Jósʼín je xi chjotale Cristo ma | Jótso je Biblia

Nʼio nkjín chjota xi kʼoatso nga chjotale Cristo ma tonga totaonni be xi kjaʼaí. Tjínkʼa xi to yaole fini kʼoa likui kixi jme xi sʼín. Likui bakó kjoanda kʼoa xi jechixan bʼanachale xínkjín. Kuinga kʼoatso kʼani chjota jótjínnele sʼin je xi chjotale Cristo ma.

Jótjínnele sʼin je xi chjotale Cristo ma

Ali tsa tokuijin xi machjén nga kʼoakuixoán nga chjotale Cristo maa. Je Biblia kʼoatso nga tjínnele kʼoasʼiaan jokitso je Jesús (Hechos 11:26). Je Jesús i kitso: “Tsa énna si̱kitjosonntsjao, jon nío xi ñaki chjotana” (Juan 8:31). Nga chjotajée maa alikui ñaki kʼoasʼin bitjosonná jme xi kitso je Jesús. Tonga bʼenelee yaoná nga nitjosoán jme xi kitso kʼoa tojmeni xi sʼiaan tjínnele koakoá nga chjotale Cristo maa. Kataʼyala kʼa choa̱.

Je xi chjotale Cristo ma tsjoake xínkjín

Jme xi kitso Jesús: “Jngo kjoatéxoma chjotse xi tsjoano: Katamatsjoachao xíngio. Josʼin nga an koantsjoake̱no, kʼoasʼin katamatsjoachao xíngio. Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:34, 35).

Jme xi kisʼin Jesús: Je Jesús alikui chjota tsakjaʼájin. Tsjoake koan toʼyani, tojñani tsʼe, ni tjínle tao̱n kʼoa ni mai. Kisindayaa je xi tjíomʼe, kisikjén chjota kʼoa kitsjoa kjoabijnachonle xi totʼatsaan (Mateo 14:14-21; 20:28).

Jme xi sʼín je chjotale Cristo: Bakó nga tsjoake je chjota, aliʼya xi faʼájin, síchatʼale tsa ʼya xi jokasíkao kʼoa tsa jokatsole. Kʼoati tjotʼa jme xi tjínle kʼoa binyakao je xi nganʼio machjénle ninga ñʼai male (1 Juan 3:16).

Je xi chjotale Cristo ma kui kʼoasʼín jme xi kixi tíjna

Jme xi kitso Jesús: “An nía xi kjoakixi” (Juan 14:6).

Jme xi kisʼin Jesús: Ñaki kixi jmeni xi kitso kʼoa jmeni xi kisʼin je Jesús. Alikui tsakʼanachale xi kjaʼaí tojoni nga kui kʼoakatasʼín jme xi koanmele. Tsabe je chjota nga ñaki én kixi xi kinchja̱ ninga sakʼoa kjoa tsakʼejnajin nga kʼoakisʼin (Mateo 22:16; 26:63-67).

Jme xi sʼín je chjotale Cristo: Alikui énndiso nchja̱ kʼoa alikui síché. Bʼéchjí tao̱nbasen, nda sixá, kʼoachon faʼasʼen kʼoa bitjo xále jochon tjínnele (Romanos 13:5-7; Efesios 4:28). Alikui bʼanacha. Kʼoa je xti xi skuela fi alikui bʼanacha kʼianga bʼénda examenle. Je chjotale Cristo alikui énndiso bʼétʼa xo̱n xi machjénle kʼianga xá básjai (Hebreos 13:18).

Je xi chjotale Cristo ma bakó kjoanda

Jme xi kitso Jesús: “Nroachonnáo ngatsʼio xi nʼio tinixáo kʼoa xi tse chʼá tichʼao, nga̱ an xi sikʼéyokjáyano. Tjayasonlao yaono yugo xi tsʼan, chótʼayao xi tsʼan, nga ndʼénía, kʼoa yo̱ma̱ kjiakoan. Kʼoa sa̱kóno kjoanikjáya xi tʼatsʼe ni̱ma̱no. Nga̱ yugona ali ñʼaijin, kʼoa tja̱ní chʼána” (Mateo 11:28-30).

Jme xi kisʼin Jesús: Je Jesús nda chjota koan kʼoa nda kisatio kon je chjota xi kichokonle. Tsjoake koan xtiʼndí, kitsjoanganʼiole je xi ba tjío kon kʼoa tsakakóle kjoaxkóntokon ngatsʼi chjota (Marcos 10:13-15; Lucas 9:11).

Jme xi sʼín je chjotale Cristo: Nda tso én fákao xi kjaʼaí kʼoa alikui toxkia fákao. Alikui kui kʼoasʼín jmeni xi chʼao kʼoe kon xi ngikʼa (Efesios 4:29, 31, 32). Mandosinle xi kjaʼaí kʼoa binyakao (Gálatas 6:10).

Je chjotale Cristo xi jechixan alikui bʼanachale xínkjín

Jme xi kitso Jesús: “Je xi Niná tsakʼékjao, ali bʼasjexinjin chjota” (Marcos 10:9).

Jme xi kisʼin Jesús: Ninga tsín chixan je Jesús kʼoakitsole je xi jechixan nga tsín katabʼanachale xínkjín (Mateo 19:9). Kʼoakitsole jmeni xosíkao je chjota nga kjoachajngi tsaojinni (Mateo 5:28).

Jme xi sʼín je chjotale Cristo: Bexkón je kjoabixanle, alikui kui kʼoasʼín jmeni xi chʼaosʼin sikʼéjna (Hebreos 13:4). Je chjoón kao je xʼin bexkón xínkjín kʼoa tsjoake xínkjín (Efesios 5:28, 33).