KJOAʼMIYA 12
Jméni xi koasenkaoli nga tosi tonda chótʼayai je Biblia
Ningalani ñʼai maná nga chotʼayá je Biblia, tonga nʼio basenkaoná. Tsakui nichxin sakʼoa kui nikjaʼaitsjain tsa kʼoakoa̱nli nga tosi tonda chótʼayai je Biblia. Ánni machjénsíni nga tosi tonda chótʼayai. Jméni xi koasenkaoli nga tosi tonda chótʼayai ninga sakʼoa ñʼai koa̱nli.
1. Ánni nga nʼio tjínnile kjoandosin nga chótʼayai je Biblia
“Je énle Niná tíjnakon, kʼoa nʼio síxá” (Hebreos 4:12). Je Biblia nʼio chjíle nga̱ yaa kʼoatsoná josʼin síkjaʼaitsjen je Niná kʼoa josʼin síkjaʼaitsjen xi tʼatsi. Koasenkaoli nga ngisa nda jchai xi tʼatsʼe Niná. Tonga kʼoati koasenkaoli nga nda chjoéjin jmeni xi sʼiain kʼoa nga sʼe̱li kjoachoya nichxin xi sʼa nroa. Tonga xi ngisa chjíle kuinga koa̱n miyole Jeobá koai̱n tsa chótʼayai je Biblia. Tsa ntsjaintsjai chótʼayai koasenkaoli nga ngisa nda kuijnai.
2. Ánni nga ndasíni nga koa̱njinná nga nʼio chjíle jmeni xi tso je Biblia
Jmeni xi tso je Biblia yaa mangóson tao̱nchjí, kuinga i̱ tsoniná: “Tindái je kjoakixi kʼoa alikʼiajin batenai” (Proverbios 23:23). Tsa ʼyaa nga nʼio chjíle jmeni xi bakóya je Biblia, kʼoénejinlee yaoná nga tosi tonda chótʼayá ninga ñʼai koa̱nná (tʼexkiai Proverbios 2:4, 5).
3. Jósʼin koasenkaoli je Jeobá tsa tosi tonda chótʼayai
Makjoanni nga je Jeobá kisindaná kʼoa nga miyoná mani, nʼio nda bexkonná kʼoa mele koasenkaoná nga jchaa xi tʼatsʼe. Je Niná koaanle koasenkaoná nga koa̱nmená chótʼayá kʼoa tsjoáná nganʼio nga si̱tjosoán (tʼexkiai Filipenses 2:13). Tsa sakʼoa tsín tso tokuin nga chotʼayai kʼoa tsa ñʼai mali nga nitjosuin jmeni xi tichotʼayai jé Jeobá koasenkaoli. Tsa nganʼio machjénli nga chókjoajinli je kjoa xi bitjatojin kʼoa tsa kʼiaje̱ nga ʼya xi batiochjoali, jé Jeobá koasenkaoli. Tijélai je Jeobá nga katabasenkaoli nga tosi tonda chótʼayai je Biblia (1 Tesalonicenses 5:17).
KATAʼYASAI JME XI TÍNCHJA̱NI
Kataʼyala jméni xi koa̱n sʼiain nga tosi tonda chótʼayai je Biblia ninga ʼya xi koatiochjoali kʼoa ninga sakʼoa tsín maʼali. Kʼoati jchaa jósʼin koasenkaoli je Jeobá nga tosi tonda chótʼayai.
4. Ngisa tʼailai kjoandosin nga chótʼayai je Biblia
Sakʼoa totjín totjenni xi bʼéchjoaná nga tsín chotʼayá je Biblia. Jméni xi sʼiain nga tsín kʼoakatamai. Je Biblia itso: “Ánni nga jchasíño jméni xi ngisa chjíle, nga tsín jme xi katachano kʼoa tsín si̱katéngiño xi ngikʼa saʼnda nga kjoaʼaí Cristo” (Filipenses 1:10, TNM). Cho̱bayaño jebi:
Jósingái ji, jméni xi ngisa nʼio chjíle.
Jméni xi sʼiain nga kui ngisa kʼoailai kjoandosin nga chótʼayai je Biblia.
