Jmé xi tjínnele sʼiaan nga sa̱sénle Niná je religiónná

Ya kjoaʼmiya 13 kui tsaʼyaa nga tsín tongatsʼi je religión nga sasénle Niná. Tonga koaan kʼoasʼin jchaxkoán je Niná josʼin mele. Jñánile je religión xi sasénle je Niná (Santiago 1:​27). Kataʼyala jme xi bakóya je Biblia.

1. Jñáni faʼaitʼa josʼin tjínnele jchaxkoán je Niná

Yaa Biblia faʼaitʼa. Je Jesús i kitso: “Jé énli xi ñaki kjoakixi” (Juan 17:​17). Tjínkʼa je religión xi tsín kuenta sʼín jmeni xi tso je Énle Niná, tosaa to costumbre fitjenngi kʼoa to kjoafaʼaitsjenle chjota bakóya. Tonga je Niná alikui sasénle kʼianga tsín nitjosoán je kjoatéxomale (tʼexkiai Marcos 7:9). Tsa kuenta sʼiaan jmeni xi tso je Biblia kʼoa si̱tjosoán je kjoafaʼaitsjen xi tsjoáná, tsjoa kjoáyaa kon.

2. Jósʼin tjínnele jchaxkoán je Jeobá

Nga je Jeobá kisindaná tojé xi bakinle nga jchaxkoán (Apocalipsis 4:​11). Jebi kui xi tsonile nga toje xi tsjoacha koaan kʼoa nga tsín xkóson kʼoa tsa sén si̱chjén kʼianga jchaxkoán (tʼexkiai Isaías 42:8).

Tjínnele kui kuiyojiaan je religión “xi tsje, xi sasénle Niná” (Romanos 12:1). Jebi kui xi tsonile nga kʼoasʼin kjuinkoaa yaoná josʼin mele je Niná. Tobʼelañá, je chjota xi tsjoake Jeobá chjí be je kjoatéxomale kʼoa sítjoson, jolani xi tʼatsʼe kjoabixan. Kʼoati tsínkui kʼoasʼín jmeni xi síkiʼaon, jolani tsa na̱jno̱ skén, tsa droga sikao, kʼoa alikui síkʼatone choa̱le kʼianga kui ʼbi je xi xán tjínle.a

3. Ánni machjénsíni nga ñatjen kuiyojtián kao je chjota xi mele sitjosonle je Jeobá

Kui xá satíoniná kjoajtín nga xki̱ xomana nga chʼa̱sjengʼaa je Jeobá ya jinjtín (Salmo 111:​1, 2). Jngo koya josʼin chʼasjengʼaa je Jeobá kʼiaa nga jndalee (tʼexkiai Salmo 104:​33). Kui kʼoatsoniná je Jeobá nga kuiyojtián nga̱ tsjoakená kʼoa be nga kui xi koasenkaoná nga ndasʼin kuiyoaa ngantsjai nichxin. Kʼoa kʼianga biyojtián, ninʼiojinngañáñá xíngiaa.

KATAʼYASAI JME XI TÍNCHJA̱NI

4. Chʼaotjín nga xkóson nichjén

VIDEO: A sasénle je Niná kʼiatsa xkóson si̱chjén kʼianga kʼoétsʼoalee (3:​26)

• Jméni xi koan nichxin kjoatse kʼianga xkóson kisichjén je naxinandále Niná kʼianga tsakʼétsʼoale.

Tjínkʼa chjota xi kʼoasʼin síkjaʼaitsjen nga ngisa machriantʼale je Niná kʼianga xkóson síchjén nga bʼétsʼoale. Tonga a tsí xinni tísíkʼéjna je Niná tsa kʼoatísʼín. Tʼexkiao Éxodo 20:​4-6 kao Salmo 106:35, 36 kʼoa cho̱bayaño jebi:

• Jñá kʼanile je sén kao xkóson xi síchjén je chjota.

• Jósʼin síkjaʼaitsjen je Jeobá kʼianga xkóson síchjén je chjota.

• Jósʼin nikjaʼaitsjenngái ji kʼiatsa xkóson ni̱chjén nga kʼoétsʼoalee je Niná.

5. Tsa toje Jeobá jchaxkoán alikui tikoa̱nkjainniná je kjoandiso xi tsoya je religión

VIDEO: Kʼianga jetsaʼbe xi tʼatsʼe Niná, alikui tikoankjainnina jmeni xi bakóya je religión ndiso (5:16)

Tʼexkiao Salmo 91:​14 kʼoa cho̱bayaño jebi:

• Jótso je Jeobá, jméni xi sʼin kʼiatsa tsjoachaa kʼoa tsa toje jchaxkoán.

6. Jé Niná ʼyaxkoán kʼianga satíoná je kjoajtín

Kʼianga jndaa kʼoa nga bʼé comentarioná ya jinjtín, jé Jeobá chʼasjengʼaa kʼoa bʼainganʼiongañálee xíngiaa. Tʼexkiao Salmo 22:22 kʼoa cho̱bayaño jebi:

• A basenkaoli je comentario xi tsjoá je ndsʼee ya jinjtín.

• Tsí meli tsa tongini kuiyondaa kʼoa jngo comentario kʼoai ya jinjtín.

7. Nʼio tsjoa male je Jeobá kʼianga bʼeyanajmílee xi kjaʼaí jmeni xi jekjimajinná

Nkjín koya jokoa̱n sʼiaan nga kʼoéyanajmílee xi kjaʼaí jmeni xi bakóya je Biblia. Tʼexkiao Salmo 9:1 kao 34:1 kʼoa cho̱bayaño jebi:

• Jméni xi jekjimajinli xi meli kʼoéyanajmílai xi kjaʼaí.

XI KACHOTʼAYÁ

Tsjoa fayaa ni̱ma̱le je Jeobá kʼianga ñaki toje ʼyaxkoán, kʼianga chʼasjengʼaa nga satíoná kjoajtín kʼoa kʼianga bʼeyanajmílee xi kjaʼaí jmeni xi jekjimajinná.

Jmé xi kamajinli

• Jñáni faʼaitʼa josʼin tjínnele jchaxkoán je Niná.

• Ánni nga tojeni Jeobá xi tjínnele jchaxkoán.

• Ánni nga ñatjen jchaxkónñá je Niná kao je chjota xi mele sitjosonle.

XI KOASENKAOSALI

Tʼexkiai ya jñani “Alikui tixkóson bʼetsʼoanile” tso kʼoa kataʼyai ánni nga tsín tixkóson tsakʼétsʼoanile jngo chjoón.

“Je Biblia síkʼantjaiyaa chjota” (La Atalaya, 1 de julio de 2011)

Kataʼyai jokoa̱n sʼiain nga kʼoai comentarioli ya jinjtín.

“Chʼa̱sjengʼaa je Jeobá ya jinjtín” (Xo̱n xi Bájinkonná, enero 2019)

Kataʼyai jósʼin tsakasenkao jngo ti nga ki je kjoajtín xi satíoná ninga ñʼai koanle.

Je Jeobá mandosinle xi tʼatsʼan (3:07)

Nkjín chjota xi kʼoasʼin makjainle nga kro síchjén je xi chjotale Cristo ma, a koaan kui si̱chjén nga kʼoétsʼoalee je Niná.

“Ánni nga tsín síchjénsíni kro je testigole Jeobá” (Yaa faʼaitʼa ya Internet ya jw.org)