Je Josías jé miyo xi nda sʼín kiskoejin

A ñʼai tíjna nga kui kʼoanʼia jmeni xi mele Jeobá, jósi ngái ji... Nʼio nkjín chjota xi kʼoatso nga nʼio ñʼai tíjna. Tonga ya Biblia kʼoatso nga tsín ñʼai tíjna. Kʼoa kui bʼéyanajmíná xi tʼatsʼe Josías, jngo ti xi nʼio tsakʼénele yaole nga kisixále je Jeobá. Je xi tsakasenkao je Josías kuinga je kiskoejin je miyo xi nda sʼín. Kataʼyala xi tʼatsʼe Josías kʼoa kao miyo xi kisʼele.

Amón tsakʼin je nʼaile Josías kʼoa rey sʼin tsakʼejna ya naxinandá Judá. Je Amón nʼio tsʼen koan kʼoa xkóson tsakʼétsʼoale. Kʼianga jekʼien je Amón, jé Josías xi rey kinikʼéjna ya Judá. A ʼyaní jotjín nóle je Josías nga rey kinikʼéjna. Tosʼaa jin nóle. A kʼoati tsʼen koan je Josías joni tsa pale... Majain.

Saʼnda nga sʼa ʼndíkji je Josías, kui xi koanmele nga jé Jeobá sixále. Kʼoa kuinga je miyo xi nda sʼín tsakásjaisíni. Jé kiskoejin chjota xi tsjoake je Niná, kʼoa miyo jebi tsakinyakao Josías nga kisitjosonle Jeobá. ʼYáni xi miyole koan je Josías.

Jngo xi miyole koanni jé profeta Sofonías. Je Sofonías i kitsole je naxinandá Judá: “Kʼiatsa tosi tonda niná ndiso kʼoétsʼoalao, alikui nda kuiyo”. Kʼoa je Josías, jókisʼin. A kisitjoson jmeni xi kitso je profeta Sofonías. Jaon, kisitjosonní kʼoa kuinga toje Jeobá tsakʼétsʼoasínile ngantsjai, alikui je tsakʼétsʼoale je xkóson nga̱ to niná ndisoní.

Je xi kʼoati miyole koan Josías jé Jeremías. Me tongóson tjín nóle nga jao. Kʼianga sʼa xti me tiya chrianni niʼyale. Je Jeremías kao Josías tsakinyakaongañá xínkjín nga je Jeobá kisixále. Nʼio miyo koanle xínkjín. Kʼoa kʼianga kʼien je Josías, saʼnda jngo canción tsakʼénda je Jeremías nga kʼoakitso jokji aon koanle.

Nʼio tse xi bakóyaná je choa̱le Josías, a tsí jaon... Saʼnda nga sʼa ʼndíkji je Josías kui xi koanmele nga je Jeobá sitjosonle. Kʼoa kuinga je kisimiyoni je xi tsjoake Jeobá. Tsí kʼoati meli tsanda ji nga je Jeobá si̱xálai. Kuinga nʼio chjísínile nga je si̱miyui je xi tsjoake Jeobá.