Tsa jngo xjoa̱ xi tsomí nyali kʼoa la̱jao̱ meli kuinyasʼennai alikuijin tinkjín la̱jao̱ chóyani
Tonga tsakui títjon la̱jao̱ kuinyasʼain je xjoa̱ xi tíjnali kʼoati chóya je tsomí xi meli kuinyai. Tikʼoasʼinni, tsakui ngisa kʼoailai kjoandosin jmeni xi ngisa nʼio chjíle, sʼeeli nichxin nga kʼoasʼiain tsa jmesani
“Machjénná xi tʼatsʼe Niná”, kuinga nda sʼeni tokoán nga bʼexkiaa je Biblia. Tʼexkiao Mateo 5:3, TNM kʼoa cho̱bayaño jebi:
Tsakui ngisa kʼoailee kjoandosin nga chótʼayá je Biblia, jósʼin koasenkaoná.
5. Tosi tonda chótʼayai ninga tjínkʼa xi koatiochjoali
Sakʼoajin tjínkʼa xi kʼoakuitsoli nga li tichotʼayajinni Biblia. Kataʼyala jokoan je Francesco. Chótsenlao VIDEO kʼoa cho̱bayaño jebi:
Jókisʼin je male kʼoa kao je miyole Francesco kʼianga kʼoakitsole nga Énle Niná tíkotʼaya.
Jósʼin kichomani nga tosi tonda kiskotʼaya.
Tʼexkiao 2 Timoteo 2:24, 25 kʼoa cho̱bayaño jebi:
Jósʼin síkjaʼaitsjen xíngi kʼoa kao je miyoli nga Énle Niná tichotʼayai.
Tojo tso texto jebi, jósʼiain tsa ʼya xi kʼoechjoali nga Énle Niná tichotʼayai. Ánni.
6. Kʼoatʼai tokuin nga je Jeobá koasenkaoli
Nga ngisa mamiyoaa je Niná, kui xi mená nga ngisa tsjoa kjoáyaa kon. Ninga kʼoalani, sakʼoajin ñʼai koa̱nná nga si̱tjosoán jotso je kjoatéxomale. Tsa sakʼoa ñʼai koa̱nli ali nikʼajenjinlai tokuin, jé Jeobá koasenkaoli. Chótsenlao VIDEO kʼoa cho̱bayaño jebi:
Jméni xi kisʼin je Jim nga kisitjosonle Jeobá.
Jméni xi ngisa sasénli jokisʼin.
Tʼexkiao Hebreos 11:6 kʼoa cho̱bayaño jebi:
Jméni xi sʼin je Jeobá tʼatsʼe “chjota xi nʼio básjai nga je” kʼoa xi kui kʼoasʼín xi sasénle.
Jósingái ji, jósʼe kon je Jeobá kʼianga bʼenelai yaoli nga chotʼayai je Biblia.
TJÍNKʼA XI I̱ TSO: “Ánni Biblia chotʼayani”.
Jókʼuínlai tsa ʼya xi kʼoakuitsoli.
XI KACHOTʼAYÁ
Ninga sakʼoa ñʼai koa̱nli nga chótʼayai je Biblia, tonga koasenkaoli nga nda kuijnai ngantsjai. Tse kjoanichikontʼain tsjoáli je Jeobá tsa tosi tonda je si̱nʼiotʼai yaoli.
Jmé xi kamajinli
Ánni nga chjí ʼyani jmeni xi bakóya je Biblia.
Nga jejchai jmeni xi ngisa nʼio chjíle, jméni xi tjínnele sʼiain.
Ánni machjénsíni nga kʼoakʼuínlai je Jeobá nga katabasenkaoli nga tosi tonda chótʼayai je Biblia.
XI KOASENKAOSALI
Ño koya xi tjíobinyakao je chjota nga nda tjíosíchjén je nichxinle.
“Jósʼiaan nga ngisa nda si̱chjén je nichxinná” (¡Despertad!, febrero de 2014)
Kataʼyai jósʼin tsakasenkao Jeobá jngo chjoón ninga tsín koanjinle xʼinle ánni tsakʼénenile yaole nga kui kʼoakisʼin xi sasénle Niná.
Je Jeobá tsjoáná nganʼio nga chókjoajinná je kjoa xi bitjatojiaan (5:05)
Nga tosi tonda kiskotʼaya Énle Niná jngo chjoón kui xi tsakasenkao je xʼinle nga kʼoati chan kiskotʼaya.
Kʼoasʼin tsakasjaiya xi tʼatsʼe Niná joni tsa kjoa tibʼendajian (6:30)
Je testigole Jeobá sakʼoa kui jée sʼene nga xkoa̱ya síkatío chjota. Tonga a kʼoatjín jebi.