Kjoanda xi tísatíobasenná nga koa̱n chʼa̱sjengʼaa je Jeobá
1. Jmé kjoanda xi tísatíobasenná josasʼin koa̱n chʼa̱sjengʼaa je Jeobá.
1 Kitsʼiakjoanni sá marzo, je xi jetsoyason koaan kante ora sikʼasʼen nga precursor auxiliar sʼin sixá kʼianga xki̱ nó xki̱ nó nga sá marzo kao abril, kʼoa tsakʼiaje̱ sá nga faʼaisíxatʼa je jtín je superintendente xi tsʼe circuito. Kʼoa tsa je xomana nga sixatʼa je jtín je superintendente xi tsʼe circuito jao sá kʼoakaotʼale, koaan tojñanile nga jao sá jebi nga kante ora sikʼasʼen je xi precursor auxiliar sʼin si̱xá. Ngatsʼi xi precursor auxiliar sʼin tjíosíxá kʼianga sixatʼa je jtín je superintendente xi tsʼe circuito koaan koatio ngakjijngo kjoanokjoaya xi bʼaile je xi precursor regular kʼoa kao xi precursor especial sʼin tjíosíxá. Tsa tsín kʼoakoa̱nná nga precursor auxiliar sʼin si̱xá nga ñachante ora si̱kʼasʼeen, koaan ño kʼa nga jngo nó nga kʼoasʼin si̱xá nga kante ora si̱kʼasʼeen nga chʼa̱sjengʼaa je Jeobá (Sal. 109:30; 119:171).
2. Jmé kjoanda xi sʼe̱le je xi precursor auxiliar sʼin tjíosíxá nga kuichosíxatʼaná je superintendente xi tsʼe circuito.
2 Nga sixatʼa je jtín je superintendente xi tsʼe circuito. Koaan nga nkjínsa xíngiaa xi precursor auxiliar sʼin sixá kʼianga kuichosíxatʼa je jtín je superintendente xi tsʼe circuito, kʼoa nʼio tsjoánganʼiole nga ya tojngo sixákao ndsʼee jebi nga kuitsoyason (Rom. 1:11, 12). Tsakui nichxin tjío je precursor auxiliar xi koa̱n kʼoasjeʼa jngo nichxin nga jinle xomana ánni nga koa̱n tsjoánganʼiosíni nga kuitsoyason. Kʼoa je xi tokʼia síkjáya nga xoto kao nga taingo, koaan kʼoakuitsole je superintendente xi tsʼe circuito tsa koa̱n je kuitjokao tojñanile nga jao nichxin jebi. Xi ijngosani, ngisa nʼio sinʼiojinsa kʼianga koainrʼoé je kjoanokjoaya xi kʼoaile je xi precursor regular kʼoa kao xi especial sʼin tjíosíxá.
3. Ánni nga koa̱nsíni nga precursor auxiliar sʼin si̱xá je sá nga faʼaitsjenya je kjoabiyale Cristo.
3 Sá marzo kao abril. Tojosʼin jekaʼyaa, je xi precursor auxiliar sʼin síxá je sá nga faʼaitsjenya je kjoabiyale Cristo kʼoa kante ora síkʼasʼen, koaan nga jao sá kʼoasʼin sixá nga kʼoasjejeya Niná (Heb. 13:15). Je sá marzo kao abril ma nga ngisasa nkjín ora ʼmiyasoán nga precursor auxiliar sʼin nixá, nga̱ kʼiaa bʼabíson je xo̱n xi tsʼe nga faʼaitsjenya kjoabiyale Cristo. Kʼoa nga ngisa nkjín ora tsoyason xíngiaa nga kʼia, ngisa nkjín ndsʼee kao tichjaa xi ma bitjokoaa nga ʼmiyasoán. Kʼoa xijemani, ijngokʼá mangínchonlee je chjota xi bichó nga faʼaitsjenya je kjoabiyale Cristo kʼoa kʼoaʼmilee nga katafinrʼoé je kjoanokjoaya xi tokʼia faʼatítjon. Tojosísʼin tiʼyaa, ngisa tse kjoanda tísatíobasenná ndʼai nga precursor auxiliar sʼin si̱xá nga chʼa̱sjengʼaa je Jeobá. A kʼoasʼin tinikʼéjnandaa ni̱ma̱ná nga kʼoasʼin si̱xá (Luc. 6:45.)