Kjoaʼmiya 3

Machjén nga katama li xi tʼatsʼe Niná

Machjén nga katama li xi tʼatsʼe Niná kʼianga miyo le koain. ¿Je miyo li a be kʼoa a sichjén jaʼain li? Kʼoatjín. Kʼoati sʼin ni xi kao Niná, me le nga kataʼyai kʼoa nga sichjain jaʼain le. Jeobá ʼmi jé (Salmo 83:18; Mateo 6:9). Xi ijngo sani, tjínne li nga katama li jme xi nda sʼe le kʼoa xi chʼao sʼe le. Machjén nga kataʼyai ʼyani xi miyo le kʼoa xi tsín miyo le. Tse nichxin machjén nga nda ʼya jngo chjota, kui nga kʼoatso si ni Biblia nga nʼiónda nga sikʼaya nichxin kʼianga katama ná xi tʼatsʼe Jeobá (Efesios 5:15, 16).

Je miyo le Niná kʼoasʼin jme xi sasenkon jé. Tikjaʼaitsjen lai xi tʼatsʼe miyo li: tsa to táon jchai kʼoa kui kʼoasʼiain xi tsín sasén le, ¿a to jo miyo li xo tse koan? ¡Mai jin! Kʼoati sʼin ni xi kao Niná, tsa me li nga miyo le koain kui xi sʼiain jña ni le xi nda sasén le (Juan 4:24).

Li to ngatsʼi relijión nga basenkao ná nga miyo le Niná koan. Jesús, miyo nda le Niná, jao ndia kinchja ni. Jngo ndia xi teyá ñaki kijna kitse chjota: xi ya koaiyá to jchajin. Ijngo ndia xi nruʼeya tochoa chjota tjiófiya: kjoabijnachon xi tsín kʼia fetʼa kjuichokao. Kui xi tso ni le tsa me li nga miyo le Niná koain, tjínne li nga katama li josʼín nga nda ʼyaxkón (Mateo 7:13, 14).