Jósʼin chjénngilee Jeobá kao Jesús nichxin nga kjoaʼaítsjenya kjoabiyale Cristo
1. Jméni xi nʼio bʼenelee yaoná nga kʼoanʼia kʼianga faʼaitsjenya kjoabiyale Cristo.
1 Je Jeobá ñaki nda sítjoson jmeni xi tjínndajinle. Kʼoa nga nchja̱ kʼani tʼatsʼe kjoanichikontʼain xi kjoaʼaíkao Chjotaxále Niná, ya Isaías 9:7 itso: “Kuinga nʼio tjínle kjoatsjoacha Jeobá xi tsʼe chjota kjoajchán nga kʼoasʼinni”. Kʼoa je Jesús nʼio koanndosinle nga tsabexkón Niná (Juan 2:13-17; 4:34). Nga xki̱ nó kʼianga faʼaitsjenya kjoabiyale Cristo, jngo tjíjtsa Sonʼnde miyón mañá xi bʼenelee yaoná nga ngisasa tse nixálee Niná. Kʼoa kʼoasʼin chjenngilee josʼín je Jeobá kao Jesús. A kʼoasʼiaan nó jebi.
2. Jmé xi sʼiaan fitsʼiakjoanni nga 7 sá marzo kʼoa jósʼin kuichomani tsa ñaki kao kjoatsjoa kʼoasʼiaan.
2 Nga kjoájinkoaan chjota. Je nó jebi kʼiaa nga xoto 7 sá marzo koaitsʼiani nga kjoájinkoaan je chjota tʼatsʼe Kjoabichile Nainá. Ngisa nda nga tiʼani ndʼai kuiyondaa nga ñaki kao kjoatsjoa kjoájinkoaan je chjota. Nga jngó jngó jtín nʼio sixá nga koajinkon je chjota jokji tjen kʼoakoa̱nle. Tongini kʼoéndajiaan nga kʼoailee xo̱n xi si̱kʼabísoan je chjota xi ʼmiyalee Biblia, xi kjitʼa nixatʼaa nga ʼmiyasoán, xi ñatjen nixá, xi ñatjen mangián skuela kʼoa tsa je xi xíngiaa mani. Kʼoati koa̱n ya tjen koakonilee ya jw.org.
3. Jméni xi sʼiaan nga ngisasa tse kʼuínyasoán nga sá marzo kao abril.
3 Precursor auxiliar. Je kjoatsjoa xi tjínná kui xosikaoná nga ngisasa tse si̱xálee Niná. Nʼiojin nkjín koa̱nñá xi precursor auxiliar sʼin si̱xá nga sá marzo kao abril, kʼoa koaan chjoéjiaan tsa kante ora si̱xá. Kʼianga chotʼayajtían Énle Niná ya niʼyaná, kʼoa tsa kʼia nga toñá chotʼayá, kʼoétsʼoaa kʼoa si̱kjaʼaitsjenjiaan jokoa̱n sʼiaan nga ngisasa tse kʼuínyasoán (Prov. 15:22). Kʼiatsa koakoá nga ñaki tsjoa tjínná nga kʼoasʼin si̱xá, tsakui nichxin kʼoati sʼin kʼa xíngiaa. Tsa kʼoéndajiaan josʼin nga ngisasa tse kʼuínyasoán, jé Jesús chjénngilee (Mar. 6:31-34).
4. Jmé kjoanda xi sʼe̱ná tsa chjénngilee je Jeobá kao Jesús.
4 Kʼiatsa chjénngilee je Jeobá kao Jesús nichxin nga kjoaʼaítsjenya kjoabiyale Nainá, nʼio tse kjoanda sʼe̱ná. Ngisajin nkjín chjota sʼe̱jinle xi tʼatsʼe Niná. Tsjoajin sʼe̱ná kʼoa ndajin sʼe̱ tokoán nga si̱xálee je Jeobá kʼoa nga kʼuínyalee xi kjaʼaí (Hech. 20:35). Xi ngisasa chjíle kuinga nʼiojin tsjoa sʼe̱le je Jeobá kao je ʼNdíle nga kʼoasʼiaan.