A tojo sokósale je chjotale Cristo xi ngóson sʼin makjainle nga je bixankao

Tjínkʼa ndsʼee xi sʼa tjíotoje xi kʼoatso. Tonga kʼoati be nga kui xi mele Jeobá nga toje kuixankoaa xi kʼoati choʼndale mani. Xi tsonile nga toje xi koa̱n kuixankoaa jngo xi jekiskanisʼenngindá yaole (1 Corintios 7:39). Ánni nga kʼoatso kʼasíni je ndsʼee.

ÁNNI NGA KʼOATSO KʼASÍNI JE XI SʼA TJÍOTOJE

Kuinga kʼoatsosíni nga kʼoasʼin síkjaʼaitsjen nga ngisa nkjín tichjaa tjín xi sʼa tjíotoje tikʼoajinni ndsʼee. Kʼoa tjín naxinandá jñani kʼoachon kjoaixi. Tobʼelañá, ya Corea, nga jngo siento testigo, ñachan xjaʼaonjao mani xi yánchjín kʼoa ñachanjan mani xi xʼin. Kʼoa ya Colombia, nga jngo siento testigo, jankan kaoni jaon mani xi yánchjín kʼoa kanteño mani xi xʼin.

Kʼoa tjínkʼa naxinandá jñani kui kostumbre tjín nga je xi xʼin tjínnele tsojmi kʼoa tsa tao̱n tsjoále je xijchále chjoón xi kuixankao. Kʼianga tsín testigole Jeobá ma je xijchá, tsakui nichxin nʼio tse tao̱n síjé kʼoa tsakui síjéje̱ tsojmi xi nʼio chjí. Kʼoa nkjín ndsʼee xi tsín njele tsojmi jebi. Kuinga kʼoasʼin síkjaʼaitsjen kʼasíni je tichjaa xi ya tsʼe nga tsín so̱kole jngo testigole Jeobá xi kuixankao.a (Tʼexkiai nota.)

TINʼIOTʼAI JE JEOBÁ

Kʼiatsa sakʼoa kʼoasʼin nikjaʼaitsjain, tikjaʼaitsjain nga je Jeobá be jotjín tokuin kʼoa majinle jomali (2 Crónicas 6:29, 30).

Je Jeobá kʼoatsoná nga tojé kuixankoaa xi kʼoati choʼndale mani. Ánni. Kuinga be jmeni xi nda sikatíoná kʼoa alikui mele nga chʼaosʼin kuiyoaa. Alikui mele nga kui chjoéjiaan xi kjoa sikatíojinná. Nichxinle profeta Nehemías nʼio nkjín chjota judío xi je chixankao yánchjín xi tsín Jeobá síxále. Kuinga Nehemías kui tsakʼéyanajmísínile je naxinandá jmeni xi koanle je rey Salomón. Kʼoakitsole nga je Niná tsjoake koan Salomón kʼoa rey kisikʼéjna ya Israel. Tonga Salomón je chixankao yánchjín xi tsín Jeobá bʼétsʼoale kʼoa je xi jée kiskanijin (Nehemías 13:23-26). Je Jeobá tokui xi mele nga nda kuiyoaa. Kuinga kʼoatsosínile je chjotale Cristo nga toje katabixankao xi kʼoati choʼndale mani (Salmo 19:7-10; Isaías 48:17, 18). ʼYañá nga tjínle ʼnde je Jeobá nga je kʼoakuitsoná jmeni xi sʼiaan kʼoa jmeni xi mai. Kʼoa bʼailee kjoanda nga tsjoáná kjoafaʼaitsjen nga̱ kui bakó nga tsjoakená kʼoa jmeni xi tsoná kjoanda tsaanñá (Proverbios 1:5).

Kʼiatsa je kuixankoai xi tsín tsjoake Jeobá, tochale skénʼndóbʼakjáli kʼoa likui ti Jeobá si̱xánilai. Kʼoa tsínjin nda koa̱n tsa kʼoakoa̱n (2 Corintios 6:14). Tikjaʼaitsjain nga jmeni xi tsoná je Jeobá kjoanda tsaanñá. Nʼio nkjín mani je choʼndale Niná xi tjíosítjoson kjoatéxomale. Tonga kʼoati tjío xi tsín kʼoatjíosʼín.

