Kjoaʼmiya 10

Jósʼin koansjai ná je relijión xi kjoakixi

Tsa me li nga miyo le Niná koain, relijión li Niná kʼoa kuitso tsa kui xi nda tjín. Jesús kʼoa kitsó nga “xi ñaki kjoakixi bexkón” kʼoasʼin skuexkón Niná kao xi ñaki “kʼoatjín” (Juan 4:23, 24). To jngo koya tjín josʼín nga kixi ʼyaxkón Niná (Efesios 4:4-6). Je relijión xi kjoakixi ya kjuichokao li kjoabijnachon xi tsín kʼia fetʼa; kʼoa je relijión ndiso ya kuichokao li jña to jchajin (Mateo 7:13, 14).

Tsanda chotsen lai josʼín chjota, jcha ni ʼyani xi tjín le relijión xi kjoakixi. Tsa Jeobá xi nda chjota, kʼoati nda chjota koan xi ñaki kjoakixi bexkón. Jngo yáloxa xi nda nda loxa ba le, kʼoatisʼin ni, je relijión xi kjoakixi tjínne le nga nda koan chjota le (Mateo 7:15-20).

Je miyo le Jeobá nʼió tjín le kjoaxkóntokon xi kao Biblia. Be kʼianga je Biblia Niná kitsjoa ná: Kui nga síchjen ni nga koandia le kjoabijnachon le, nga kʼoendajin kjoa le kʼoa koasenkao nga koan sa le xi tsʼe Niná (2 Timoteo 3:16). Kʼoa bʼene le yao le nga kʼoasʼín jme xi tsoyason.

Xi miyo le Jeobá tsjoakie ngañá xínkjín. Jesús tsakakó kjoatsjoacha le xi kao chjota nga kitsoya le xi tsʼe Niná kʼoa nga kisindaya xi chʼin tjín le. Je xi tjín le relijión xi kjoakixi kʼoati tsjoakie chjota. Joni tsa Jesús, likui bʼasjengi xi ma tjió, xi kjaʼai sʼin tsen yao le kʼoa xi xín ʼnde le. Jesús kʼoa kitsó kʼianga je chjota kao kui skue ni le kon ʼyani xi chjota ʼmiya le ma tsa tsjoakie ngañá xínkjín (Juan 13:35).

Xi miyo le Niná tjín le kjoaxkóntokon xi kao jaʼain le Niná: Jeobá. Tsa ʼyani xi tsín sichjén jaʼain li, ¿a miyo nda li koan? Mai jin. Tsa ʼyani xi miyo ná, nichjen ñá jaʼain le kʼoa nda nokjoa ñá xi tʼatsʼe kao chjota. Kui nga, ʼyani xi me le miyo le Niná koan tjínne le sichjén jaʼain le kʼoa nda kuinchja ni xi tʼatsʼe. Kui xi me le Jeobá nga kʼoasʼian (Mateo 6:9; Romanos 10:13, 14).

Joni tsa Jesús, je miyo le Niná bakoya le chjota xi tsʼe Reino le Niná. Je Reino le Niná jngo chjotaxá xi tsʼe ngʼajmi xi ʼnde naxó sikao Soʼnde. Je miyo le Niná kʼoatso le chjota én nda jebi xi tsʼe Reino le Niná (Mateo 24:14).

Ngatsʼi testigo le Jeobá bʼene le yao le nga miyo le Niná koan. Tjín le kjoaxkóntokon xi kao Biblia kʼoa tsjoakie ngañá xínkjín. Kʼoati sichjén kʼoa tjín le kjoaxkóntokon xi kao jaʼain le Niná; bakoya le chjota xi tʼatsʼe Reino le Niná. Nichxin xi tiyoa ndʼaibi, kui relijión xi kjoakixi tjín le testigo le Jeobá i Soʼnde.