja xi kʼoati jekisʼenngindá kʼoakuitsole nga je sikʼéjna kjoabʼetsʼoa, kʼoati tjínnele kʼoejtsa jko̱. Kʼoa tsa jngo ndsʼee xi jekisʼenngindá kuicho kʼianga jetíbándiaa je tichjaa, kʼoakuitsole nga tosa je koandiaa. Jé superintendente xi tsʼe servicio kjinele nga nda kʼoendajin jokoa̱n sʼiaan kʼiatsa tsínlani kʼoakoa̱nle nga jngo ndsʼee koandiaa. Tobʼelañá, kʼiatsa ya tíjna jngo ndsʼee xi jekisʼenngindá tonga xi sʼa choa nóle nga jngo tichjaa koandiaa je kjoajtín. Tsa je xi chjotajchínga sʼin tjío kʼoakuitso nga ti jebi kjesa tíjnandajin nga je koandiaa tonga nga koa̱n je sikʼéjna kjoabʼetsʼoa, je superintendente xi tsʼe servicio tongini kjoakaonajmí nga jao nga je tichjaa koandiaa kʼoa nga je ti jebi sikʼéjna kjoabʼetsʼoa. Kʼoa tsa jngo ndsʼee kuicho xi jekisʼenngindá tonga tsa be je xi chjotajchínga sʼin tjío nga tsín koa̱n nga je koandiaa kʼoa ni koa̱njinla nga je sikʼéjna kjoabʼetsʼoa. Ningalani likui kʼoeyanajmíle je tichjaa anni nga tsín koa̱n je koandiaa, je xi chjotajchínga sʼin tjío tokui xi kʼoakuitsole je tichjaa nga je koandiaa kʼoa je sikʼéjna kjoabʼetsʼoa ningalani ya tíjnabasen je ndsʼee jebi. Je xi chjotajchínga sʼin tjío koajinkon je ndsʼee jebi jme nichxinni nga jngo tichjaa koandiaa je kjoajtín nga kuitjokʼinyasoán.

Jméni xi koa̱n kuinókjoañá nga satío je kjoajtín nga bitjokʼinyasoán:

Jngo choa̱ xi faʼaitʼa ya xo̱n Xá xi nʼia tʼatsʼe Niná.
Jngo video xi ya faʼaitʼa jw.org xi koa̱nchjénná nga kʼuínyasoán.
Nga kʼuínyaa jósʼin koa̱n kʼoétsʼiakoaa nga chja̱kaonajmiá je chjota, jókʼuínlee nga koa̱njyole nga kjuinchón ijngokʼalee kʼoa tsakuije̱ jokʼuínlee nga koa̱n tsjoá choa tao̱n kʼianga kjoáyolee je xo̱n.
Jngo testole Biblia xi tsjoánganʼioná kʼoa tsa jngo xi kui nchja̱ni tʼatsʼe nga ʼmiyasoán.
Tsakui kʼoéyanajmiá kjoanda xi kisokoná ya ʼnde jñani ʼmiyasoán kʼoa tsakuije̱ xi jaʼaitʼa je xo̱n xi tíbʼasje naxinandále Niná.
Jmeni xi jaʼaitʼa ya xo̱n Xá xi nʼia tʼatsʼe Niná.
Jmeni xi chriansʼa kinokjoani nga kisʼejnaná je Kjoajtín xi tsoyaná josʼin si̱xálee Niná.
Jngo kjoaʼmiya xi jaʼaitʼa ya Xo̱n xi Bájinkonná xi kui nchja̱ni nga ʼmiyasoán.
Jmeni xi faʼaitʼa je libro Benefíciese kao “Ven, sé mi seguidor” xi kui nchja̱ni nga ʼmiyasoán.
Jósʼin koa̱n si̱chjén jw.org kʼianga ʼmiyasoán..
Jmeni xi faʼaitʼa je Traducción del Nuevo Mundo kʼiatsa jekijna nga énli.
Jókʼuínlee nga chja̱kaonajmiá tsa je chjota xi tsín makjainle tsa tíjna Niná, xi evolución makjainle, tsa hindú, tsa budista kʼoa tsa xi kjaʼaísa relijión tíjnajin.
Jósʼin chja̱koaa tsa ʼyani xi tokʼoechjoaʼaná.
Jósʼin kuisenkoaa je xi ñatjen tiʼmiyasoán nga ngisa nda koa̱nle kuitsoyason.
Jméni xi koa̱n sʼiaan tsa jngo chjota sa̱téjiaan xi kjaʼaí én nchja̱.
Kʼuínyaa jósʼiaan tsa je kjoásjee chjota xi kjaʼaí én nchja̱, tsa kao teléfono kʼuínyaa, tsa ya kʼuínyaa ya jña nʼio tjín chjota, tsa jngo chjota kjuinchón ijngokʼalee kʼoa tsakuije̱ josʼin kʼoee estudio.
Nga nʼio tjínle kjoandosin nga ni̱kuindaa yaoná, nga koa̱nná josʼin kʼuínyalee nga jngó jngó chjota, nga kʼoakʼoé tokoán nga ndasʼin kuichomani, nga nda sʼiaan kʼoa tsa xi kjaʼaísanile.