Madresita koan ngasʼa tonga ñaki tichjaa tsakjáo nga koanskanni

Felisa: Yaa España koanjchínga kʼoa je familiana nʼio katóliko. Kʼoa 13 koanni xíngijin xi ya kisixá ya yo̱ngo̱, tjínkʼa xi naʼmi koan. Je xi primole mani je mana yaa kitsoya ya jngo ndʼiaskuela xi katóliko. Kʼoa kʼianga kʼien, kʼoakitso je papa Juan Pablo II nga santo katanikao. Nʼio ma̱ kisijchá yaole je familiana. Je pana yaa kisixá jñani manda ki̱cha̱ kʼoa je mana xá jinjñá kisʼin. An ʼndítjoan kʼoa 7 koanni xtindsʼe.

Kʼianga 12 nóna jngo kjoajchán kitsʼia ya España. Nga jejetʼa kjoajchán ndoyá kichani je pana nga kjoa polítika kitsjonjin yaole. Nʼio ñʼai koanle je mana nga tsakajngiʼanajin. Kuinga 3 xtiʼndí ndichja xi ya kisikasénsíni ya convento xi tíjna ya Bilbao nga tsín kjinrá kjoaʼa.

Araceli: Kʼianga kinikasénnajin ya convento, 14 nóna, 12 nóle Lauri kʼoa 10 nóle Ramoni. Je madresita kitsjoaxánajin kʼoa yaa kinitsjaijin ya convento. Xijekoan 2 nó, yaa kinikasénnajin ya Zaragoza jñani tíjna jngo convento xi ngisa nʼio jekji kʼoa ya chjotajchínga makuinda. Yaa ndʼialʼí kinitsjaijin, nʼio ai koannajin xá kʼoa ñaki aonyanajin ngantsjai. Nʼio kinikjaʼaitsjainjin familianajin.

Felisa: Kʼianga ki xtiʼndí ndichja ya Zaragoza, je mana kao tsinina kʼoakitso nga kʼoati ya sikasénna tsanda an. Naʼmi je tsinina kʼoa je kao mana kui xi koanmele nga tsín je sisinle jngo ti xi koanndosinle tʼatsʼan. Koanmena nga ya kjuíkatejna choatse ya convento nga̱ nʼio tsjoake̱ Niná. Nyaon nyaon kia mixa̱ kʼoa koanmena nga kʼoati misionera koan tsakai joni je primona xi tíjna ya África.

Tonga nga jeya tijna ya convento alikuini kui kʼoakisʼian jmeni xi mena. Je madresita alikuini tsakinyakaona nga kjaʼaí naxinandá kjuísixále Niná. Nga jejaʼato 1 nó, ki ijngokʼaña niʼyana nga kisikuinda tsinina xi naʼmi koan. An kisisinle niʼya kʼoa nyaon nyaon bʼexkiaijin rosario nga maxon. Nʼio tsjoake̱ koan nga fikoa naxó ya yo̱ngo̱ kʼoa nga sikʼakjá najño je María kʼoa kao xi ngikʼa santo.

Araceli: Nga koa̱n madresita koa̱n tjínnele nga kitsjoa énna nga sitjosoan jmeni xi kʼuínna. Yaa Zaragoza títjon kʼoakisʼian. Tonga je madresita xinxin kikaonajin an kʼoa kao xtindichja. Je Lauri yaa kinikasén ya convento xi tíjna ya Valencia. Ramoni yaa Zaragoza tsakʼejna, kʼoa an yaa kinikasénna ya convento xi tíjna ya Madrid. Nga ya tijna tikitsjoangáña énna nga kʼoasʼian jmeni xi tjínnele sitjosoan. Nʼio nkjín chjotajchínga tjín kao xti xi fichókotʼaya ya convento xi tsʼe Madrid, kʼoa nʼio tse xá tjín. Yaa hospital xi tíjna ya convento kisixá an.

Kʼianga kjesa madresita majian, kʼoasʼin kisikjaʼaitsjen nga me to Biblia kʼoexkia kʼoa skotʼaya. Tonga alikuini kʼoakoan. Alikui Biblia tsakʼexkiaijin kʼoa saʼnda tsínkui kichobayanijin xi tʼatsʼe Niná kao Jesús. Koan choana én latín, kiskotʼayaña tʼatsʼe santo xi tjínle chjota katóliko kʼoa jé María tsakʼetsʼoale. Tonga xi ngisa kinʼiaijin kuinga kinixáijin.

Chan nʼio kisikjáojian. Kui kisikjaʼaitsjen nga tosa je familiana koanjngile tao̱n ʼndele nga ya convento tisixá kʼoa nga tokjaʼaíla chjota kjimanyiná. Kʼoakixinle je madresita xi séntítjon nga mena kjuíña niʼyana. Tonga kisikʼéjnaʼyanʼiona tojoni nga sikʼantjaiya kjoafaʼaitsjenna.

