Kao kjoatsjoa kʼuínyaa jokjoantjínni xi tʼatsʼe Jesús

Tsa koa̱nná josʼin kʼuínyalee chjota jokjoantjínni xi tʼatsʼe Jesús, ngisajin tsjoa sʼe̱ná nga koakoyaa. Jé Jesús xi lao̱xi̱ngi̱ sʼin tíjnale kjoamakjainná (Efes. 2:20). Tsa tsínlani je Jesús, tsínjinná je kjoachoya nga koa̱n kuiyoaa ngantsjai nichxin (Hech. 4:12). Kuinga machjénsíni nga chjí jchaa je xá xi tjínle Jesús tʼatsʼe jme xi tjínndajinle Niná. Nʼio nkjín chjota xi totjíochʼanachale nga tsín ya Biblia yʼangini jme xi tjíosakóyale xi tʼatsʼe Jesús. Kʼoa nga kʼoasʼin tjío alikuijin sʼe̱le kjoanichikontʼain xi tsjoále Niná je chjota xi ñaki makjainle tʼatsʼe Jesús. Kʼiatsa nʼio ʼyachjiá nga ʼyaa jotjínni xi kjoakixi kui xosikaoná nga kuinyakoaa chjota xi ndʼé tjío ni̱ma̱le nga katamajinle jotjínni xi tʼatsʼe Jesús, josʼin tíjna ngixko̱n Jeobá kao xá xi tjínle tʼatsʼe jme xi tjínndajinle Jeobá. Kʼianga kjoaʼaítsjenya kjoabiyale Jesús, a ñaki kao kjoatsjoa kʼuínyalee je chjota jokjoantjínni xi tʼatsʼe.