ʼYáni xi tjínle jée

Kʼiatsa tsín je Niná tjínle jée, jméni axo ʼyáni xotísʼín. Ánni nga kʼoasikji chjota tjíomʼesíni xi tʼatsʼe kjinrá kʼoa tsakui nga nʼio ma̱ sʼin tjíosíjchá yaole. Ánni nga kʼoasikji kjoajchán tjínsíni, nga chʼin tjínni kʼoa nga kjoaxkón sʼeni. Je Biblia jan koya tsoya anni nga kjoañʼai tjíofaʼáni je chjota.

1. Kjoangʼakon, kjoaxkaiʼa kao kjoajticha. “Je chjota tjíobatéxomale xínkjín nga tjíosíkiʼaon” (Eclesiastés 8:9). Me tokjitʼa nga kui kʼoamatʼain je chjota jmeni xi chʼaotjín kʼoa kuinga kʼoamani nga nʼio ngʼakon je chjota.

2. Je nichxin kʼoa xi tsín choyalee faʼaine ngatsʼi chjota. Je Biblia kʼoati tso nga kuinga kjoañʼai faʼáni chjota nga̱ “je nichxin kʼoa xi tsín choyalee faʼaine ngatsʼi” (Eclesiastés 9:11). Jebi kui xi tsonile tsa toyakjoan tíjna je chjota nga tjín xi kama, tsakuije̱ nga tsín síkuinda yaole kʼoa tsa je sʼele jée kuinga kʼoamani.

3. Tsʼeen xi tíbatéxoma i̱ Sonʼnde. Je Biblia kʼoatso ʼyani xi tjínle jée nga kjoañʼai tjín. Itso: “I̱ ngakijnda sonʼndebi tíjnakao na̱i” (1 Juan 5:19). Je Na̱i jngoo ánkje xi nda chjota tsakai kʼianga sʼa koannda tonga tsín “tsakʼejnajinle xi kjoakixi” (Juan 8:44). Tjíokʼa je ánkje xi kʼoati ngʼakon koan xi ya kijtakao nga yátsʼi̱n tsakinyále Niná kʼoa ánkjele Na̱i koan (Génesis 6:1-5). Josaʼnda nga yátsʼi̱n tsakinyále Niná je ánkje jebi kao je Na̱i, jé tjíobánentsja jmeni xi chon sonʼnde kʼoa kuinga nʼio tse kjoatsʼen tjínsíni. Je Na̱i nʼio jtile kʼoa nkjín chjota tíbʼanachale. Kuinga i̱ tsoni je Biblia: “Ma̱xóni xi tjío sonʼnde kao ya ndáchikon” (Apocalipsis 12:9, 12). Je Na̱i nʼio tsʼen kʼoa tsjoa male nga síkjaʼákon je chjota. Ali tsa jejin Niná xi kjoañʼai tísíkjaʼá chjota, jé Na̱i xotísʼín.

TIKJAʼAITSJENLAI JEBI: Tojé Na̱i xi nʼio tsʼen xi kʼoasʼin kjoañʼai síkjaʼá je chjota. Tonga je Biblia kʼoatso nga “Niná xi kjoatjaocha” (1 Juan 4:8). Kuinga tsín tsa je Niná tjínnile jée nga kjoatsʼen tjín kʼoa nga kui xi tsín kixi kʼoakjima (Job 34:10).

Tsakui nichxin kui chjonangilai yaoli kʼiáni kjoaʼaxin Niná jmeni xi tísʼín je Na̱i. Tojosʼin tiʼyaa, je Niná jtikee je kjoatsʼen kʼoa aon male kʼianga be nga kjoañʼai chjaʼá. Kʼoa je Biblia kʼoatsoná nga koa̱n kʼoéyanajmílee je Niná jmeni xi nikjáojiaan nga̱ je mandosinle xi tʼatsaan (1 Pedro 5:7). Ya kjoaʼmiya xi ijngo kui jchaa je choa̱ xi bakó nga nʼio tsjoakená je Niná kʼoa nga tjínle nganʼio nga kjoaʼaxin je kjoañʼai xi tjín kʼoa jmeni xi tsín kixi kjima.a