Je kjoaxkón xi sʼe: a kui síchjén Niná nga kjoañʼai tsjoá

ITSO KʼA CHJOTA: “Je Niná xosʼín nga kjoaxkón sʼe nga̱ je tíbatéxomason Sonʼnde kʼoa kui kʼoasʼínni nga̱ tsʼenní”.

JE BIBLIA ITSO: “I̱ ngakijnda sonʼndebi tíjnakao na̱i” (1 Juan 5:19). A toxokʼoatso én jebi. Tikjaʼaitsjenlai, kʼianga je Na̱i kjinentsja sonʼnde, koaanle nga kʼoasikao chjota nga kʼoati katamakjoan jokjoan je. Nga ngʼakon katama, nga xkaiʼa katama kʼoa nga tsín jme xi katamajinle. Kuinga kʼoakjoan chjota nga tsín kjimanile tjíosíkuinda sonʼnde. Kʼoa nʼio nkjín chjotachjine xi kʼoatso nga kuinga tíbitsonni sonʼnde nga tsín kjimale tjíosíkuinda chjota kʼoa kuinga kjoaxkón sʼeni kʼoa kuinga ngisa tsaotʼaniná tsanda ñá.

Ánni nga títsjoáʼndesíni Niná nga kʼoasikji nganʼio tjínle je Na̱i. Kʼianga koa̱njinná, tjínnele kataʼyaa jósʼin kinroatsʼiani kjoa jebi. Je chjotajchínganá xi títjon tsakatio yátsʼin tsakinyále Niná, alikui tikoanmenile nga je tsakatéxomale. Kʼoa me ngatsʼi chjota nga kui choa̱ tjíofitje̱nngi. Kʼoa nga kʼoatjíosʼín kʼoasʼin tjíotsjoáʼnde nga je Na̱i tíbatéxomale. Kuinga kʼoakitsosíni Jesús nga jé “na̱i xi batéxoma sonʼndebi” (Juan 14:30). Tonga alikui je koatexomantsjai.

Je Jeobáa kuenta tísʼín ngayeje kjoañʼai xi tjín xi totʼatsʼe je Na̱i. Je Biblia kʼoatso jomale xi tʼatsʼe jebi. Tobʼelañá, kʼoatso jokoanle kʼianga kjoañʼai jaʼatojin je naxinandá Israel, itso: “Jokjitse nga kjoaʼaon tsakatiojin kʼoati aon koanle tsanda je” (Isaías 63:9). Kʼoa nga kʼoasikji kjoamatokon tjínle Niná jekʼoasʼin tsakʼéndajin nga kjoaʼaxin je Na̱i kʼoa jeme kʼoasʼin. Xi ijngosani, jekitsjoale xá je Jesucristo nga koatexoma tokʼia saʼndani.

JÓSʼIN BASENKAONÁ JEBI: Je Na̱i alikui tísíkuinda chjota tʼatsʼe kjoaxkón xi sʼe, tonga Jesús sikuindaná nichxin xi nroaján. Kʼianga tsakʼejna i̱ Sonʼnde kisikuinda chjotale kʼianga jngo ntjao̱xkón kichone. Je Biblia itso: “Tsakʼéchjoale ntjao̱be, kitsole ndáchikon: Jyó tijnai. Kisʼejyo ndi̱toon ntjao̱be. Koanndachonni”. Je chjotale tokoanxkónle kʼoa i kitsongañále xínkjín: “ʼYánibe [chjota] jebi, nga saʼnda ntjao̱bi kao ndáchikonbi sítjosonle” (Marcos 4:37-41). Nga kʼoakisʼin Jesús, kui xi basenkaoná nga makjainná nga koa̱nle sikuinda ngatsʼi chjota xi sitjosonle kʼianga koatexoma (Daniel 7:13, 14).