Kjoaʼmiya 11
Chʼasengi relijión ndiso
Satanás kao ngatsʼi nai tjengí le likui me le nga Niná sixá lai. Bʼene le yao le nga sikjin le Niná ngantsʼi chjota jokji tjen koan le. ¿Jósʼin ni le? Jngo josʼín kui nga síchjen ngatsʼi relijión ndiso (2 Corintios 11:13-15). Ndiso jngo relijión tsa tsín kui tsoya kjoakixi xi tsʼe Biblia. Je relijión ndiso jngoya le taon ndiso: ñaki kʼoasʼin matsen, tonga likui chjí le, kʼoa kjoa koajngi li.
Jeobá, Niná xi tsʼe kjoakixi, likui tsjoakie kjoandiso le relijión. Kʼianga Jesús jaʼaikʼiejna i Soʼnde, jé chjota xi bʼandia le relijión koanme le nga sikʼien. Nda tjiómasʼin koan le. Kitsó: “Tojngo ma ni Nʼai najin, je xi Niná”. ¿A kisasen le Jesús? Mai, kitsó le: “Jon nio xi nʼai no je Nai” (Juan 8:41, 44). Nichxin xi tiyoa ndʼaibi, nʼió nkjín chjota xi kʼoasʼin sikjaʼaitsjen nga Niná bexkón, tonga xi tjió sixá kjoaixi ni le, jé Satanás kao ngatsʼi nai tjengí le (1 Corintios 10:20).
Joni tsa jngo yá xi tsín nda, likui nda to ba le, kʼoati sʼin ni je relijión ndiso chʼaosʼin chjota le. Je chjota Soʼnde nʼió tse kjoa tjín le xi to tʼatsʼe nga chʼao tjiómasʼin: kjoajndí, nkján, síche, táon be xínkjín, sikʼien kʼoa sikaoje yánchjín. Kjoa chʼaotjín jebi nʼió nkjín chjota xi kʼoasʼín, kʼoa relijión tjín le, tonga likui binyakao nga ndasʼin. Tsa tsín sikʼantjaiya yao le kʼoa tsa tsín sikatió jme xi tjiómasʼin, likui koan miyo le Niná koan (Mateo 7:17, 18).
Je relijión ndiso kʼoasʼin bakoya le chjota nga xkóson kʼoetsʼoa le. Niná kʼoatso nga tsín koan xkóson sʼetsʼoa le, kʼoa kixi tíjna. ¿A nda sʼe li tsa jngo chjota xi tsín fakao li tonga kjoakao sén le foto li? Tsa jngo xi kʼoasʼin, ¿a miyo li koan? Mai jin, likui jin koan. Jeobá kui xi me le nga jé katafakao chjota, likui nga jngo xkóson kjoakao kʼoa tsa jngo sén xi tsín le kjoabijnachon (Éxodo 20:4, 5).
Je relijión ndiso kʼoasʼin bakoya nga koan sikʼien chjota nga kjoajchán tjín. Jesús kʼoa kitsó nga je xi miyo le Niná koantsjoakie ngañá xínkjín. Chjota xi tsjoacha likui ma nikʼien (Juan 13:35). Kʼoati likui nda tjín tsa je sikʼien chjota xi chʼaosʼin. Kʼianga kitsoa xi tsín miyo le Jesús, jé likui kitsjoaʼndé nga jé chjota ʼmiya le sitoantjai (Mateo 26:51, 52).
Je relijión ndiso kʼoasʼin bakoya nga ya infierno kjoaʼa kjoañʼai chjota xi chʼaosʼin. Je Biblia bakoya nga jée kjoabiya bichokao ná (Romanos 6:23). Jeobá jngo Niná xi kjoatsjoacha. ¿Jngo Niná xi kjoatsjoacha a koan sikjaʼakon ngantsjai nichxin je chjota? Mai jin. Tojngo relijión sʼe ya ʼNde Naxó, kui relijión xi Jeobá kʼoa kuitso nga nda (Apocalipsis 15:4). Ngatsʼi relijión xi ngikʼa xi ya kjengí le kjoandiso le Nai, likui tisʼe ni.