KOAAN JE KUIXANKOAI XI KʼOATI CHJOTALE CRISTO MA

Jngo tichjaa xi Australia tsʼe, xi Maggy ʼmi, je kitjokao jngo chjota xi tsín testigole Jeobá ma.b (Chótsenlai nota.) Tichjaa jebi kʼoatso nga nʼio nkjín kʼa kisicha kjoajtín nga toyala fikonle. Kʼoa koankjinle je Jeobá. Kʼoa jngo tichjaa xi Ratana ʼmi, xi ya India tsʼe, je kitjokao jngo ti xi ñatjen tjíotsoma skuela. Ti jebi kiskotʼaya Biblia tonga tokui kʼoakisʼinni nga je tsakʼamjekao. Xijekoanni, Ratana alikui ti Jeobá kisixánile kʼoa saʼnda kjaʼaí relijión kijin nga chixankao ti jebi.

Jngo tichjaa xi Camerún tsʼe, xi Ndenguè ʼmi, xjaʼaonño nóle nga chixankao jngo chjota xi tsín testigole Jeobá ma. Chjota jebi kʼoakitsole nga tsjoáʼndele nga tojo testigole Jeobá katama. Tonga xi jaʼato jao xomana nga jechixan alikui tikitsjoaʼndenile nga ki kjoajtín. Je tichjaa kʼoatso nga nʼio ba koanle kʼoa nga tokiskiʼndáʼnde. Kʼiaani koanjinle nga tsín nda kisʼin. Kʼoa tokui kisikjaʼaitsjenntsjai nga kʼoakisʼin.

Tsakui nichxin i̱si: “Tjínkʼa ndsʼee xi tsín testigole Jeobá ma xi chixankao kʼoa nda chjota”. Tonga tsa je kuixankoai, jósʼin kuijnai ngixko̱n Jeobá. Jósʼe̱ tokuin nga tsín kinitjosuin kjoafaʼaitsjen xi kitsjoali Jeobá kʼianga kjoanda tsini tsakai. Kʼoa jósʼe̱ kon je Jeobá (Proverbios 1:33).

Nʼio nkjín mani je ndsʼee xi sítjoson jmeni xi tso je Jeobá kʼoa tojé bixankao xi kʼoati testigole Jeobá ma. Ndsʼee jebi bení nga nʼio nda tjíosʼín. Kʼoa kuinga kʼoasʼínni nga mele koayatsjoa kon je Jeobá. Tobʼelañá, jngo tichjaa xi Japón tsʼe, xi Michiko ʼmi, kui xi mele nga Jeobá sitjosonle, tonga je xínkjín kui xi mele nga je katabixankao jngo chjota xi tsín testigole Jeobá ma. Xi ijngosani, je miyole Michiko chixan kʼoa je tojela tsakʼejna. Nga kʼoakjima, ba koanle. Tonga je xi tsakasenkao kuinga kisikjaʼaitsjen nga tsínkui xi tsjoa kʼoeni tokoán tsa kuixan kʼoa tsa mai. Je xi ngisa chjíle kuinga je nixálee Jeobá, “je Niná xi tsjoa tjínle” (1 Timoteo 1:11, TNM). Je Michiko bení nga tsjoáná Jeobá jmeni xi mená. Kuinga kʼoatsosíni nga tsa ʼyani xi mele kuixan kʼoa tsín sokóle jngo chjota xi Jeobá síxále, ngisa ndasʼin kʼianga tojela katabʼejna. Xijekoanni, je Michiko jngo testigole Jeobá xi nʼio nda sʼín chixankao. Kʼoa nʼio tsjoa tjínle nga kʼoasʼin kisitjosonle Jeobá.

