Kʼianga chʼin tsaotʼale kjoafaʼaitsjenná

Kui jebi xi tso je chjota xi chʼin tjínle kjoafaʼaitsjenle. A kʼoati sʼe tokuin tsanda ji jotso chjota jebi axo ʼyaxkonní xi kui kjoa tífaʼatojin.

Kʼiatsa kuilani kjoa tibitjatojin ali tsa tojijin xi kʼoakjimai. Jngo tjíjtsa Sonʼnde nʼio nkjín chjota xi kui chʼin sʼele kʼoa tsa xínkjínje̱ xi kui chʼin tjínle.

Nga nichxin fetʼa tiyoaa ndʼaibi nʼio ñʼai kjimachon, nga nʼio tse kjoa bitjatojiaan yaa nroani nga ba satío tokoán kʼoa nga nʼio nikjáojiaan (2 Timoteo 3:1). Je Organización Mundial de la Salud kʼoatso kʼiatsa jin mani chjota jngola xi chʼin sʼele kjoafaʼaitsjenle. Kʼoa nga chʼin COVID-19 koan nó 2020 jankan kao xjaʼaonjanla millón chjota xi ansiedad koanle kʼoa xi depresión kisʼele.

Kʼianga chʼin katʼale kjoafaʼaitsjenná machjén nga kjoásjee jmeni xi sʼiaan nga nda sʼe̱ tokoán kʼoa nga tsín sikjáojin je xíngiaa.

Kʼianga tsín chʼin tjínle kjoafaʼaitsjenná

Kʼianga tsín jme chʼin tjínle kjoafaʼaitsjenná nda sʼe tokoán, nixáñá kʼoa tsín jme xi nikjáojiaan, chókjoajinná ninga kjoa tjínná, nda nixá kʼoa tsjoa sʼe tokoán jmeni xi nʼia.

Kʼianga chʼin katʼale kjoafaʼaitsjenná

• Ali tsakuijin xi tsonile nga tsín nʼiojiaan.

• Machjén nga si̱xkiaa, tsín tinda nikjaʼaitsjenñá, tsín tiʼyañá jonʼia kʼoa tsín tinda sʼeni tokoán.

• Me tongantsjai nga ñʼai maná nimiyoaa xi kjaʼaí kʼoa tsín tinda bitjosonniná je xá xi nʼia.

• Chʼin jebi katʼaná tojotjín nóná, tojñani tsaan, tojosʼin tsen yaoná, tojme religión tiyojiaan, ni tjínná kjoachjine kʼoa ni mai, ni ma̱ tinijchá yaoná kʼoa ni tjínná tao̱n.

Tjasjai nganʼio

Kʼianga sʼa fitsʼiani nga kui chʼin jebi sʼele jngo chjota bʼantjaiya jokjoan, josʼin kjen, josʼin fayofe, nʼio síkjáojin kʼoa me tongantsjai nga ba satío kon. Tsa kʼoakjimai kʼoa tsa ʼya xi ʼyaxkuin xi kʼoakjima tjasjai nganʼio. Tʼin tsʼe chjinexki ánni nga jchasíni ánni nga kui chʼin tíbʼetʼanili. Jméni xi koasenkaoli.

Jé Jesús xi ngisasa nʼio chjine kʼoa i kitso kʼianga jaʼai i̱ Sonʼnde: “Chjota xi nda tjío, likui machjénle chjinexki, tojé xi tjíomʼe xi machjénle” (Mateo 9:12). Kʼiatsa jngo especialista sixkili kui xi koasenkaoli nga tsín nʼio kʼoetʼali chʼin jebi kʼoa nga tsjoa sʼe̱ ijngokʼa je tokuin. Tsa jekjoatse nga kʼoamali kʼoa tsa jeʼyai nga kui chʼin tjínli tʼin tsʼe chjinexki.a

Je Biblia alikui tsa tʼatsʼe xki nchja̱ni, tonga jmeni xi tso koasenkaoná nga nda sʼe̱ kjoafaʼaitsjenná. Kjoaʼmiya xi fisani kui kuitsoyaná josʼin basenkaoná je Biblia nga chókjoajinná kʼianga chʼin katʼale kjoafaʼaitsjenná. Tʼexkiai jmeni xi tso.