KJOACHJONANGI 5

Jósʼian kʼiatsa ʼya xi totaon skoe̱na ya ndʼiaskuela

ÁNNI NGA NʼIO CHJÍNILE

Josʼiain, tsakui nichxin koasenkaoli kʼoa tsakui nichxin ngisa tse kjoa kuichomani.

JÓSʼIAIN TSA JILANI

Tikjaʼaitsjenlai jebi: Je Thomas alikui mele koai skuelale ndʼaibi. Nikʼiajinla timenile koai. Yaa kinroani jebi nichxin kjoan jan sáján, kʼianga je xti xi ñatjen tjíotsoma skuela énndiso tsakáne kʼoa kisʼejinle ngatsʼi je xti. Kʼoa totso tomani jaʼaín kitsjoale. Tjínkʼa xti xi toxá sʼínni nga fikʼétʼale yaole je Thomas kʼoa bʼétsao librole, joxi tokjoataon xi kama sʼín. Ñandia kʼianga kinotsjá je Thomas kʼoa nga jekisikʼófaya, alikui tsabe ʼyani xokisikao. Kʼoa ngojña ngisa tinʼio kisinyaxkónngáni. Nga̱ tjínxó xi si̱kao tsakʼinle ya Internet. . .

Jósʼiain tsa jilani je Thomas.

TINKJÍNLAI TOKUIN

Tonga koaan nga tsín kao kjoatsʼen si̱toánntjai yaoli. Jókoa̱n sʼiain.

ALI KUENTAJIN NʼIAI. Je Biblia itso: “Je xi chini totsjoáʼndele yaole nga majtile, tonga je xi chjine alikui tsjoáʼndele yaole” (Proverbios 29:11). Kʼiatsa tsín kuinókjuin, tsakui nichxin tokoa̱nsinile je xi totaon beli kʼoa likui tijo sikaonili.
ALI NIJNDAJIN. Je Biblia itso: “Ali chʼaojin nikao je xi chʼao síkaono” (Romanos 12:17). Kʼiatsa si̱jndani tosaa tokoa̱n tse kjoa.
ALI KJOAJIN BIJNYI. Je Biblia itso: “Je xi sínkjínle kon be jmeni xi xkón tíjna kʼoa bʼejnaʼmale” (Proverbios 22:3). Koaan tiyólai je xi kjoa koajngíli kʼoa jmeni xi xkón sikʼéjnali.
TJASJAILAI JOKʼUÍNLAI. Je Biblia itso: “Kʼianga énndʼé nichjén nga ʼya xi jotsoná faʼáxin kjoajti” (Proverbios 15:1). Koaan saʼnda totijnokoai. Tobʼelañá, kʼiatsa ʼyani xi kʼoakuitsoli nga ʼmbá tisui koaan i̱ tʼinlai: “Jaonjin, kʼoala tinda tsa sikʼajen jao jan kiloña yaona”.
TOTʼIN. Je Nora, xi 19 nóle, itso: “Kʼianga tosa tomangián nga tsín jobixoán, yaa ʼyanile nga tjínná kjoafaʼaitsjen, nga tajajiaan kʼoa nga maná chjoéxkoá yaoná, kʼoa je xi totaon bená tsínle jebi” (2 Timoteo 2:24).
NʼIOJINSA KATAMAI. Je xi totaon bená bele kon kʼiatsa tsín nʼiojiaan kʼoa tsa tsín nitoánntje yaoná. Tonga tsa tsín kʼoaiʼndee nga ʼya xi totaon skoe̱ná, alikui josikaoná.
TʼINYALAI TSA ʼYANI. Jngo xi maestra koan itso: “Je xi totaon tíʼya kʼoakatatso tsa ʼyani xi totaon tíbe. Kui xi tjínnele sʼin, kʼoa kʼoasʼin koasenkaoni xi kjaʼaí nga tsín totaon kataʼya”.

Jngo ti xi tsín títsokjónle jngo xi totaon skoe̱ tsakai — Kʼiatsa tjínjngo tokuin koasenkaoli nga tsín kuijkuín, nga̱ je xi totaon tíbeli tsínle kjoanʼiojin

**JÓSINGÁI JI**
A JAON AXO MAI	JOTJÍNNI
1 Je xi totaon be chjota jejmi nó tjínle nga tjíobatío.	1 Jaon. Tobʼelañá, ya Biblia síkʼaxki je chjota xi nʼio tsaʼyale xi nefilim tsakʼin, kʼoa je én jebi “xi síkʼatsao xi kjaʼaí” sʼin tsoyanile (Génesis 6:4).
2 Alikui jme xi tjínle je bullying kʼoa alikui síkiʼaonná.	2 Mai. Nga̱ nʼio nkjín xti xi tjíosíkʼien yaole xi totʼatsʼe bullying.
3 Tokʼiaa tsa kuixkan kao je xi totaon tíbená nga tsín tijo sikaoniná.	3 Mai. Nga̱ je xi taon be chjota nʼio taja, kʼoa kuinga toxi tsjoasíni tsa kao je kuixkan.
4 Kʼiatsa tiʼyai nga ʼya xi totaon tíʼya, tosa tojyó tijnai.	4 Mai. Nga̱ tsa tojyó kuijnai joxi yaani tibisenkoai je xotísʼín. Kʼoati kjoa kuijnajin kʼoa lijojinsʼin sʼe̱ndajinni.
5 Je xi totaon be xi kjaʼaí alikuini nʼiojin, joxi nʼiojin sʼín tojoni nga tsín jchale nga tsokjónni.	5 Jaon. Ningalani tjínkʼa je xi totaon be je chjota nʼio ngʼa bʼasje yaole, tonga kʼoani titsokjónni kʼoa nga nda sa̱tío kon totaon be je xi ngikʼa.
6 Je xi totaon be chjota koaan sikʼantjaiya yaole.	6 Jaon. Kʼiatsa ʼya xi koasenkao, koaan kʼoantjaiya chjota jebi josʼin síkjaʼaitsjen kʼoa josʼín.