Kʼoati tjío je ndsʼee xi kiskoyakaola saʼnda nga koansjaile jngo chjoón xi nda sʼín. Tobʼelañá, jngo ndsʼee xi Australia tsʼe, xi Bill ʼmi, kʼoatso nga sakʼoa kisasenle je yánchjín xi tsín testigole Jeobá ma. Tonga alikʼia nga ñaki nda kisikao nga̱ tsín mele nga je kjoakao jngo xi tsín testigole Jeobá ma. Kʼianga jeki nichxin, je Bill kʼoati kisasen kʼale je tichjaa. Tonga je tichjaa alikui koanndosinle. Kante nó kiskoyakao je Bill saʼnda nga koansjaile jngo tichjaa xi kʼoati kui tífitjenngi jmeni xi mele kuichotjenngi je Bill. Ndsʼee jebi kʼoatso nga nda kisʼin nga kʼoasʼin kiskoya. Kʼoatso nga nʼio tsjoa tjínle nga̱ tsjoá fitsoyason nga jao, kotʼaya nga jao kʼoa síxále Jeobá nga jao. Kʼoati tsjoa sʼele nga bʼejnajinle je miyole chjoónle nga̱ kʼoati testigole Jeobá ma. Kʼoatso nga ngisa nʼio tíjna kjoabixanle nga sítjoson je kjoafaʼaitsjen xi faʼaitʼa Biblia.

JMÉNI XI KOA̱NLA SʼIAIN NDʼAIBI

Kʼiatsa kuinga kje bixanjinni nga tinitjosuin je kjoatéxomale Jeobá xi tso nga toje kuixankoaa xi ngóson sʼin makjainná, jméni xi koasenkaoli nga chóyakaolai. Koaan kui si̱kjaʼaitsjain jokji tsjoa tjínle Jeobá kʼianga tinitjosonlai (1 Samuel 15:22; Proverbios 27:11). Kʼoati koasenkaoli nga kjitʼa kʼoétsʼoalai, nga kʼoakʼuínlai jotjín tokuin (Salmo 62:8). Kʼoa tsa kʼoénelai yaoli nga kuixkantʼakoai jme xi símekon yaoná ngisa koa̱nmiyosai Jeobá. Tikjaʼaitsjain nga nʼio bechjíli kʼoa nga be jmeni xi machjénli. Je Jeobá alikui kʼoatso tsa jngo chjota tsjoáli xi kuixankoai, tonga bení josʼin koasenkaoli nga tsjoa sʼe̱ tokuin (Salmo 145:16; Mateo 6:32).

Tsakui nichxin sakʼoa kʼoasʼe tokuin jokisʼe kon David. Ñandia kʼianga nʼio ba tjínle David kʼoa ñaki jetsínle nganʼio kui kisijéle Jeobá nga kjitʼanangi katabasenkao (Salmo 143:5-7, 10). Ali nikinroajenjin tokuin. Chóyai saʼnda nga tsjoáli Jeobá jme xi tinijélai. Tʼexkiai Biblia kʼoa tikjaʼaitsjenjin jmeni xi bʼexkiai. Kʼoasʼin jchani jmeni xi mele Jeobá nga sʼiain kʼoa jchaní josʼin tsakinyakao je choʼndale nichxin kjoatse. Tsa kʼoasʼiain ngisa koa̱nnʼiotʼai Jeobá kʼoa si̱tjosonlai.

Jmésani xi koa̱n sʼiain jokji tse nga chóyai. Koaan kʼoénesalai yaoli nga timiyui Jeobá kʼoa nga nda tʼiain. Kʼoati koa̱n si̱miyui xi ngikʼa, nda chjota katamai, chjotanixá katamai kʼoa kixi tʼintʼalai Jeobá. Kui jebi xi koasenkaoli nga nda kuijnai nga jekuixain (Génesis 24:16-21; Rut 1:16, 17; 2:6, 7, 11; Proverbios 31:10-27). Nʼio tʼinyasuin kʼoa nʼio tixái ya jinjtín. Kui xi koasenkaoli nga tsínkui kʼoasʼiain xi chʼaotjín. Je Bill kʼoatso nga ngotjo kinile nichxin jokji tse nga toje tsakʼejna kʼianga precursor kisixá.

Je kjoatéxomale Jeobá xi kʼoatso nga toje katabixankao choʼndale je xi ngóson sʼin makjainle alikui tífaʼato. Kʼiatsa je kuixankoaa xi testigole Jeobá ma, jé Jeobá chʼa̱sjengʼaa kʼoa nda kuiyoaa. Je Biblia kʼoatso nga kʼoéjna ngantsjai nichxin je xi kao kjoatsjoa sítjosonle je Jeobá (Salmo 112:1, 3). Kuinga titjosonsíni je kjoatéxomale Jeobá xi tso nga toje kuixankoaa xi ngóson sʼin makjainná.