Tsjoa kjoáyaa tokoán nga si̱kjaʼaitsjenyá kjoabiyale Cristo
1. Jméni xi sʼiaan nga ngisa tsjoa sʼe̱ tokoán nga kjoaʼaítsjenya kjoabiyale Cristo.
1 A mená nga ngisa tsjoa sʼe̱ tokoán je sá marzo, abril kao mayo. Koaan nga ngisa tsesa si̱xálee Niná kʼoa tsa kʼoakoa̱nnáje̱, koaan precursor auxiliar sʼin si̱xá. Ánni nga ngisa tsjoa sʼe̱síni tokoán tsa kʼoasʼiaan.
2. Ánni nga ngisa tse kjoatsjoa tje̱nkaosíni kʼianga ngisa nʼio ʼmiyasoán.
2 Koaan nga tsjoasa sʼe̱ tokoán. Je xi chjotaa nʼio machjénná xi tʼatsʼe Jeobá nga̱ toxá kʼoasʼin kisindaniná, kʼoa kʼianga ʼyaxkoán kʼoasʼin tsjoa satíoni tokoán (Mat. 5:3, Traducción del Nuevo Mundo). Kʼoatisʼin koanndaa nga tsjoa sʼe̱ tokoán nga binyakoaa xi kjaʼaí (Hech. 20:35). Kʼoa nga ʼmiyasoán ʼyaxkónñá je Niná kʼoa binyakaoñá je xíngiaa. Kuinga ngisa tsjoa sʼeyani tokoán nga ngisa nʼio ʼmiyasoán. Kʼoa kʼianga kʼoanʼia sa nda sa nda maná ʼmiyasoán. Kʼoa kui xi basenkaoná nga ngisa manʼiojinsaa kʼoa nga tsín tikjoanokjon síkinjeniná nga chjakaonajmiá je chjota. Xi ijngosani, ngisa nkjín chjota chjakaonajmíñá énle Niná kʼoa ngisa sokóná estudio. Ngayeje jebi kui xi ngisa tsjoa fáya tokoán kʼianga ʼmiyasoán.
3. Ánni nga nʼio skénndiaasíni nga precursor auxiliar sʼin si̱xá sá marzo kao abril.
3 Sá marzo kao abril nʼio skénndiaa nga precursor auxiliar sʼin si̱xá, nga̱ koaan chjoéjiaan tsa kante kʼoa tsa ñachante ora si̱xá. Kʼoati kʼia kʼoabíson je xo̱n nga kjoájinkoaan je chjota nga katafi nga sʼe̱jna Kjoabichile Nainá. Kʼoa jebi kʼiaa sʼe̱tsʼiakaoni nga xoto 22 sá marzo saʼnda lune 14 sá abril, nichxin nga kjoaʼaítsjenya kjoabiyale Cristo. Nʼiojin tse xá sʼe̱ nga jngó jngó jtín kʼoa toxkia nkjínjin ndsʼee xi “tojngo sixájtínle” Jeobá nga sikʼabíson xo̱n jebi ya territorio jña bʼakaole jotjín nichxin kʼoakoa̱n (Sof. 3:9).
4. Jmé xi machjén nga sʼiain tsa meli nga precursor auxiliar sʼin si̱xái.
4 Tje̱n tʼendajin. Tsa kje bʼendajinjin, koaan kui si̱kjaʼaitsjain josʼin tinichjain nichxinli kʼoa jmeni xi koa̱n sʼiain nga ngisasa tse kʼuínyasuin, tsa jngo kʼoa tsa nkjínsa sá. Tʼetsʼoalai Jeobá (Sant. 1:5). Cho̱bayaño ya yaniʼyali kʼoa kao ndsʼee ya jinjtín (Prov. 15:22). Ningalani chʼin tíbʼetʼali kʼoa tsa ñaki bʼajnda nichxin nixái, tsakuini nichxin koa̱n nga precursor auxiliar sʼin ni̱xái ánni nga tsjoa sʼe̱ni tokuin.
5. Jósʼin kuichomani tsa ngisasa tse si̱xálee Jeobá nga kjoaʼaítsjenya kjoabiyale Cristo.
5 Je Jeobá kui xi mele nga tsjoa katasatíole je choʼndale (Sal. 32:11). Tsa kʼoénelee yaoná nga ngisasa tse si̱xálee Jeobá nga kjoaʼaítsjenya kjoabiyale Cristo, ngisa tsjoa sʼe̱ tokoán, tonga kʼoati kjoáyatsjoaa ni̱ma̱le je Nʼainá xi tíjna ngʼajmi (Prov. 23:24; 27:11).