Nga jaʼai Jtsínʼio saʼnda nga kinikatíondai chjota israelita ya Egipto

Tojin chjota tsʼangi kʼianga jaʼai Jtsínʼio, tonga xijeki nichxin nkjín jmi koanni. Xije jan siento kao ñachantejao nó jaʼato nga jaʼai Jtsínʼio, kʼia kitsin Abraham (Abrahán). Jchañá kʼianga kisitjoson Niná jme xi kitso kʼianga jngo ʼndí kitsjoale Abraham xi Isaac tsakʼin. Kʼoa nga jao xti xi kisʼele Isaac, jé Jacob kiskoejin Niná.

Nkjínya koanni yaniʼyale Jacob, tejao koanni xtixʼinle, kʼoati kisʼele xtiyánchjín. Te mani xtile Jacob xi koanjtike ndsʼe xi maʼndí, je xi José tsakʼin, tsakaténa nga choʼnda katama ya Egipto. Xijekoan, je José nʼio ngʼa tsakʼejna nga tsakatéxoma ya Egipto. Kʼianga jngo kjinrá kisʼe, je José kiskotʼayakao ndsʼe nga skoe tsa je kisikʼantjaiya yaole. Xijekoan, ngatsʼi yaniʼyale Jacob, je chjota israelita, ya kikatio ya Egipto. Kʼia kʼoakoan jebi nga je jao siento kao ñokan kao te nó jaʼato nga kitsin Abraham.

Jao siento kao xjaʼaon nó nga nda tsakatio ya Egipto je chjota israelita. Tonga kʼianga je kʼien José, choʼnda kinikao ya Egipto. Xijeki nichxin kʼia kitsin Moisés, kʼoa jé kisichjén Niná nga kisikatíondai je chjota israelita nga ya tjío Egipto. Jin siento kao ñachan xjaʼaonjao nó bichóni jebi kʼoa kui XI MAJAONI.