Niná kisichikontʼain je Abraham kao yaniʼyale

JE Jeobá be kʼianga kuicho jngo nichxin nga kjoañʼai kjoaʼa je ʼNdíle xi ngisasa tsjoake kʼoa nga kuiyá. Ya Génesis 3:15 tongini kʼoakitso nga kʼoakoa̱n, ninga tsín kjoan kʼoakitso kixi. Tonga nga katamajinle chjota jokji aon koa̱nle Niná nga kʼoasʼin ni̱kʼien ʼNdíle, kʼoasʼin kisʼetʼa ya Biblia jmeni xi koan kʼianga kʼoakitsole Niná je Abraham nga katatsjoátʼale Isaac, xi tsonile, nga katasíkʼienle.

Tonga je Niná koanákitsole Abraham nga ya ntje̱le Isaac kjoaʼaíni je xi kʼoasjentjai chjotasonʼnde. Je Abraham koankjainle kʼianga kuitjoson én jebi kʼoa bení nga koa̱nle Niná sikjaʼáyanile Isaac ninga kuiyálani. Kuinga kisitjosonsíni kʼoa kitsjoatʼasíni je ʼndíle. Tonga nga je kjoan tísíkʼien ʼndíle, je Jeobá jngo ánkje kisikasén xi kʼoakitsole nga tsín kʼoakatasʼín. Xijekoan, je Niná nda kisikʼaxki̱ Abraham nga kʼoasikji kjoamakjain kisʼele kʼoa kʼoati kitsongánile je kjoanichikontʼain xi tsjoále.

Xi je ki nichxin jao xti kisʼele Isaac, xi Esaú kʼoa Jacob tsakʼin. Tonga je xi tsabechjí je kjoanda xi tsjoá Niná jéní Jacob kʼoa kuinga tse kjoanda tsakʼaisínile. Je Niná kisikʼantjaiya jaʼaínle Jacob kʼoa Israel kitsole. Tejao xti kisʼele Jacob kʼoa ya kinroani nga tejao ntje̱le naxinandá Israel. Tonga jókoannile nga jngo naxinandáje koansíni je xtile.

Kʼia kinroatsʼiani kʼianga koanchinike je xtindsʼe̱ José. Kʼianga kʼoasʼin nʼio koanxinkonke, jo choʼnda sʼin tsakaténa. Je chjota xi tsakatse ya kikao Egipto jñani nʼio tse kjoa jaʼatojin, tonga Niná tsakasenkao. Je José kixi kitʼale Niná kʼoa nʼiojin koan. Xijekoan, je faraón jngo xá xi ngʼa tíjna kitsjoale. Kuinga koan tsakasenkaosíni xínkjín kʼianga kjinrá kisʼe. Je Jacob yaa Egipto kisikasén je xtile nga kikatse tsojmi xi kiskine. ʼYáni xi títsjoá tsojmi. Jé José. Je José kisikatíojtín je xtindsʼe̱ kʼoa kiskiʼndía. Je xtindsʼe̱ aon koannile jmeni xi kisikao kʼoa je José kisichatʼale kʼoa kʼoakitsole nga katafikʼá je xínkjín xi ngikʼa. Je faraón kui kitsjoale nangi jñani nʼio nda chon, kʼoa koannkjínya je xtile Jacob kʼoa nda tsakatio. Je José koanjinle nga je Jeobá xokisʼin nga kʼoasʼin kichomani jmeni xi koantʼain kʼoa nga kui kʼoakisʼinni nga katabitjoson jmeni xi kitso.

Je Jacob yaa tsakʼejna Egipto kao ngatsʼi xínkjín saʼnda nga kʼien. Kʼianga tojeme kuiyá kʼoakitso nga je xi kjoaʼaíkʼasjentjai chjotasonʼnde nʼio tse nganʼio sʼe̱le kʼoa nga rey koa̱n kʼoa nga ya kuinroani ntje̱le Judá. Xi je ki nó, je José kʼoakitso nga kʼaonsje Niná je ntje̱le Jacob ya Egipto.

(Yaa yʼangini Génesis kapítulo 20 saʼnda 50 kao Hebreos 11:17-22.)