Jmé xi koa̱nle je relijión nichxin xi nroaján

1. A sasénle Niná ngatsʼi relijión xi tjín.

Tjíokʼa chjota xi ndʼé tjío ni̱ma̱le xi ya tjíojin je relijión xi tjín. Kʼoa je Niná bechjíní chjota jebi kʼoa mandosinle xi tʼatsʼe. Tonga nʼio nkjín chjota xi nʼio chʼao tjíomasʼín xi totʼatsʼe je relijiónle (2 Corintios 4:3, 4; 11:13-15). Tísʼe én kʼianga tjíokʼa relijión xi ya tjíofayojin jme xi tjíosʼín je chjota xi terrorista ʼmi, ya jña kjoajchán tísʼe, ya jñani totaon tjíoʼya je xtiʼndí kʼoa tjíonikaojée kʼoa kao xi síkjeson xínkjín nga tsín tsjoake. Kʼianga kʼoakjima ñaki tokʼoajin male je chjota xi ndʼé tjío ni̱ma̱le nga kʼoatjíosʼín je relijión xi tjíojin. Tʼexkiai Mateo 24:3-5, 11, 12.

Je relijión xi ñaki kixi jé Jeobá tíbʼasjengʼa kʼoa je relijión ndiso chʼao tjíomasʼín ngixko̱n. Jme xi bakóya je relijión ndiso alikui ya Biblia faʼaitʼa kʼoa to énndiso bakóya tʼatsʼe Niná kao josʼin tjío je kʼien. Tonga je Jeobá kui xi mele nga katabe chjota jokjoantjínni xi tʼatsʼe. Tʼexkiai Ezequiel 18:4 kao 1 Timoteo 2:3-5.

2. Jmé xi koa̱nle je relijión nichxin xi nroaján.

Je relijión xi kʼoatso nga tsjoake Niná tonga xi kuini tsjoake jme xi chonle Na̱i i̱ Sonʼnde alikui bʼanachale Niná (Santiago 4:4). Ya Biblia, “Babilonia xi nʼio je” ʼmile ngatsʼi je relijión ndiso. Kʼoa je naxinandá xi Babilonia tsakʼin nichxin kjoatse yaa kinroatsʼiani je relijión ndiso kʼianga jejaʼato Jtsínʼio nichxinle Noé. Tonga je Niná jeme sikjeson ngatsʼi relijión xi tjíobʼanachale chjota kʼoa xi chʼaosʼin tjíosíkatío. Tʼexkiai Apocalipsis 17:1, 2, 5, 16, 17 kao 18:8.

Je Jeobá alikui tísíchajin je chjota xi ndʼé tjío ni̱ma̱le xi ya tjíojin relijión ndiso xi tjín Sonʼnde. Jméni xi tísʼín Jeobá xi tʼatsʼe chjota jebi. Tíbakóyale jokjoantjínni xi tʼatsʼe kʼoa kʼoasʼin tímʼaonsjejinni ya relijión ndiso xi tjíojin kʼoa tísíkatíojtín. Tʼexkiai Miqueas 4:2, 5.

3. Jméni xi tjínnele sʼin je chjota xi ndʼé tjío ni̱ma̱le.

Je Jeobá nʼio mandosinle tʼatsʼe chjota xi tsjoake énle kʼoa xi mele kʼoasʼin xi ndatjín. Kuinga kʼoatsosínile nga katabitjokajin ya relijión ndiso. Kʼiatsa tsjoake kjoaixi Niná sikatíojin tojmeni xi chʼaotjín. Tʼexkiai Apocalipsis 18:4.

Nichxin kjoatse nʼio nkjín koanni chjota xi ndʼé tjío ni̱ma̱le xi kisitjoson jme xi tsakakóyale je pastro. Je Jeobá jngo ndiaa chjotse tsakakóyale chjota jebi josʼin koatio nga tsjoa sʼe̱ kon kʼoa jngo kjoachoya kitsjoale. Kʼoa ñá kʼoati tjínnele sʼiaan jokisʼin chjota jebi, si̱tjosoán jme xi bakóya je Biblia kʼoa je Jeobá títjon si̱kʼéjnaa. Tʼexkiai 1 Tesalonicenses 1:8, 9 kao 2:13.

Je Jeobá kao kjoatsjoa kjoétjao je chjota xi bitjokajin relijión ndiso kʼoa ya batiojin relijión xi kixi. Ngatsʼi xi kʼoatjíosʼín nda tjíobatio ngixko̱n Jeobá, tsjoakengañá xínkjín ngatsʼi kʼoa koaan koatio ngantsjai nichxin. A meli ji nga kʼoati sʼe̱li kjoanda jebi. Tʼexkiai Marcos 10:29, 30 kao 2 Corintios 6:17, 18.

4. Jméni xi sʼin Niná nichxin xi nroaján kʼianga ñaki nyʼán sʼin katabatio ngatsʼi chjota.

Kʼianga jekjoaʼaxin Jeobá ngatsʼi relijión ndiso xi tjín sonʼnde ñaki ndasʼin koatio chjota. Alikui tisʼe̱ni relijión xi kʼoanacha kʼoa xi xkoa̱ya sikatío chjota. Ngatsʼi xi koatio tojé Jeobá kʼoetsʼoale nga̱ tojéní xi ñaki Niná. A tsí nʼio tsjoa maná nga kʼoakoa̱n. Tʼexkiai Apocalipsis 18:20, 21 kao 21:3, 4.