A ndatjín tsa xkóson kʼoétsʼoalee

Jmeni xi tso Biblia

Alikui jña kʼoatso Biblia nga xkóson kʼoétsʼoalee. Tjínnele nga toje Niná kʼoétsʼoalee kʼoa nga kao jaʼaínle Jesús kʼoétsʼoañá. Je Jesús i kitso: “Jon isʼin tʼetsʼoao: Nʼainajin xi tijnai ngʼajmi, tsje katasʼejna jaʼaínli” (Mateo 6:9). Je Jesús kʼoakitso nga toje Niná kʼoétsʼoalee, alikʼia kʼoakitso tsa xkóson, tsa ánkje kʼoa tsa kjaʼaísa xi kʼoétsʼoalee.

Je Jesús i kitsosa: “An nía xi ndiaa, an nía xi kjoakixi, an nía xi kjoabijnachon. Nitoʼyajin xi faʼaikonle Nʼainá, tsa tsian nga an” (Juan 14:6). Kui xi tsonile jebi nga toje Jesús xi tjínle ʼnde nga kuinchja̱ntjainá ngixko̱n Niná (Hebreos 7:25).

A koaan kʼoakji Niná kʼoa kʼoakji xkóson kʼoétsʼoalee

Je xi te kjoatéxoma, jngo jñani i̱ kitso Niná: “An, Jeobá Nináli kʼoasʼin bʼene nga toʼankjoan kataʼyaxkónna” (Éxodo 20:5). Kui xi tsonile én jebi nga je Niná kui xi mele nga ñaki tojekjoan katasʼetsʼoale, nga̱ kʼoasʼin ʼyaxkónñá Niná kʼianga bʼetsʼoalee (Isaías 48:11).

Kʼiatsa ánkje kʼoa tsa xkóson kʼoétsʼoalee ʼndele nga je Niná kʼoétsʼoalee, alikui nda sʼe̱ kon. Je libro xi tsʼe Apocalipsis kui tsoya kʼianga je pastro Juan tsakasenxkónyʼintʼale jngo ánkje nga kʼoetsʼoale, ánkje jebi tsakatekjáyale kʼoa i kitsole: “Ali kʼoajin nʼiai. Kʼoati an choʼnda nía joni ji, kao je ndsʼai xi tjínle je én xi tʼatsʼe Jesús. Jchaxkuín Niná” (Apocalipsis 19:10).