Jméni xi Reino de Dios ʼmi

JE BIBLIA ITSO

“Je Niná xi tíjna ngʼajmi jngo chjotaxá koasennda xi nikʼiajin tjóxin.” (Daniel 2:44, Traducción del Nuevo Mundo.)

“Jngo ʼndí kabʼainá, kʼoa je kʼoaile xá nga koatexoma.” (Isaías 9:6.)

KJOANDA XI SʼENÁ NGA ʼYAA JEBI

• Chjotaxále Niná ñaki kixiní kʼoa koaan koasenkaoná nga jngó jngoá (Isaías 48:17, 18).

• Jemachrianle nga ʼndenaxó sikao Sonʼnde kʼoa ñaki ndasʼin kuiyoaa kʼoa alikui tichʼin sʼe̱niná (Apocalipsis 21:3, 4).

A KOAAN KOA̱NKJAINNÁ JOTSO JE BIBLIA

Jaon. Jaola koya kataʼyaa anni:

• Je Jesús tsakakó jmeni xi sʼin je Chjotaxále Niná. Tsakakóyale je chjotale nga katasíjé nga katafaʼai je Chjotaxále Niná kʼoa nga katabitjoson josʼin mele Niná i̱ Sonʼnde (Mateo 6:9, 10). Kʼoati tsakakó josʼin kuitjoson jebi.

  Kʼianga tsakʼejna je Jesús i̱ Sonʼnde kisikjen je xi baole, kisindaya xi chʼin tjínle kʼoa saʼnda kisikjaʼáyale kʼien (Mateo 15:29-38; Juan 11:38-44). Mani nga je koase̱ntítjon nga koatexoma je Chjotaxále Niná, tongini tsakakó choa jmeni xi sʼin nga jekoatexoma (Apocalipsis 11:15).

• Jme xi chon sonʼnde bakó nga jeme kjoaʼaí je Chjotaxále Niná. Je Jesús kʼoakitso nga kjoanyʼán kjoaʼaíkao i̱ Sonʼnde je Chjotaxále Niná, tonga kʼoakitso nga títjon kjoanla kjoajchán, kjinrá kʼoa kao cháonnʼio sʼe̱ (Mateo 24:3, 7).

  Kʼoa jekʼoakjima ndʼaibi. Kuinga koa̱n kʼoéjngosíñá tokoán kʼianga je Chjotaxále Niná jeme kjoaʼaxin ngayeje kjoa jebi.