KJOAʼMIYA 6

A kjoaʼáyanile xi jekʼien

1. A koaan koatiokon ijngokʼani xi jekʼien.

Je Marta kao María tsjoa tjíole nga jaʼáyanile Lázaro, xi ndsʼe̱ koan

Kʼianga tsakʼejna Jesús i̱ Sonʼnde, jngo miyole kʼien xi Lázaro tsakʼin. Je Lázaro yaa tsakʼejna ya naxinandáʼndí xi Betania ʼmi, xi tíjnachrian Jerusalén. Kʼianga kicho Jesús ya ʼnde jebi, jeñole nichxin nga kʼien Lázaro. Je Jesús kikao Marta kao María nga ki ya tsjó jña kisʼeñe Lázaro kʼoa sasa koanñani chjota. A majinli jókji tsjoa koanle je Marta kao María kʼianga kisikjaʼáyanile Jesús je ʼndíkʼien ndsʼe̱. Tʼexkiai Juan 11:21-24, 38-44.

Jngo énnda chjotse xi faʼaitʼa ya Biblia kuinga kʼoatso nga kjoaʼáyanile xi jekʼien. Je Marta tokʼoa jebe nga kʼoatso Jeobá nga sikjaʼáyanile xi jekʼien ánni nga i̱ Sonʼnde koatiosíni. Tʼexkiai Job 14:14, 15.

2. Jósʼin tjío xi jekʼien.

Nga koannda Adán kʼoa nga jekʼien — Je Niná i kitsole Adán: “Chaoní kʼoa chao koa̱nni” (GÉNESIS 3:19)

Ñá xi chjotaa “kao chaole nangi” koanndañá (Génesis 2:7; 3:19). Ali tsa sénnichxinjin tjínná. Kʼianga jebiyaa, nijmejinla xi tibʼejnakonni jinyaoná. Kʼianga jebʼejnajñá xokoajkoaa jngokʼa chajin kjoafaʼaitsjenná. Je ʼndíkʼien alijme xi tibeni. Kuinga tsín jme xi tsakʼéyanajmísíni Lázaro kʼianga jejaʼáyanile. Tʼexkiai Eclesiastés 9:5, 6, 10.

Tjínkʼa chjota xi kʼoasʼin makjainle nga lʼí síkʼatsaojin Niná je chjota kʼianga jebiya, tonga likui kʼoatjín. Tojosʼin tiʼyaa, je kʼien nijmejinla xi tibeni. Je én xi tso nga lʼí síkʼatsaojinná Niná to énndisoní kʼoa Niná chʼaosʼin síkʼéjna, nga̱ je Jeobá saʼnda tsínkui síkjaʼaitsjen nga kʼoasikao chjota. Tʼexkiai Jeremías 7:31.

Chótsenlai je video Jósʼin tjío xi jekʼien

3. A koaan kjoakaoná je kʼien.

Je kʼien ni nrʼoéjinla kʼoa ni nchja̱jinla (Salmo 115:17). Tonga tjío ánkje tsʼen xi fákao chjota kʼoa male nga kʼoasítso jta̱le kʼoa jé síkʼóya yaole je ʼndíkʼien (Judas 6). Kuinga nʼio chʼao besíni Jeobá nga kʼoasʼin je ʼndíkʼienle fákao chjota. Tʼexkiai Deuteronomio 18:10, 11.

4. ʼYáni xi kjoaʼáyanile.

Je chjota jebi kui tísakóyale jokjoantjínni xi tʼatsʼe Niná nga jefaʼáyanile ya sonʼndenaxó. Xijema, tije títsoyanile xi ngikʼa xi kʼoati kjoaʼáyale.

Miyón mani chjota xi kjoaʼáyanile, kʼoa i koatio ijngokʼani i̱ Sonʼnde. Saʼnda kjoaʼáyale je chjota xi tsín tsabe tʼatsʼe Jeobá kʼoa kui kʼoakisʼin xi chʼaotjín. Tʼexkiai Hechos 24:15.

Je xi kjoaʼáyale kʼuínyale jokjoantjínni tʼatsʼe Niná kʼoa tjínnele sitjosonle Jesús kʼoa koako nga makjainle xi tʼatsʼe (Apocalipsis 20:11-13). Kʼiatsa je xi sitjoson koatio ngantsjai nichxin i̱ Sonʼnde. Tʼexkiai Juan 5:28, 29.

5. Jmé xi bakóyaná tʼatsʼe Jeobá nga kʼoasʼin sikjaʼáyanile je kʼien.

Kʼianga kʼoasʼin sikjaʼáyanile Jeobá je ʼndíkʼien kui bakóná nga nʼio tjínle kjoanda kao kjoatsjoacha. Kʼoa kuinga tjínniná kjoachoya jebi nga kʼoasʼin kisikasén je ʼNdíle nga kʼienntjainá. ʼYáni xi meli ji nga jcha ijngokʼani. Tʼexkiai Juan 3:16 kao Romanos 6:23.

Tsa mesali jchai tʼatsʼe jebi, chótʼajin je libro Jmé kjoanni xi bakóya je Biblia ya kjoaʼmiya 6, 7 kao 10.