Je madresita xi ngikʼa tsakʼaonsjena tonga nga tojo kʼoasʼin sikjaʼaitsjen nga mena kjuía kisikʼéjnaʼyanʼio ijngokʼana. Jan kʼa kʼoakisikaona. Kʼoa kʼoakitsona nga tokʼia koa̱n kjuía tsa i̱ tso xi skia: “Tifiña nga̱ kui xi mena nga je sixále Na̱i ʼndele nga Niná sixále”. Tokʼoakoanna. Mena nga kjuía tonga alikui mena nga kʼoatso xi skia. Kʼoakixinle nga mena kjoakoa naʼmi kʼoa sichoa je jéena. Tsakʼeyanajmíle ngayeje je naʼmi kʼoa jé kisijékjoale je obispo nga koan kinikasén ijngokʼanina ya convento xi tíjna ya Zaragoza. Yaa tsakatejna jngo jao sá kʼoa xijekoan kitjoʼndena nga kiña niʼyana. Xijekoan, je Lauri kao Ramoni kʼoati kitjo ya convento.

JNGO LIBRO XI KISIKINYÁXINNAJIN XÍNGIJIN

Felisa: Nga jeki nichxin chixanña kʼoa yaa kikatejna ya Cantabria, jngo ʼnde xi tíjna ya España. Nyaon nyaon kia mixa̱. Ñandia nga taingo, je naʼmi jngo libro tsakakó xi La verdad que lleva a vida eterna ʼmi. Nʼio jtile kʼoa kʼoakitsonajin nga katatsjoále tsa ʼyani xi kijnale libro jebi kʼoa tsa maije̱ tjé katasíkʼatjenjin.

Tsínna libro jebi tonga koanme jngona. Tojngo jao nichxin jaʼato kʼoa jao yánchjín xi testigole Jeobá ma kicho niʼyana kʼoa kitsjoana libro jebi. Nga tikuini nichxin nga jekoannjio kʼiaa tsakʼexkia. Kʼianga kichokon ijngokʼana yánchjín jebi kʼoakitsona tsa mena skotʼaya Biblia kʼoa jaon kixinle.

Tsjoake koan ngantsjai xi tʼatsʼe Niná. Kʼoa kʼianga jetsaʼbe xi tʼatsʼe Jeobá nʼio koantsjoake. Koanmena nga tsakʼeyanajmíle ngatsʼi je chjota. Kʼiaa kisʼe̱nngindá nga nó 1973. Tsakjakaonajmíña ngantsjai je xíngia xi tʼatsʼe Jeobá. Tonga ngatsʼi kʼoakitsona nga tsín ndatjín jme xi tisʼian, ngisa je ndichja Araceli.

Araceli: Nga totaon tsaʼyana ya convento, jtina kʼoa alikui tinda tjínni tokoan tʼatsʼe relijiónna. Ninga kʼoalani, tojo kintsjaiña mixa̱ nga taingo kʼoa nyaon nyaon tsakʼexkia je rosario. Tojo koanmena nga koa̱njinna jme xi tso je Biblia kʼoa kisijéle nganʼio je Niná nga katabasenkaona. Kʼoa ñandia, je Felisa tsakjákaonajmína tʼatsʼe xi tíkotʼaya. Ñaki nʼio tsjoa tjínle kʼoa kʼoasʼin kisikjaʼaitsjen nga tokuisa xá tsoʼbasʼín. Tonga alikui kisasenna.

Xijekoan, ki ijngokʼaña ya Madrid, yaa kisixá kʼoa yaa chixan. Nga jeki nó, tsaʼbeña nga tsín kʼoasʼin fikao yaole je chjota xi fi yo̱ngo̱ josʼin tsakakóya je Jesús. Kuinga tsín tikiña yo̱ngo̱ kʼoa tsín tikikonnile je naʼmi nga kisichoa jéena. Alikui tikoankjainnina tʼatsʼe santo kʼoa tʼatsʼe infierno. Kisikʼatsaoña ngayeje je sén xi nyana. Likui ʼbe tsa ndatjín jme xi tisʼian tonga kui kʼoakisʼinña nga tsín tinda tjínni tokoan. I xinle Niná: “Mena nga skoe xi tʼatsi, tisenkaonái”. Nkjín kʼa kicho je testigole Jeobá ya niʼyana tonga alikui kiskoxʼále. Alikui timakjainnina xi tʼatsʼe relijión.

Je Lauri yaa Francia tíjna kʼoa Ramoni yaa España tíjna. Chrian nó 1980 kiskotʼaya Biblia nga jao kao testigole Jeobá. Kʼoasʼin kisikjaʼaitsjen nga kʼoati totíchʼanachale jokoan je Felisa. Nga jeki nichxin, jngo chjoónndaindʼiana xi Angelines ʼmi kisimiyoa. Kʼoati testigole Jeobá tsanda je. Nkjín kʼa kʼoakitsona je kʼoa kao xʼinle tsa mena nga skotʼaya Biblia. Kʼoakixinle nga tsín mandosinna je relijión. Tonga tsabení nga mandosinna tʼatsʼe Biblia. Chan kʼoakixinle nga tokʼia nga skotʼaya kʼiatsa kui Bibliana ni̱chjainjin, je Biblia xi kijnana kui Nácar-Colunga.

