Jósʼin kʼuínyalao je xtino

Kʼianga sʼa tsakʼéjnabasen Jeobá je familia jé xi xijchá ma tsakánele nga sikuinda je xtile (Colosenses 3:20). Mani nga xijchá mao, jon kjineno nga koakoyalao je ʼndíxtino nga tsjoake katama Jeobá kʼoa nga nda chjota katama nga jekoa̱njchínga (2 Timoteo 1:5; 3:15). Kʼoati machjén nga kataʼyao jotjío ni̱ma̱le. Kʼoa je xi nʼio koasenkao kui je choa̱ xi bʼejnalao. Kʼianga ngisasa ndasʼin kʼuínyalao je ʼndíxtino je Énle Niná tjínnele nga jon títjon ya si̱kʼéjnajion ni̱ma̱no (Salmo 40:8).

1 TINÓʼYALAI ʼNDÍXTILI ÁNNI NGA KUITSOSÍNI KON NGA KJOAKAONAJMÍLI

JE BIBLIA ITSO: “Ngatsʼi chjota ndi̱to̱nndi̱to̱n katanrʼoé, tonga katakjenjta nga nchja̱” (Santiago 1:19). Kuijin xi meli nga tsín katatsokjón je ʼndíxtili kʼianga fákaonajmíli. Tonga takolai nga tijnandai nga kuinóʼyalai tokʼiani nga mele kuinchja̱. Ali toxkia bixkánkaojin ánni nga tsín tso̱kjonsíni nga kjoakaonajmíli (Santiago 3:18). Tochale likui kuitso kon nga kʼoeyanajmíli josʼin síkjaʼaitsjen kʼiatsa bele kon nga tokuixkánkoai. Tsejta katamai kʼoa kjitʼa kʼoatʼinlai nga tsjoachai (Mateo 3:17; 1 Corintios 8:1).

KOAAN I̱ SʼIAIN:

• Tiʼalai ʼndíxtili kʼiatsa mele kjoakaonajmíli

• Ntsjaintsjai chja̱kaonajmí xtili, ali tokʼiajin nga kjoa bajngi

2 TINKJÍNLAI TOKUIN JMENI XI MELE KUITSOLI

JE BIBLIA ITSO: “Je xi tísínkjínle kon tʼatsʼe jngo kjoa ndasʼin kʼoéjna” (Proverbios 16:20). Sakʼoaa machjén nga si̱jinlai yaoli jmeni xi tso xtili ánni nga jchasíni jotjío kon. Je xti sakʼoaa síkʼatone jotso kʼoa tsa maije̱ likuini kui kʼoatso josʼin síkjaʼaitsjen. “Kʼianga jngo chjota xi tokjoan nchja̱ nga tikje nrʼoéjinni jotjínni kjoa, to chjotachininí.” (Proverbios 18:13.) Ali tokjoánjin nijtilai yaoli (Proverbios 19:11).

KOAAN I̱ SʼIAIN:

• Ali tokjoan jijin nokjoachjoalai xtili kʼiatsa jmeni xi kuitsoli, kʼoa ali yaolijin nijtilai ninga tojmeni xi kuitso

• Tikjaʼaitsjain jokisʼe tokuin tsanda ji kʼianga sʼa kʼoatjín nóli kʼoa jmeni xi ngisa tsakʼailai kjoandosin

3 TʼAINGANʼIOLAO XÍNGIO JOSʼIN KUICHÁKJAYALAO XTINO

JE BIBLIA ITSO: “Tinóʼyai, ʼndí xi tsʼan, je kjoabichakjáyale nʼaili, kʼoa ali nikʼéjnajin je kjoatéxomale na̱li” (Proverbios 1:8). Je Jeobá jé nʼai kʼoa jé na̱ tsakánentsja je xti. Nga jaoní nga kjinele nga kuitsoyale ʼndíxtile nga katasítjoson kʼoa nga katasʼele kjoaxkóntokon (Efesios 6:1-3). Je xti tsen male kʼianga tsín “tojngo kjoafaʼaitsjen” tjínle je xijchále (1 Corintios 1:10). Kʼiatsa tsín mangóson sakʼoao, ali yajin ngixko̱n xtino chobatio, nga̱ tsa mai likui tiskoe̱xkónnino.

KOAAN I̱ SʼIAIN:

• Cho̱bayaño josʼin kuichákjáyalao xtino

• Tsa tsín mangóson kjoafaʼaitsjenli kao tsʼe chjoónli josʼin tikjáyale xti, ticho̱yalai yaoli anni nga kʼoasʼin síkjaʼaitsjenni

4 TʼENDAJIN JOSʼIN KJOÉNLAI NDIAA XTILI

JE BIBLIA ITSO: “Tjenlai ndiaa je ti josʼin koaikao yaole” (Proverbios 22:6). Tsa meli nga nda sʼin je xtili, tjínnele nga nda kʼoéndajin josʼin kʼuínyalai kʼoa nga kuichákjáyalai. Kʼiatsa tsín kʼoasʼiain alikui tojbi kʼoakoa̱n (Salmo 127:4; Proverbios 29:17). Jósʼin kuichákjáyale je xti. Ali tsa tokuijin nga tjín xi si̱koaa kʼoa jekoansani, kui xi tsonile nga si̱choyalee ánni nga tibichakjáyasínilee (Proverbios 28:7). Kʼoati tʼinyalai nga katamatsjoake je Énle Niná kʼoa nga katasínkjínle kon je kjoafaʼaitsjen xi tsjoá (Salmo 1:2). Kui jebi xi koasenkao nga nda sa̱tío kjoafaʼaitsjenle (Hebreos 5:14).

KOAAN I̱ SʼIAIN:

• Tisenkoai xtili nga ñaki tsen katamale nga tíjna Niná, kʼoa nga je katasínʼiotʼa

• Tʼinyalai jmeni xi koa̱nle sijndí kjoafaʼaitsjenle kʼoa nga katabinyaxinle kjoa jebi, jolani je xi faʼaitʼa ya Internet kʼoa tsa yaje̱ redes sociales. Tʼinyalai josʼin sikuindale yaole je chjota xi xtiʼndí síkaotaon