Je testigole Jeobá a kjoanʼio bʼénele chjota nga katasíkʼantjaiya religiónle

Mai, aliʼya xi bʼenelaijin nga katasíkʼantjaiya religiónle. Je Xo̱n xi Bájinkonná i kitso: “Alikui ndatjín tsa kjoanʼio kʼoénelee chjota nga katasíkʼantjaiya religiónle”.a I i̱bi faʼaitʼa anni nga tsín kʼoanʼianijin:

• Je Jesús alikʼia kjoanʼio tsakʼénele chjota nga katamakjainle jmeni xi tsakakóya. Bení nga tochoa koa̱nni xi kjuinrʼoéle (Mateo 7:13, 14). Tobʼelañá, tsakatio kʼa je chjotale xi tsín kisasenle jmeni xi kitsoya kʼoa alikui tiya tsakʼetsomakaoni. Je Jesús kitsjoaʼndele nga ki, alikui tsakʼénele nga katabatio (Juan 6:60-62, 66-68).

• Je Jesús kʼoakitsole je chjotale nga tsín kjoanʼio katabʼénele chjota nga katasíkʼantjaiya kjoamakjainle. Je xi kitsole kuinga katabásjai je chjota xi mele nga kjuinrʼoé (Mateo 10:7, 11-14).

• Likui jme chjíle kʼiatsa kʼoénelee chjota nga katasíkʼantjaiya religiónle. Je Niná kui xi mele nga ya ni̱ma̱le chjota katanroajinni nga skoe̱xkón (Deuteronomio 6:4, 5; Mateo 22:37, 38).

A kui xá ʼmiyasonnijin nga testigole Jeobá katama ngatsʼi chjota

Kuinga ʼmiyasonnijin nga kʼoatso je Biblia nga kʼuínyason “jña saʼnda nga fetʼa sonʼnde”. Xki̱ niʼya mangínjin, kʼoa ʼmiyaníjin tojñani nga tjín chjota (Hechos 1:8; 10:42; 20:20). Tjín chjota xi kʼoatsonajin jokitsole je chjotale Cristo xi títjon tsakatio nga bʼenelaijin chjota nga katasíkʼantjaiya religiónle (Hechos 18:12, 13). Tonga alikui kʼoatjín jotso. Aliʼya xi bʼenelaijin. Tonga ʼyaníjin nga tjínnele skoe̱ jotso Biblia ánni nga je skoéjinni jme xi sʼin.

Alikui ʼya xi bʼenelaijin nga katasíkʼantjaiya religiónle. Kʼoa je religiónnajin tʼaxin tíjnale je kjoa política, likui tsa tao̱n kʼoa tsa jme nganʼio bʼailaijin je chjota tojoni nga testigole Jeobá katama. Kʼoasʼín kʼa je xi chjotale Cristo tsole yaole, tonga alikui kʼoanʼiaijin jinjin.b

A tiʼndele chjota nga koa̱n sikʼantjaiya religiónle

Jaon. Je Biblia nkjín chjota síkʼaxki̱ xi kisikatío religión xi tsakatiojin je xijchále kʼoa jé Niná xi kixi tsabexkón. Jolani je Abrahán, Rut, je chjota xi tsakatio ya Atenas kʼoa kao je pastro Pablo (Josué 24:2; Rut 1:14-16; Hechos 17:22, 30-34; Gálatas 1:14, 23). Xi ijngosani, kʼoati tso je Biblia nga saʼnda tjínkʼa chjota xi bitjojinni je religión xi sasénle Niná (1 Juan 2:19).

Je ONU kʼoatso nga je xo̱n xi Declaración Universal de Derechos Humanos ʼmi yaa tjoénile je kjoatéxoma xi bʼasje chjota jngo tjíjtsa Sonʼnde xi chjota sítoánntjai. Je xo̱n jebi kʼoatso nga “ngatsʼi chjota tiʼndele nga sikʼantjaiya religiónle kʼoa kao jmeni xi makjainle”. Kʼoati tso nga ngatsʼi chjota tiʼndele nga koatiotsʼinya jmeni xi mele skoe̱, nga kjuinrʼoé tsa jmeni, nga sikʼabíson jmeni xi be kʼoa kao josʼin síkjaʼaitsjen. Jolani xi tʼatsʼe religiónle.c Ninga kʼoalani, kʼoati ʼyaijin nga je chjota tjínle ʼnde nga kuinchja̱ntjai josʼin makjainle kʼoa nga kʼoasjengi jme xi tsín sasénle.

A tichʼasjengiñá je familianá tsa religiónná si̱kʼantjaiyaa

Mai. Je Biblia kʼoatsoná nga jchaxkoán ngatsʼi je chjota ninga kjaʼaí religión tjíojin (1 Pedro 2:17). Xi ijngosani, je testigole Jeobá sítjosonní je kjoatéxoma xi faʼaitʼa Biblia jñani kʼoatso nga jchaxkoán je xijcháná, kʼoa bexkón je xijchále ninga kjaʼaí religión tjíojin (Efesios 6:2, 3).

Tonga ali tsa tongatsʼijin chjota nga sasénle jmeni xi tso je Biblia. Tobʼelañá, jngo chjoón xi ya koanjchínga ya Zambia itso: “Je chjota xi ya tsʼe naxinandána kʼoatso [...] nga tichʼasjengiñá je familianá kʼoa kao naxinandáná kʼiatsa religiónná si̱kʼantjaiyaa”. Je chjoón jebi kʼiaa tsakʼétsʼiakao nga kiskotʼaya Biblia kao je testigole Jeobá nga sʼa tsoti kʼoa kisikʼantjaiyaa religiónle. Kʼoa itso: “Nʼio nkjín kʼa nga kʼoakitsona je xijchána nga tsín kisasenle jmeni xi kisʼian kʼoa nga chʼaosʼin tisikatíoa. Nʼio ñʼai koanna nga kʼoakitsona xijchána nga̱ kui xi mena nga sa̱sénle jme xi sʼian. Nga kixi tifitʼale Jeobá kʼoa nga tsín tikui kʼoasʼinña je costumbre xi tjínle je religión, ali tsakuijin xi tsonile nga yándsʼian tibasenle je familiana”.d