JE BIBLIA KISIKATÍOJTÍN IJNGOKʼANAJIN

Felisa: Kʼiaa nga nó 1973 kisʼenngindá kʼoa nga kʼia 70 mani testigole Jeobá ya Santander, naxinandá jña tíjna Cantabria. ʼNde jebi siento ma naxinandáʼndí tjínle. Kʼianga mangínkʼinyasonlaijin chjota xi ya tsʼe, nkjín ora mangínkoaijin karro. Chan coche kinichjainjin nga jekoanni.

Nkjín chjota kixinyale Biblia nó xotjín. Me tongatsʼi nga katóliko ma kʼoa 11 xi kisʼenngindá. Tsejta koan xi kao je. Nga̱ kʼoati tse kichomani nga koanjinle nga tsínni kʼoatjín jmeni xi makjainle tsakai. ʼBeña nga tokui je Biblia kao nganʼiotsjele Niná xi binyakao chjota nga majinle jotso Biblia kʼoa nga síkʼantjaiya yaole (Hebreos 4:12). Je xʼinna polisía koan kʼoa kʼiaa nga nó 1979 kisʼenngindá. Kʼoa je mana tochriankʼiaa tíkotʼaya Biblia nga kʼien.

Araceli: Kʼianga sʼa kiskotʼaya Biblia kao je testigole Jeobá alikui nanda makjainna xi tʼatsʼe. Tonga alikui tikʼoasʼin kisikjaʼaitsjenña kʼianga tsaʼbe nga kʼoasʼin fikao yaole josʼin tsoya. Sa koantaja sa koantaja kjoamakjainna kʼoa ngisa tsjoa kisʼe tokoan. Tjínkʼa chjota ndaindʼiana xi tsabe nga tisikʼantjaiya yaona kʼoa i kitsona: “Araceli, tosi tonda kʼoatʼiain jme xi tinʼiai”.

I xinle je Jeobá: “Tsjoale kjoanda nga tsín tokinichajinnái kʼoa nga kʼoasikji kʼa tsakʼaiʼndenái josaʼnda nga tsaʼbe jokjoantjínni xi tʼatsʼe Biblia”. Xi ijngosani, kisijéle kjoanichatʼa je Felisa nga chʼao kixinle. Saʼnda nga kʼia, alikui tichobatinijin, tosa kui chobanijin xi tʼatsʼe Biblia. Kʼiaa nga nó 1989 kisʼenngindá kʼoa 61 nóna nga kʼia.

Felisa: Ndʼaibi 91 nóna kʼoa jekʼien xʼinna. Alikui tichókjoanina nga kʼoasʼian josʼian ngasʼa, tonga tojo nyaon nyaon bʼexkia Biblia. Kʼoa kʼianga kʼoamana fiña kjoajtínná kʼoa fixinyasonña.

Araceli: Nʼio tsjoake̱ nga fakaoña tʼatsʼe Jeobá je naʼmi kao yánchjín madresita, kuila nga kʼoati kui koan tsanda an. Tjínkʼa xi nʼio nda nrʼoé. Nkjín mani xi kjoé rebista kao libro. Jngo naʼmi xi nkjín kʼa tsakjakaonajmíña Énle Niná. Kʼoa ñandia kʼoakitsona nga kʼoatjín jmeni xi xinle. Tonga i kitso: “Tonga jósʼian nga jejchínga. Jókuitso chjotana kao familiana”. Kʼoa an i kixinle: “Tonga jókuitso je Niná”. Ba koanle nga̱ tsabe nga kʼoatjín jotixinle. Tonga alikuijin kitso kon nga sikʼantjaiya yaole.

Tojo faʼaitsjenna kʼianga kʼoakitso je xʼinna nga koaikaona ya Ndʼia jña chotʼayá. Jeñokan nóle nga ki títjon kjoajtín kʼoa alikʼia tikisichani. Kiskotʼaya Biblia kʼoa kitsoyason. Nkjín koya faʼaitsjenna jmeni xi kinʼiaijin nga tsakʼinyasuinjin nga joaijin. Ngi 2 sá chasa nga koaisʼenngindá tsakai kʼianga kʼien.

Felisa: Kʼianga sʼa kiskotʼaya tʼatsʼe Jeobá tsakatiochjoa nga jan xtiyánchjín ndichja. Tonga xijekoan kʼoati testigole Jeobá koan tsanda je. Kui jebi xi ngisasa ndatjín xi koantʼen, nga̱ jejtín sʼin tsakiyonijin kʼoa koan kichobanajmínijin xi tʼatsʼe Nináná kʼoa tʼatsʼe Biblia. Jéni Jeobá tsakʼetsʼoalaijin.a