A tijnandaní nga precursor auxiliar sʼin si̱xái
1. Ánni nga koa̱nsíni nga ngisa tse si̱xálee Niná je sá nga faʼaitsjenya je kjoabiyale Cristo.
1 Je sá nga faʼaitsjenya je kjoabiyale Cristo koaan nga ngisa tse si̱xálee Niná. Kʼianga kui sá kui nikjaʼaitsjenjiaan jokjitse kjoatsjoacha tsakakóná Jeobá nga kitsjoa je ʼNdíle nga tsakʼéchjíntjainá (Juan 3:16). Kʼoa kui jebi xosíkaoná nga nʼio tse kjoanda bʼaisínilee Jeobá kʼoa nga ʼmiyanilee chjota jmeni xi jetísʼín ndʼaibi kʼoa ʼyani je (Is. 12:4, 5; Luc. 6:45). Nʼio tse kjoatsjoa sokóná nga kʼoasʼin fajinkoaan ngatsʼi chjota kʼianga faʼaitsjenya je kjoabiyale Cristo. Kʼoa xijema kʼiaa mangínchon ijngokʼalee je chjota xi bichó nga tosi tonda ʼmiyalee xi tʼatsʼe Niná. Jósi, a koaan tsa precursor auxiliar sʼin si̱xái tsa sá marzo, tsa sá abril kʼoa tsa sá mayo.
2. Ánni nga skénndiaasíniná sá marzo nga precursor auxiliar sʼin si̱xá.
2 Likui si̱kʼatoaa sá marzo. Nʼio skénndiaaná sá jebi nga precursor auxiliar sʼin si̱xá nga̱ koaan chjoejiaan jotjín ora si̱kʼasʼeen, koaan tsa kante kʼoa tsa ñachante ora. Kʼoa tsa je superintendente xi tsʼe circuito kuichosíxatʼa je jtín kʼianga kui sá, ngatsʼi xi precursor auxiliar sʼin tjíosíxá koaan koai ngakjijngo kjoanokjoaya xi bʼaile je xi precursor regular kʼoa kao xi precursor especial sʼin tjíosíxá. Je kjoabiyale Cristo kʼiaa kjoaʼaítsjenya nga majte 26 sá marzo nó 2013. Ndʼaibi ngisa nkjín nichxin sʼe̱jna nga kjoájinkoaan je chjota, nga̱ kʼiaa kʼoétsʼiakaoñá nga 1 sá marzo kʼoa aon xoto kʼoa aon taingo yʼa sá jebi. Tojosísʼin tiʼyaa, nʼio skénndiaaná sá marzo nga precursor auxiliar sʼin si̱xá.
3. Jméni xi tongini kʼoéndajiaan nga ngisa nkjín ora kʼuínyasoán.
3 Tje̱n kʼoéndajinñá. Tongisa nda nga jetje̱n si̱kjaʼaitsjeen jósʼin tinichjén nichxinná ndʼaibi, kʼoasʼin jchañá tsa koa̱n nga precursor auxiliar sʼin si̱xá. Mani nga machjén nga kuinyakaongañá xíngiaa xi tiyoaa ya yaniʼya, koaan kʼia cho̱bayañá kʼianga chotʼayajtían énle Niná tsa mená nga precursor auxiliar sʼin si̱xá, kʼoa kʼoati koa̱n kʼia kʼoéndajinñá jme nichxin kuitjokʼinyasoán (Prov. 15:22). Kʼoa tsa tsín kʼoakoa̱nná nga precursor auxiliar sʼin si̱xá, a si̱kinroajenñá tokoán. Mai. Tsa kʼoakoa̱nná, koaan tsa ngisa nkjín ora kʼuínyasoán nichxin nga bitjoaa, kʼoa koaan chʼa̱sjeʼa jngoaa nichxin nga kuitjokʼinyasoán nga jinle xomana.
4. Jmé kjoanda xi so̱koná tsa ngisa nkjín ora kʼuínyasoán sá marzo, abril kao mayo.
4 Tsa ngisa nkjín ora kʼuínyasoán sá marzo, abril kao mayo ngisasa nʼio tsjoa sʼe̱ tokoán nga kuinyakoaa je chjota kʼoa nga si̱xálee Jeobá (Juan 4:34; Hech. 20:35). Tonga je xi ngisa chjíle kuinga nʼio nda sʼe̱le je Jeobá jokji kʼoénelee yaoná (Prov. 27:11).